କରାଚୀ, ୫।୭- ୨୦୧୬ରେ ଅନ୍ତର୍ଜାତୀୟ କ୍ରିକେଟ୍ରୁ ସନ୍ନ୍ୟାସ ନେଇସାରିଥିବା ପାକିସ୍ତାନର ଷ୍ଟାର୍ ଅଲ୍ରାଉଣ୍ଡର ଶାହିଦ୍ ଆଫ୍ରିଦୀ ନିଜର ବିବାଦୀୟ ବୟାନ ଲାଗି ସର୍ବଦା ଚର୍ଚ୍ଚାରେ ରହିଥାନ୍ତି। ଭାରତ ବିପକ୍ଷରେ ବୟାନ ଦେବାକୁ ମଧ୍ୟ ସେ ସବୁବେଳେ ଭଲ ପାଇଥାନ୍ତି। ନିକଟରେ କରୋନା ସଂକ୍ରମଣରୁ ସୁସ୍ଥ ଆରୋଗ୍ୟ ଲାଭ କରିଥିବା ଆଫ୍ରିଦୀ ଭାରତୀୟ ଖେଳାଳିଙ୍କୁ ନେଇ ଏଭଳି ଏକ ବୟାନ ଦେଇଛନ୍ତି, ଯାହା ଏବେ ଚର୍ଚ୍ଚାର ଖବର ପାଲଟିଛି। ଏକ ସାକ୍ଷାତ୍କାର ଅବସରରେ ଆଫ୍ରିଦୀ କହିଛନ୍ତି, ‘ଭାରତ ବିପକ୍ଷରେ ଖେଳିବାକୁ ସର୍ବଦା ଭଲ ପାଇଥାଏ। ଆମେ ବହୁଥର ଶୋଚନୀୟ ଭାବେ ଭାରତୀୟ ଦଳକୁ ପରାସ୍ତ କରିଛୁ। ଆମେ ତାଙ୍କ ବୋଲରଙ୍କୁ ଏମିତି ପ୍ରହାର କରିଥାଉ ଯେ ମ୍ୟାଚ୍ ପରେ ସେମାନେ ଆମକୁ କ୍ଷମା ମାଗିଥାନ୍ତି।’ ତେବେ ଆପ୍ରିଦୀ ଏହି ବୟାନରେ ଯେଉଁ ଦାବି କରିଛନ୍ତି ସେଥିରେ କେତେ ସତ୍ୟତା ରହିଛି ତାହା ଜଣାପଡ଼ିନାହିଁ। ଏଥିପୂର୍ବରୁ ୪୦ ବର୍ଷୀୟ ଏହି ପାକିସ୍ତାନ ପୂର୍ବତନ ଖେଳାଳି ଆହୁରି ମଧ୍ୟ କହିଥିଲେ, ମୋତେ ଭାରତ ଓ ଅଷ୍ଟ୍ରେଲିଆରେ ଖେଳିବାକୁ ପସନ୍ଦ ଲାଗିଥାଏ। କିନ୍ତୁ ଭାରତ ଭଲ ଦଳ। ଘରୋଇ ମାଟିରେ ଭାରତ ବିପକ୍ଷରେ ଖେଳି ରନ୍ ସଂଗ୍ରହ କରିବା କଷ୍ଟସାଧ୍ୟ ବ୍ୟାପାର। ୧୯୯୯ ରେ ଚେନ୍ନାଇରେ ଭାରତ ବିପକ୍ଷରେ ଖେଳିଥିବା ୧୪୧ ରନର ଇନିଂସ ମୋ ପାଇଁ ସବୁଠାରୁ ସ୍ମରଣୀୟ। ସେ ସମୟରେ ପାକିସ୍ତାନ ଟିମ୍ ମ୍ୟାନେଜର ମୋତେ ଦଳରେ ନେବାକୁ ଚାହିଁ ନ ଥିଲେ। କିସ୍ତୁ ଓ୍ବାସିମ ଭାଇ ଓ ମୁଖ୍ୟ ଚୟନକର୍ତ୍ତାଙ୍କ ଯୋଗୁ ମୁଁ ଭାରତ ଗସ୍ତରେ ଯାଇପାରିଥିଲି।’ ଏଠାରେ ଉଲ୍ଲେଖଯୋଗ୍ୟ ନିକଟରେ ଆଫ୍ରିଦୀ ଏବଂ ତାଙ୍କ ସ୍ତ୍ରୀ ଓ ଝିଅ କରୋନା ଆକ୍ରାନ୍ତ ହୋଇଥିଲେ। କିନ୍ତୁ ଏବେ ଆରୋଗ୍ୟ ଲାଭ କରିସାରିଛନ୍ତି।
