ଦିଗପହଣ୍ଡି,୧୧ା୭(ଡି.ଏନ୍.ଏ.): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଚୌଧୁରୀ ଟିକରପଡ଼ା ପଞ୍ଚାୟତ ବଜ୍ରଗୁମ୍ମା ଗାଁରେ ଗତ କିଛିଦିନ ହେଲା ସବର୍ଣ୍ଣ- ଅସବର୍ଣ୍ଣଙ୍କ ମଧ୍ୟରେ ବିବାଦ ଲାଗିରହିଛି। ଅସବର୍ଣ୍ଣ ଗୋଷ୍ଠୀର ଲୋକଙ୍କୁ ସବର୍ଣ୍ଣ ଗୋଷ୍ଠୀର ଲୋକେ ଗାଁରୁ ବାସନ୍ଦ କରିଥିବା ଭିଡିଓ ବିଭିନ୍ନ ସାମାଜିକ ଗଣମାଧ୍ୟମରେ ଭାଇରାଲ ହେବା ପରେ ଶନିବାର କେ. ନୂଆଗାଁ ଥାନା ଆଇଆଇସିଙ୍କ ନିର୍ଦ୍ଦେଶକ୍ରମେ ନୂଆପଡ଼ା ପୋଲିସ ଫାଣ୍ଡି ଅଧିକାରୀ ଏଏସ୍ଆଇ କ୍ଷୀରୋଦ ଚନ୍ଦ୍ର ବେହେରା ସଦଳବଳ ଗାଁରେ ପହଞ୍ଚି ତଦନ୍ତ କରି ଫେରିଥିଲେ। ସାରେ କେ. ନୂଆଗାଁ ଥାନା ଆଇଆଇସି ମାଧବାନନ୍ଦ ନାୟକ ଉଭୟ ଗୋଷ୍ଠୀର ମୁଖିଆମାନଙ୍କୁ ଥାନାକୁ ଡକାଇ ମାମଲାର ସମାଧାନ କରିଥିଲେ ମଧ୍ୟ ଗ୍ରାମରେ ଚାପା ଉତ୍ତେଜନା ଲାଗି ରହିଛି।
ସୂଚନାନୁସାରେ, ଗତ ଫେବୃଆରୀ ମାସରେ ଗ୍ରାମର ଶ୍ରୀ ରାଧାକୃଷ୍ଣ ମନ୍ଦିରର ଜିର୍ଣ୍ଣୋଦ୍ଧାର ଉତ୍ସବରେ ପ୍ରସାଦ ବଣ୍ଟନକୁ କେନ୍ଦ୍ରକରି କିଛି ଅସବର୍ଣ୍ଣ ଲୋକେ ପ୍ରତିବାଦ କରିବା ପରେ ସବର୍ଣ୍ଣ ଗୋଷ୍ଠୀର ଲୋକେ ଉତ୍ତେଜିତ ହୋଇଥିଲେ। ପରେ ମାମଲା ସମାଧାନ ହୋଇଥିଲା। ଗତ ପ୍ରାୟ ୫ ଦିନ ପୂର୍ବେ ରାତି ପ୍ରାୟ ୮ ଟାରେ ଗାଁ ମଣ୍ଡପରେ ସବର୍ଣ୍ଣ ଗୋଷ୍ଠୀର କିଛି ବ୍ୟକ୍ତି ବସିଥିବା ବେଳେ ଅସବର୍ଣ୍ଣ ଗୋଷ୍ଠୀର ଜଣେ ବ୍ୟକ୍ତି ନିଶାସକ୍ତ ଅବସ୍ଥାରେ ସେଠାରେ ପହଞ୍ଚି ସେମାନଙ୍କୁ ଗାଳିଗୁଲଜ କରିଥିଲେ। ପ୍ରତିବାଦ କରିବାରୁ ଉଭୟ ଗୋଷ୍ଠୀ ମଧ୍ୟରେ ମାରପିଟ୍ ହୋଇଥିଲା। ମାଡ଼ ଭୟରେ ଅସବର୍ଣ୍ଣ ଗୋଷ୍ଠୀର କିଛି ବ୍ୟକ୍ତି ଗାଁରୁ ଫେରାର ହୋଇଯାଇଥିଲେ। ଗାଁ ରେ ୧୫୪ ସବର୍ଣ୍ଣ ପରିବାର ରହୁଥିବା ବେଳେ ପ୍ରାୟ ୨୦ ଅସବର୍ଣ୍ଣ ପରିବାର ରହୁଛନ୍ତି। ସେମାନଙ୍କ ମଧ୍ୟରୁ ୫ ଅସବର୍ଣ୍ଣ ପରିବାର ଲୋକଙ୍କ ସହ ସବର୍ଣ୍ଣ ପରିବାରଙ୍କ ବିବାଦ ଲାଗିରହିଥିବା ପୋଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି। ଗ୍ରାମର କୌଣସି ଅସବର୍ଣ୍ଣ ପରିବାରଙ୍କୁ ଗାଁରୁ ବାସନ୍ଦ କରାଯାଇ ନ ଥିବା ନେଇ ଗାଁ ମୁଖିଆ ତଥା ଜଣେ ପୂର୍ବତନ ସରପଞ୍ଚ ପୋଲିସକୁ କହିଛନ୍ତି। ଅସବର୍ଣ୍ଣ ପରିବାରର କିଛି ବ୍ୟକ୍ତି ଗାଁରେ ସଦାସର୍ବଦା ଅଶାନ୍ତି ସୃଷ୍ଟି କରୁଥିବା ସେ ଜଣାଇଛନ୍ତି। ଅପରପକ୍ଷରେ ଗ୍ରାମର କିଛି ସବର୍ଣ୍ଣ ବ୍ୟକ୍ତି ସଂଘବଦ୍ଧ ହୋଇ ଗାଁ ମଣ୍ଡପରେ ବିଳମ୍ବିତ ରାତି ଯାଏ ଜୁଆ ଖେଳୁଥିବା ସହ ପ୍ରତିବାଦ କଲେ ଅସବର୍ଣ୍ଣ ଲୋକଙ୍କୁ ଗାଁରେ ରଖାଇଦେବୁ ନାହିଁ ବୋଲି ଧମକ ଦେଉଥିବା ସମ୍ପର୍କରେ ଅଭିଯୋଗ ହୋଇଛି।
