ଗଞ୍ଜାମ,୧୮।୩(ଡି.ଏନ୍.ଏ.): ଗଞ୍ଜାମ ଥାନା ଅଞ୍ଚଳର ଜଣେ ମହିଳାଙ୍କୁ ତାଙ୍କ ଶାଶୁଘର ଲୋକ ଯୌତୁକ ନିର୍ଯାତନା ଦେଉଥିବା ନେଇ ଗଞ୍ଜାମ ଥାନାରେ ଅଭିଯୋଗ ହୋଇଛି l ଏତଲା ପରେ ଗଞ୍ଜାମ ଥାନା ପୋଲିସ ପକ୍ଷରୁ କେସ୍ ନମ୍ବର ୫୩/୨୧ରେ ମାମଲା ରୁଜୁ କରିବା ସହ ମହିଳାଙ୍କ ସ୍ବାମୀକୁ ଥାନାରେ ଅଟକ ରଖାଯାଇଥିବା ଆଇଆଇସି ଦିଲ୍ଲୀପ କୁମାର ସାହୁ ସୂଚନା ଦେଇଛନ୍ତି l
ମିଳିଥିବା ସୂଚନା ଅନୁଯାୟୀ, ଗଞ୍ଜାମ ଅଞ୍ଚଳର ଝିଅ ଛଦ୍ମନାମ କୁନି ବୈଦିକ ରୀତିରେ ବ୍ରହ୍ମପୁର ଲାଞ୍ଜିପଲି ଅଞ୍ଚଳରେ ବିବାହ କରିଥିଲେ l ବିବାହ ଦିନଠାରୁ ଶାଶୁଘର ଲୋକ ଅଧିକ ଯୌତୁକ ଦାବି କରି ବିଭିନ୍ନ ମାନସିକ ଯନ୍ତ୍ରଣା ଦେଉଥିବା ଅଭିଯୋଗରେ ଉଲ୍ଲେଖ ରହିଛି। ଏହାକୁ ସହ୍ୟ କରି ନ ପାରି ବାଧ୍ୟ ହୋଇ ଗଞ୍ଜାମ ଥାନାରେ ଏତଲା ଦେଇଥିଲେ l ଏତଲା ପରେ ଥାନା ଆଇଆଇସି ସାହୁ, ସେକେଣ୍ଡ ଅଫିସର ନାରାୟଣ କହ୍ନର ଲାଞ୍ଜିପଲି ଯାଇ ଝିଅ ନେଇଥିବା ସମସ୍ତ ଜିନିଷପତ୍ର ଥାନାକୁ ନେଇ ଆସିଥିଲେ l ଏହା ତାଙ୍କ ସ୍ବାମୀ ଜାଣି ପାରି ଟ୍ରେନରେ ଚମ୍ପଟ ମାରିବାକୁ ଷ୍ଟେଶନରେ ଟ୍ରେନକୁ ଅପେକ୍ଷା କରିଥିବା ବେଳେ ଗଞ୍ଜାମ ପୋଲିସ ତାଙ୍କୁ କାବୁ କରି ଥାନାରେ ଅଟକ ରଖିଥିବା ଏସ୍ଆଇ ସୂଚନା ଦେଇଛନ୍ତି l
