ଓ୍ବାଶିଂଟନ୍,୨୫।୧: ରାଷ୍ଟ୍ରପତି ନିର୍ବାଚନରେ ବିଜୟୀ ହେବା ପରେ, ଡୋନାଲ୍ଡ ଟ୍ରମ୍ପ ଅନେକ ଭାରତୀୟ ବଂଶୋଦ୍ଭବ ଲୋକଙ୍କ ଉପରେ ବିଶ୍ୱାସ ପ୍ରକଟ କରିଛନ୍ତି। ଟ୍ରମ୍ପ ତାଙ୍କ ଟିମ୍ରେ ଆଉ ଜଣେ ଭାରତୀୟ ବଂଶୋଦ୍ଭବଙ୍କୁ ସାମିଲ କରିଛନ୍ତି। ଆମେରିକା ରାଷ୍ଟ୍ରପତି ଭାରତୀୟ-ଆମେରିକୀୟ ପୂର୍ବତନ ସାମ୍ବାଦିକ କୁଶ ଦେଶାଇଙ୍କୁ ତାଙ୍କର ଡେପୁଟି ପ୍ରେସ୍ ସଚିବ ଭାବରେ ନିଯୁକ୍ତ କରିଛନ୍ତି। ହ୍ବାଇଟ ହାଉସ ଏହା ଘୋଷଣା କରିଛି।
ଦେଶାଇ ପୂର୍ବରୁ ରିପବ୍ଲିକାନ ନ୍ୟାଶନାଲ କନଭେନସନର ଡେପୁଟି କମ୍ୟୁନିକେସନ ନିର୍ଦ୍ଦେଶକ ଏବଂ ଆୟୋୱା ରିପବ୍ଲିକାନ ପାର୍ଟିର କମ୍ୟୁନିକେସନ ନିର୍ଦ୍ଦେଶକ ଭାବରେ କାର୍ଯ୍ୟ କରିଥିଲେ। ସେ ରିପବ୍ଲିକାନ ନ୍ୟାଶନାଲ କମିଟିରେ ଡେପୁଟି ବ୍ୟାଟଲଗ୍ରାଉଣ୍ଡ ଷ୍ଟେଟ୍ସ ଏବଂ ପେନସିଲଭାନିଆ ଯୋଗାଯୋଗ ନିର୍ଦ୍ଦେଶକ ମଧ୍ୟ ଥିଲେ।
ଏହି ପଦବୀରେ, ସେ ପ୍ରମୁଖ ବ୍ୟାଟେଲଗ୍ରାଉଣ୍ଡ ରାଜ୍ୟଗୁଡ଼ିକ, ବିଶେଷକରି ପେନସିଲଭାନିଆରେ ବାର୍ତ୍ତା ଏବଂ କାହାଣୀ ସ୍ଥାପନ କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ଟ୍ରମ୍ପ ସମସ୍ତ ୭ଟି ବ୍ୟାଟେଲଗ୍ରାଉଣ୍ଡ ରାଜ୍ୟ ଜିତିଥିଲେ।
ପୂର୍ବରୁ ଟ୍ରମ୍ପ ଷ୍ଟିଭେନ ଚିଉଙ୍ଗଙ୍କୁ ତାଙ୍କର ସଚିବ ଏବଂ ହ୍ବାଇଟ ହାଉସ ଯୋଗାଯୋଗ ନିର୍ଦ୍ଦେଶକ ଭାବରେ ନିଯୁକ୍ତ କରିଥିଲେ। ଏହା ବ୍ୟତୀତ କାରୋଲିନ ଲେଭିଟ ସଚିବ ଏବଂ ପ୍ରେସ ସଚିବ ଭାବରେ ନିଯୁକ୍ତ କରାଯାଇଥିଲା। ହ୍ବାଇଟ ହାଉସ ଯୋଗାଯୋଗ କାର୍ଯ୍ୟାଳୟର ତଦାରଖ ହ୍ବାଇଟ ହାଉସ ଡେପୁଟି ଚିଫ ଅଫ ଷ୍ଟାଫ ଏବଂ କ୍ୟାବିନେଟ ସଚିବ ଟେଲର ବୁଡୋଭିଚ କରିବେ।
ଟ୍ରମ୍ପଙ୍କ କ୍ୟାବିନେଟରେ ଭାରତୀୟ ବଂଶୋଦ୍ଭବ
କାଶ ପଟେଲ- ଟ୍ରମ୍ପ ଭାରତୀୟ ବଂଶୋଦ୍ଭବ କାଶ ପଟେଲଙ୍କୁ ଆମେରିକାର ନୂତନ ଏଫବିଆଇ ମୁଖ୍ୟ ଭାବରେ ନିଯୁକ୍ତ କରିଛନ୍ତି।
ବିବେକ ରାମସ୍ବାମୀ- ଟ୍ରମ୍ପ ନୂତନ ସରକାରୀ ଦକ୍ଷତା ବିଭାଗ (DOGE) ପାଇଁ ବିବେକ ରାମସ୍ବାମୀଙ୍କୁ ବାଛିଛନ୍ତି। ରାମାସ୍ବାମୀଙ୍କ କାମ ହେବ ସରକାରଙ୍କୁ ପରାମର୍ଶ ଦେବା।
ଜୟ ଭଟ୍ଟାଚାର୍ଯ୍ୟ- ଟ୍ରମ୍ପ ଜୟ ଭଟ୍ଟାଚାର୍ଯ୍ୟଙ୍କୁ ଜାତୀୟ ସ୍ବାସ୍ଥ୍ୟ ପ୍ରତିଷ୍ଠାନ (NIH)ର ନିର୍ଦ୍ଦେଶକ ଭାବରେ ନିଯୁକ୍ତ କରିଛନ୍ତି।
ତୁଳସୀ ଗାବାର୍ଡ- ଟ୍ରମ୍ପ ତୁଳସୀ ଗାବାର୍ଡଙ୍କୁ ଜାତୀୟ ଗୁପ୍ତଚର ନିର୍ଦ୍ଦେଶକ ଭାବରେ ନିଯୁକ୍ତ କରିଛନ୍ତି। ସେ ନିକଟରେ ଡେମୋକ୍ରାଟିକ ପାର୍ଟି ଛାଡି ରିପବ୍ଲିକାନ ପାର୍ଟିରେ ଯୋଗ ଦେଇଛନ୍ତି।
ହରମିତ୍ କେ ଢିଲୋନ-ଟ୍ରମ୍ପ ଢିଲୋନଙ୍କ ନ୍ୟାୟ ବିଭାଗରେ ନାଗରିକ ଅଧିକାର ପାଇଁ ସହାୟକ ଆଟର୍ଣ୍ଣି ଜେନେରାଲ ଭାବରେ ମନୋନୀତ କରିଛନ୍ତି।
ଡୋନାଲ୍ଡ ଟ୍ରମ୍ପ ଜାନୁଆରୀ ୨୦ ତାରିଖରେ ଆମେରିକାର ୪୭ତମ ରାଷ୍ଟ୍ରପତି ଭାବରେ ଶପଥ ଗ୍ରହଣ କରିଥିଲେ। ଏହା ଆମେରିକାର ରାଷ୍ଟ୍ରପତି ଭାବରେ ତାଙ୍କର ଦ୍ୱିତୀୟ କାର୍ଯ୍ୟକାଳ। ସେ ୨୦୧୬-୨୦ ପର୍ଯ୍ୟନ୍ତ ଆମେରିକାର ରାଷ୍ଟ୍ରପତି ଥିଲେ। କ୍ଷମତା ଗ୍ରହଣ କରିବା ମାତ୍ରେ ଟ୍ରମ୍ପ ଅନେକ ବଡ଼ ଏବଂ କଠିନ ନିଷ୍ପତ୍ତି ନେଇଥିଲେ।
