ନୂଆଦିଲ୍ଲୀ,୧୬।୧(ପି.ଟି.): ଦୁର୍ନୀତି ମାମଲାଗୁଡ଼ିକର ତଦନ୍ତରେ ଅବସରପ୍ରାପ୍ତ କର୍ମଚାରୀମାନଙ୍କୁ ନିୟୋଜିତ ନ କରିବା ପାଇଁ କେନ୍ଦ୍ରୀୟ ଭିଜିଲାନ୍ସ ଆୟୋଗ (ସିଭିସି) ଦେଶର ରାଷ୍ଟ୍ରାୟତ୍ତ ବ୍ୟାଙ୍କ, ବୀମା କମ୍ପାନୀ ଏବଂ କେନ୍ଦ୍ର ସରକାରଙ୍କ ବିଭାଗଗୁଡ଼ିକୁ ନିର୍ଦ୍ଦେଶ ଦେଇଛନ୍ତି। କେତେକ ସଂସ୍ଥା ଦୁର୍ନୀତି ମାମଲାର ତଦନ୍ତରେ ଅବସରପ୍ରାପ୍ତ କର୍ମଚାରୀଙ୍କୁ ତଦନ୍ତକାରୀ ଅଧିକାରୀ ଭାବେ ନିଯୁକ୍ତ କରିଥିବା ସିଭିସିଙ୍କୁ ନଜରକୁ ଆସିଥିଲା। ଏହା ଦୁଇ ଦଶନ୍ଧି ହେଲା ପ୍ରଚଳିତ ନିର୍ଦ୍ଦେଶନାମାର ବିରୁଦ୍ଧାଚରଣ କରୁଛି। ଭିଜିଲାନ୍ସ ଅଧିକାରୀମାନେ କର୍ତ୍ତବ୍ୟ ସମ୍ପାଦନ ବେଳେ ଯଦି ଗୋପନୀୟତା, ନିଷ୍ପକ୍ଷତା ଏବଂ ସଚ୍ଚୋଟତା ସହ ସାଲିସ୍ କରିଥିବା ଜଣାପଡ଼େ ତେବେ ସେମାନଙ୍କୁ ଉତ୍ତରଦାୟୀ କରାଯିବା ସହ ସେମାନଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କମିଶନ କହିଛନ୍ତି।
ଯଦି ତଦନ୍ତରେ ଅବସରପ୍ରାପ୍ତ ଅଧିକାରୀ ସାମିଲ ହୋଇଥିବେ, ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ସମ୍ଭବ ନୁହେଁ। ସେଥିପାଇଁ ତଦନ୍ତରେ ଅବସରପ୍ରାପ୍ତ ଅଧିକାରୀଙ୍କୁ ସାମିଲ ନ କରିବା ଲାଗି କୁହାଯାଇଛି। କୌଣସି ସଂଗଠନର ଭିଜିଲାନ୍ସ ଅଧିକାରୀ ପୂର୍ଣ୍ଣକାଳୀନ କର୍ମଚାରୀ ହେବା ଆବଶ୍ୟକ। ଅବସରପ୍ରାପ୍ତ କର୍ମଚାରୀଙ୍କୁ ଭିଜିଲାନ୍ସ କାର୍ଯ୍ୟକର୍ତ୍ତା ଭାବେ ଦାୟିତ୍ୱ ତୁଲାଇବା ଲାଗି ପରାମର୍ଶଦାତା ନିଯୁକ୍ତ କରାଯିବା ଉଚିତ ନୁହେଁ ବୋଲି ୨୦୦୦ ଅଗଷ୍ଟରେ ସିଭିସି ନିର୍ଦ୍ଦେଶ ଦେଇଥିଲେ। ଏହା ସତ୍ତ୍ୱେ କେତେକ ସଂସ୍ଥା ଅବସରପ୍ରାପ୍ତ କର୍ମଚାରୀଙ୍କୁ ତଦନ୍ତକାରୀ ଅଫିସର ନିଯୁକ୍ତ କରିଥିବା ଦୃଷ୍ଟିକୁ ଆସିଛି।
