ଜାପାନର ୨୦ ବର୍ଷୀୟା କଳାକାର ମୋମୋତ୍ସୁକି। ସେ ଯେମିତି କଳ୍ପନାବିଳାସୀ ସେମିତି ବୃକ୍ଷପ୍ରେମୀ। ଆଉ ସେ ବେଶ୍ ନିଖୁଣତାର ସହ ଏହି ଦୁଇଟିର ମିଶ୍ରଣ କରି ଏକ ସୁନ୍ଦର ସୃଷ୍ଟି କରିଛନ୍ତି। ପିଲାଦିନୁ ସେ ଗଛଲତାକୁ ଭଲ ପାଉଥିବାରୁ ବଗିଚା କାମ କରିବାକୁ ସେ ବହୁତ ଭଲ ପାଉଥିଲେ। ତେଣୁ ଅନେକ ଫୁଲ ଗଛରେ ତାଙ୍କ ବଗିଚା ବେଶ୍ ସୁନ୍ଦର ଦେଖାଯାଉଥିଲା। ସେ କଳ୍ପନାବିଳାସୀ ହୋଇଥିବାରୁ ଅନେକ ପରୀଙ୍କୁ ମନରେ ଭାବୁଥିଲେ। ଯେଉଁଥିରେ ପରୀମାନେ ସୁନ୍ଦର ଡ୍ରେସ୍ ପିନ୍ଧିଥିବା ଦେଖୁଥିଲେ। ସେହି ଫେୟାରୀ ଡ୍ରେସ୍କୁ ସେ ବାସ୍ତବରେ କରିବା ଲାଗି ଯୋଜନା କଲେ। ଆଉ ନିଜ ବଗିଚାର ସୁନ୍ଦର ସୁନ୍ଦର ଫୁଲର ପାଖୁଡାରେ ଫେୟାରୀ ଡ୍ରେସ୍ ତିଆରି କରିବା ଆରମ୍ଭ କଲେ। ଖାଲି ନିଜ ବଗିଚାର ଫୁଲ ନୁହେଁ, ଏଠି ସେଠି ପରିତ୍ୟକ୍ତ ଭାବେ ପଡିଥିବା ଫୁଲକୁ ସେ ସଂଗ୍ରହ କରି ପାଖୁଡାକୁ ସାବଧାନତାର ସହ ଅଲଗା କରି ଭିନ୍ନ ଭିନ୍ନ ଡିଜାଇନ୍ର ସୁନ୍ଦର ଫେୟାରୀ ଡ୍ରେସ୍ ତିଆରି କରନ୍ତି। ସେଇ ଡ୍ରେସ୍ଗୁଡିକ ଏତେ ସୁନ୍ଦର ହୋଇଥାଏ ଯେ, ଦେଖଣାହାରୀ ଘଡିଏ ଚାହିଁ ରୁହନ୍ତି।
