ଗଞ୍ଜାମ,୧୨ା୧୨(ଡି.ଏନ୍.ଏ.): ସୋମବାର ଗଞ୍ଜାମ ଏନ୍ଏସି କାଉନସିଲର ବୈଠକ ହେବା ନେଇ ପୂର୍ବରୁ ସ୍ଥିର ହୋଇଥିଲା। ତାହା ହଠାତ୍ ବାତିଲ ହୋଇ ଯାଇଥିଲା। ଯାହାକୁ ନେଇ କାଉନସିଲରମାନେ କ୍ଷୋଭ ପ୍ରକାଶ କରିଛନ୍ତି। ଏନେଇ ବିଧାୟକଙ୍କ ସମେତ ସମସ୍ତ ଓ୍ବାର୍ଡ କାଉନସିଲର୍ମାନଙ୍କୁ ଅବଗତ କରାଯାଇଥିଲା। ଛତ୍ରପୁର ବିଧାୟକ ସୁବାସ ଚନ୍ଦ୍ର ବେହେରା ମଧ୍ୟ ବୈଠକରେ ଯୋଗ ଦେବା ପାଇଁ ଏନ୍ଏସି କାର୍ଯ୍ୟାଳୟରେ ପହଞ୍ଚି ଥିଲେ। କିନ୍ତୁ ହଠାତ୍ ବିଧାୟକ କୌଣସି କଥାକୁ ନେଇ ବିରକ୍ତ ପ୍ରକାଶ କରିବା ସହ ବୈଠକ ପୂର୍ବରୁ ଚାଲିଯାଇଥିଲେ। ଏଥିସହ ବିଧାୟକ ବେହେରା ନିଜ ଗାଡି ପାଖରେ ନିଜ ଦଳୀୟ କାଉନସିଲରମାନଙ୍କ ସହ ସହରର ଉନ୍ନୟନ କାର୍ଯ୍ୟ ସମ୍ପର୍କରେ କଥାବାର୍ତ୍ତା କରୁଥିବା ବେଳେ ସେହି ସମୟରେ ଏନ୍ଏସି କର୍ମଚାରୀ ଦସ୍ତଖତ ନିମନ୍ତେ ଖାତା ବଢ଼ାଇଥିଲେ। ଫଳରେ ବିଧାୟକ ପ୍ରବଳ ଅସନ୍ତୋଷ ବ୍ୟକ୍ତ କରିବା ସହ ଏନ୍ଏସି କାର୍ଯ୍ୟାଳୟରୁ ଚାଲିଯାଇଥିଲେ। ଅନ୍ୟପଟେ ସହରରେ ଚାଲିଥିବା ଉନ୍ନୟନ କାର୍ଯ୍ୟର ବିଲ୍ ଉଦ୍ଦେଶ୍ୟମୂଳକ ଭାବେ କରାଯାଉ ନ ଥିବା ଉପନଗରପାଳ ସୁରେନ୍ଦ୍ର ବାରିକିଙ୍କ ସମେତ କାଉନସିଲରମାନେ ଗଣମାଧ୍ୟମକୁ କହିଛନ୍ତି। ସହରରେ ନୂତନ ଭାବେ ନିର୍ମାଣ ହେଉଥିବା ବିଭିନ୍ନ ପ୍ରକଳ୍ପ ବିଲ୍ ପ୍ରଦାନ କରାଯାଉନାହିଁ। ଯାହା ଫଳରେ ଠିକାଦାରମାନେ ପ୍ରକଳ୍ପ କାର୍ଯ୍ୟ ଆଗକୁ ବଢ଼ାଇବା ପାଇଁ ମୁହଁ ଫେରାଉ ଥିବା ଉପନଗରପାଳ ଗଣମାଧ୍ୟମକୁ କହିଛନ୍ତି। ଯେ ପର୍ଯ୍ୟନ୍ତ ଏହାର ସ୍ଥାୟୀ ସମାଧାନ ନ ହୋଇଛି ସେପର୍ଯ୍ୟନ୍ତ ବୈଠକରେ ଯୋଗ ଦେବୁ ନାହିଁ ବୋଲି କାଉନସିଲରମାନେ କଡ଼ା ଚେତାବନୀ ଦେଇଛନ୍ତି।
