ପୁରୀ,୩୧ା୩(ଅଜିତ୍ ମହାନ୍ତି)ଶ୍ରୀକ୍ଷେତ୍ରର ପ୍ରାଚୀନ ଓ ଅନନ୍ୟ ପରମ୍ପରା ସାହିଯାତ। ଚଳିତ ବର୍ଷ ଏପ୍ରିଲ ୧୭ତାରିଖ ପବିତ୍ର ରାମ ନବମୀଠାରୁ ସାହିଯାତ ଆରମ୍ଭ ହୋଇ ମେ’ ୧ତାରିଖ ରାମାଭିଷେକ ଶେଷ ହେବ। ଶ୍ରୀକ୍ଷେତ୍ରର ପ୍ରାଚୀନ ଆଠ ସାହିର ବାସିନ୍ଦା ୬୦ଜାଗା ଘର ସୌଜନ୍ୟରୁ ୮ଆଖଡ଼ା ନେତୃତ୍ୱରେ ସାହିଯାତ ଅନୁଷ୍ଠିତ ହେବ। ତେବେ ଚଳିତ ବର୍ଷ ସାହି ଯାତକୁ ସୁପରିଚାଳନା ପାଇଁ ଆଠ ସାହି ଆଖଡ଼ାର ମୁରବିମାନଙ୍କ ସହ ଏକ ବୈଠକ ଶନିବାର ସକିର୍ଟ ହାଉସ ସମ୍ମିଳନୀ କକ୍ଷଠାରେ ଅନୁଷ୍ଠିତ ହୋଇଛି। ଜିଲାପାଳ ସିଦ୍ଧାର୍ଥ ଶଙ୍କର ସ୍ବାଇଁଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଯାତ୍ରା ସମୟରେ ଯେପରି ଶାନ୍ତିଶୃଙ୍ଖଳା ରକ୍ଷା କରାଯିବା ସହ ଶୃଙ୍ଖଳିତ ଭାବରେ ଯାତ ବାହାରି ବାଦି ସାହି ପରିକ୍ରମା କରିବ ସେ ନେଇ ଆଲୋଚନା ହୋଇଥିଲା। ନିର୍ଦ୍ଧାରିତ ସମୟରେ ରାସ୍ତାଘାଟ, ଆଲୋକୀକରଣ ସହ ବିଭିନ୍ନ ପ୍ରସଙ୍ଗ ଉପରେ ଆଲୋଚନା ହୋଇଥିଲା। ଜିଲା ପ୍ରଶାସନର ଅଧିକାରୀମାନେ କ୍ଷେତ୍ର ପରିଦର୍ଶନ କରିବା ପାଇଁ ନିଷ୍ପତ୍ତି ହୋଇଛି। ତେବେ ନିର୍ବାଚନ ଆଚରଣ ବିଧି ରହିଥିବାରୁ ନୂତନ କାର୍ଯ୍ୟ ପାଇଁ ଅନୁମତି ଅଣାଯିବ। ନିର୍ଦ୍ଧାରିତ ସମୟରେ ସମସ୍ତ କାର୍ଯ୍ୟ ଶେଷ କରାଯିବ ବୋଲି ଜିଲାପାଳ ସୂଚନା ଦେଇ କହିଛନ୍ତି। ଅପରପକ୍ଷରେ ବୈଠକ ସମ୍ପର୍କରେ ଆଠ ସାହି ଆଖଡ଼ା କମିଟି ସଦସ୍ୟ ତଥା ହରଚଣ୍ଡୀ ସାହି ଆଖଡାର ଯୁଗ୍ମ ସମ୍ପାଦକ କହିଛନ୍ତି, ଜିଲା ପ୍ରଶାସନ ସହ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି। ଶାନ୍ତି ଶୃଙ୍ଖଳାରେ ଯେପରି ସାହିଯାତ ସମ୍ପନ୍ନ ହେବ ସେ ନେଇ ଜିଲାପାଳ ଆଲୋଚନା କଲେ। ଯାତର ୧୦ ଦିନ ପୂର୍ବରୁ ସମସ୍ତ କାର୍ଯ୍ୟ ସରିବା ପାଇଁ ପ୍ରଶାସନ ପ୍ରତିଶ୍ରୁତି ଦେଇଛି। ପ୍ରଶାସନ କରିଥିବା କମିଟିରେ ଆଠ ସାହି ଆଖଡାର ଦୁଇଜଣ ସଦସ୍ୟ ରହିଛନ୍ତି। ଆଠ ସାହିର ରାସ୍ତା, ପାଣି, ଡ୍ରେନେଜର ଆଦି କାର୍ଯ୍ୟର ସମୀକ୍ଷା କରିବା ସମୟରେ ଦୁଇ ସଦସ୍ୟଙ୍କ ସହ ଉକ୍ତ ସାହିର ମୁରବି ରହି କାର୍ଯ୍ୟର ସମୀକ୍ଷା କରିବେ। ପରମ୍ପରା ଅନୁଯାୟୀ ସାହିଯାତ କ୍ରମରେ ରାମନବମୀ ତିଥି ଅବସରରେ କାଳିକାଦେବୀ ସାହି ପକ୍ଷରୁ ରାମଜନ୍ମ ନୀତି ସମ୍ପନ୍ନ କରାଯିବ। ତେଣୁ ୧୭ ତାରିଖ ଠାରୁ ସାହି ଯାତ ଆରମ୍ଭ ହେବ। ସେହିଭଳି ୧୮ ତାରିଖରେ ହରଚଣ୍ଡୀ ସାହି ପକ୍ଷରୁ ଯଜ୍ଞ ରକ୍ଷା ନୀତି ଓ ମାଟି ମଣ୍ଡପ ସାହି ପକ୍ଷରୁ ନିଶାଣ ଶୋଭାଯାତ୍ରା ହେବ। ୧୯ ତାରିଖରେ ହରଚଣ୍ଡୀ ସାହି ପକ୍ଷରୁ ପର୍ଶୁରାମ କଳା ହରଣ ନୀତି କରାଯିବ। ୨୦ତାରିଖରେ ମାର୍କେଣ୍ଡଶ୍ୱର ସାହି ପକ୍ଷରୁ ବନବାସ ନୀତି, ୨୨ରେ କୁଣ୍ଡେଇବେଣ୍ଟ ସାହି ପକ୍ଷରୁ ସୀତାଚୋରୀ ନୀତି, ୨୩ରେ ଦୋଳମଣ୍ଡପ ସାହି ପକ୍ଷରୁ ଲଙ୍କାପୋଡ଼ି ନୀତି, ୨୪ରେ ବାଲି ସାହି ପକ୍ଷରୁ ସେତୁ ବନ୍ଧ ପ୍ରସ୍ତାବ ନୀତି, ୨୫ରେ ବାଲି ସାହି ପକ୍ଷରୁ ରାବଣ ବଧ ପ୍ରସ୍ତାବ ନୀତି ସମ୍ପନ୍ନ କରାଯିବ। ସେହିପରି ୧ ତାରିଖରେ ଗୌଡ଼ବାଡ଼ ସାହି ପକ୍ଷରୁ ରାମାଭିଷେକ ଏବଂ ପତିଆରା ଅନୁମାନ ନୀତି ହେବା ନେଇ ସୂଚନା ମିଳିଛି।
