ପୁରୀ ଅଫିସ, ୪।୬: ମହାପ୍ରଭୁଙ୍କ ସ୍ନାନଯାତ୍ରାରେ ସାମିଲ ହେବା ପାଇଁ ପୁରୀକୁ ଲକ୍ଷାଧିକ ଭକ୍ତଙ୍କ ଆଗମନ ହେବାରେ ଲାଗିଛି। ଶନିବାର ଅପରାହ୍ନଠାରୁ ଭକ୍ତଙ୍କ ଭିଡ଼ ବଢ଼ିବାରେ ଲାଗଛି। ହେଲେ ପ୍ରଶାସନର ଦୂରଦୃଷ୍ଟି ଅଭାବ କାରଣରୁ ଶ୍ରଦ୍ଧାଳୁମାନେ ଶ୍ରୀମନ୍ଦିର ଯାଇ ନ ପାରି ଘଣ୍ଟା ଘଣ୍ଟା ଧରି ଠିଆ ହୋଇଥିବା ଦୃଷ୍ଟିଗୋଚର ହୋଇଥିଲା। ଭିଡ଼ ଅସମ୍ଭାଳ ହେବାରୁ ନିୟନ୍ତ୍ରଣ କରିବାରେ ପୋଲିସ ପାଇଁ ଏକ ଚ୍ୟାଲେଞ୍ଜ ସୃଷ୍ଟି ହୋଇଥିଲା। ଅପରପକ୍ଷେ ଦଇତାପତି ସେବକମାନେ ସ୍ନାନପୂଣ୍ଣିମା ନିମନ୍ତେ ଶନିବାର ମହାପ୍ରଭୁଙ୍କ ଗୁପ୍ତନୀତି କରିଥିବାରୁ ଶୁକ୍ରବାର ରାତି ୧୦ଟାରୁ ଶନିବାର ଅପରାହ୍ନ ୨ଟା ପର୍ଯ୍ୟନ୍ତ ସର୍ବସାଧାରଣଙ୍କ ଦର୍ଶନ ବନ୍ଦ ରହିଥିଲା। ଫଳରେ ଶ୍ରଦ୍ଧାଳୁମାନେ ଅପରାହ୍ନ ୩ଟା ପର୍ଯ୍ୟନ୍ତ ଶ୍ରୀମନ୍ଦିର ବାହାରେ ଅପେକ୍ଷା କରିରହିଥିଲେ। ସକାଳେ ପ୍ରଶାସନର ଏକ ଅଭାବନୀୟ ନିଷ୍ପତ୍ତି ଦେଖିବାକୁ ମିଳିଥିଲା। ସାଧାରଣରେ ମହାପ୍ରଭୁଙ୍କ ଗୁପ୍ତନୀତି ଚାଲିଥିବାବେଳେ କେବଳ ଜଗମୋହନ କବାଟ ବନ୍ଦ ରହିଥାଏ। ମାତ୍ର ଶ୍ରୀମନ୍ଦିର ଚାରିଦ୍ୱାର ଖୋଲାରହିଥାଏ। ଭକ୍ତମାନେ ଶ୍ରୀମନ୍ଦିର ଯାଇ ଭିତରବେଢାରେ ଥିବା ପାର୍ଶ୍ୱଦେବଦେବୀଙ୍କୁ ଦର୍ଶନ କରିଥାନ୍ତି। କିନ୍ତୁ ଶନିବାର ଗୁପ୍ତନୀତି ଚାଲିଥିବା ଦର୍ଶାଇ ଜିଲା ପ୍ରଶାସନ ପକ୍ଷରୁ ଭକ୍ତଙ୍କୁ ଶ୍ରୀମନ୍ଦିର ପରିସରରକୁ ଛଡାଯାଇ ନଥିଲା। ଫଳରେ ଅନେକ ଭକ୍ତ ଶ୍ରୀମନ୍ଦିର ବାହାରେ ଦୀର୍ଘ ସମୟ ଅପେକ୍ଷା କରିବା ସହ ପ୍ରଶାସନର ଏପରି ନିଷ୍ପତ୍ତିକୁ ଅସନ୍ତୋଷ ବ୍ୟକ୍ତ କରିଥିଲେ। ଗୁପ୍ତ ନୀତି ସରିବା ପରେ ୩ଟାପରେ ଭକ୍ତମାନେ ମହାପ୍ରଭୁଙ୍କୁ ଦର୍ଶନ କରିଥିଲେ। ଅନ୍ୟପଟେ ଟ୍ରାଫିକ ସମସ୍ୟାକୁ ଦୃଷ୍ଟିରେ ରଖି ମାର୍କେଟ ଛକଠାରୁ ଶ୍ରୀମନ୍ଦିର ପଟକୁ ଯାନବାହନ ଛଡାଯାଇ ନଥିଲା। ଯେଉଁଥିପାଇଁ ମାର୍କେଟ ଛକରେ ପ୍ରବଳ ଭିଡ଼ ପରିଲିଖିତ ହୋଇଥିଲା। ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଥିଲା। ତେବେ ପ୍ରଶାସନର ବ୍ୟବସ୍ଥା ସମ୍ପର୍କରେ ପୁରୀବାସୀ ସୂର୍ଯ୍ୟ ନାରାୟଣ ରଥ କହିଥିଲେ, ପୋଲିସ ପ୍ରଶାସନ ଟ୍ରାଫିକ ନିୟନ୍ତ୍ରଣ, ଦର୍ଶନ ବ୍ୟବସ୍ଥା ଏବଂ ଅନ୍ୟାନ୍ୟ ବ୍ୟବସ୍ଥା କରିବାରେ ବିଫଳ ହୋଇଛି। ଭକ୍ତଙ୍କ ପାଇଁ କରାଯାଇଥିବା ବ୍ୟାରିକେଡ ପରିସରରେ ପ୍ରଶାସନ ପକ୍ଷରୁ ଆଲୋକୀକରଣ ତଥା ଫ୍ୟାନର ସୁବିଧା କରାଯାଇନାହିଁ। ଫଳରେ ଭକ୍ତମାନେ ଅନେକ ସମୟ ଗରମରେ ବ୍ୟାରିକେଡରେ ଠିଆ ହୋଇ ଅଣନିଃଶ୍ୱାସୀ ହୋଇଯାଉଥିଲେ। ସେହିପରି ସିଂହଦ୍ୱାର ନିକଟରେ କରଯାଇଥିବା ଶେଡ୍ କାରଣରୁ ଅନେକ ଭକ୍ତ ଠିକ୍ ଭାବେ ଦର୍ଶନରୁ ବଞ୍ଚତ୍ତ ହେବେ ବୋଲି କହିଛନ୍ତି। ତେଣୁ ସରକାର ଏଥିପ୍ରତି ଦୃଷ୍ଟ ଦେବାକୁ ରଥ ଦାବି କରିଛନ୍ତି।
