କଟକ ଅଫିସ,୨୧। ୧୧: ବରିଷ୍ଠ କିଡ୍ନୀ ରୋଗ ବିଶେଷଜ୍ଞ ତଥା ଏସ୍ସିବି ନେଫ୍ରୋଲୋଜି ବିଭାଗୀୟ ମୁଖ୍ୟ ପ୍ରଫେସର ଚିତ୍ତରଞ୍ଜନ କର(୫୮)ଙ୍କର ଶୁକ୍ରବାର ସନ୍ଧ୍ୟାରେ ମାଡ୍ରାସ୍ର ଏମ୍ଜିଏମ୍ ହସ୍ପିଟାଲରେ ପରଲୋକ ଘଟିଛି। ମୃତ୍ୟୁବେଳକୁ ହସ୍ପିଟାଲରେ ତାଙ୍କ ଦୁଇ ପୁଅ ଓ ସ୍ତ୍ରୀ ଉପସ୍ଥିତ ଥିଲେ। ସେ ଗତ ଅଗଷ୍ଟ ୨୦ରେ କରୋନା ସଂକ୍ରମିତ ହୋଇଥିଲେ। ସୁସ୍ଥ ହୋଇ ଘରକୁ ଫେରିବା ପରେ ପୁଣି ତାଙ୍କ ଫୁସ୍ଫୁସ୍ରେ ସଂକ୍ରମଣ ହୋଇଥିଲା। ତାଙ୍କୁ ଅକ୍ଟୋବର ୭ରେ ଚିକିତ୍ସା ପାଇଁ ଏୟାର ଆମ୍ବୁଲାନ୍ସରେ ମାଡ୍ରାସ ପଠାଯାଇଥିଲା। ଶନିବାର ସନ୍ଧ୍ୟାରେ ଚିତ୍ତରଞ୍ଜନଙ୍କ ମରଶରୀର ବିମାନରେ ଅଣାଯିବା ପରେ ପ୍ରଥମେ ପୁରୁଣା ଭୁବନେଶ୍ୱରସ୍ଥିତ ତାଙ୍କ ବାସଭବନକୁ ନିଆଯିବ ବୋଲି ତାଙ୍କ ବନ୍ଧୁ ତଥା ଏସ୍ସିବି ଡେଣ୍ଟାଲ କଲେଜ ଅଧ୍ୟକ୍ଷ ଡା. ଜୟନ୍ତ କୁମାର ଦାସ କହିଛନ୍ତି।
ପ୍ରଫେସର କର ୧୯୯୭ରେ ବୁର୍ଲାରେ ନେଫ୍ରୋଲୋଜି ବିଭାଗରେ ଆସିଷ୍ଟାଣ୍ଟ ପ୍ରଫେସର ଭାବେ ଯୋଗଦେଇଥିଲେ। ୨୦୧୨ରେ ପ୍ରଥମଥର ତାଙ୍କ ଚେଷ୍ଟାରେ ଏସ୍ସିବି ମେଡିକାଲରେ କିଡ୍ନୀ ପ୍ରତିରୋପଣ ଆରମ୍ଭ ହୋଇଥିଲା। ଏପର୍ଯ୍ୟନ୍ତ ପ୍ରାୟ ୧୮୦ଟି କିଡ୍ନୀ ପ୍ରତିରୋପଣ ସଫଳ ଭାବେ ସେ କରାଇଥିଲେ। ରାଜ୍ୟ ଅଙ୍ଗ ଓ ଟିସୁ ପ୍ରତିରୋପଣ ଅନୁଷ୍ଠାନରେ ତାଙ୍କ ଉଦ୍ୟମରେ ୨୦୧୯ ଫେବୃୟାରୀରେ କାଡାଭରିକ କିଡ୍ନୀ ପ୍ରତିରୋପଣ ସମ୍ଭବ ହୋଇଥିଲା। କରୋନା କାଳରେ ସେ ପ୍ରାୟ ୬୦୦୦ ଡାଏଲିସିସ କରିଥିଲେ।
