ଜେନେଭା, ୧୭ା୩: ଭାରତର ସିରମ୍ ଇନଷ୍ଟିଚ୍ୟୁଟ୍ ଦ୍ୱାରା ପ୍ରସ୍ତୁତ ଆଷ୍ଟ୍ରାଜେନିକା ଟିକାର ବ୍ୟବହାର ଉପରେ ଜର୍ମାନୀ, ଇଟାଲୀ, ଫ୍ରାନ୍ସ ସମେତ ୟୁରୋପିଆନ ୟୁନିୟନର ଅନେକ ଦେଶ ସୋମବାର ଅସ୍ଥାୟୀ ଭାବେ ରୋକ ଲଗାଇଛନ୍ତି। ଏହି ଟିକା ନେବା ଦ୍ୱାରା ଶରୀରରେ ରକ୍ତ ଜମାଟ ବାନ୍ଧୁଥିବା ଆଶଙ୍କାରେ ଉକ୍ତ ଦେଶଗୁଡ଼ିକ ଏହି ଟିକାକରଣ ବନ୍ଦ କରାଇଛନ୍ତି। ତେବେ ଆଷ୍ଟ୍ରାଜେନିକା ନିରାପଦ ବୋଲି ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) ସମେତ ୟୁରୋପର ମେଡିସିନ୍ ନିରୀକ୍ଷଣ ସଂସ୍ଥାଗୁଡ଼ିକ ପକ୍ଷରୁ କୁହାଯାଇଛି।
ୟୁନିୟନର ପ୍ରମୁଖ ୩ ଦେଶ ଜର୍ମାନୀ, ଇଟାଲୀ ଏବଂ ଫ୍ରାନ୍ସ ପରେ ସ୍ପେନ, ପର୍ତ୍ତୁଗାଲ, ସ୍ଲୋଭେନିଆ ଏବଂ ଲାଟ୍ଭିଆ ମଧ୍ୟ ଆଷ୍ଟ୍ରାଜେନିକା ବ୍ୟବହାର ଉପରେ ରୋକ ଲଗାଇଛନ୍ତି। ମଙ୍ଗଳବାର ପର୍ଯ୍ୟନ୍ତ ଫ୍ରାନ୍ସ ଆଷ୍ଟ୍ରାଜେନିକା ଟିକାକରଣ ଅଟକାଇଥିବାବେଳେ ସ୍ପେନ ୨ ସପ୍ତାହ ପାଇଁ ଏହା ଉପରେ ରୋକ ଲଗାଇଛି। ରକ୍ତ ଜମାଟ ବାନ୍ଧୁଥିବା ନେଇ ରିପୋର୍ଟ ଆସିବା ପରେ ଜର୍ମାନୀ ମଧ୍ୟ ସମାନ ପଦକ୍ଷେପ ନେଇଛି। କେବଳ ୟୁରୋପ ନୁହେଁ, ଇଣ୍ଡୋନେସିଆ ମଧ୍ୟ ଅନ୍ୟ ଟିକା ତୁଳନାରେ ଶସ୍ତାରେ ଉପଲବ୍ଧ ଆଷ୍ଟ୍ରାଜେନିକା ଭାକ୍ସିନ ବିଳମ୍ବରେ ପ୍ରଦାନ କରାଯିବାକୁ ଘୋଷଣା କରିଛି। ଏହା ପୂର୍ବରୁ ଆୟର୍ଲାଣ୍ଡ ଏହି ଟିକା ଉପରେ ରୋକ ଲଗାଇବାକୁ କହିଥିଲା।
ଟିକାକରଣ ବନ୍ଦ ନ କରିବାକୁ ଡବ୍ଲ୍ୟୁଏଚ୍ଓ କହିଛି। ଆଷ୍ଟ୍ରାଜେନିକା ସୁରକ୍ଷିତ ଏବଂ ଦେଶଗୁଡ଼ିକ ଟିକାକରଣ ବନ୍ଦ ନ କରାଇବାକୁ ଡବ୍ଲ୍ୟୁଏଚ୍ଓର ପ୍ରମୁଖ ବୈଜ୍ଞାନିକ ସୌମ୍ୟା ସ୍ବାମୀନାଥନ ପରାମର୍ଶ ଦେଇଛନ୍ତି। କେବଳ ବ୍ରିଟେନ ୧ କୋଟି ୧୦ ଲକ୍ଷ ଡୋଜ ଆଷ୍ଟ୍ରାଜେନିକା ଟିକା ବ୍ୟବହାର କରିଥିଲେ ମଧ୍ୟ ସେଠାରେ କୌଣସି ଗୁରୁତର ସ୍ବାସ୍ଥ୍ୟ ସମସ୍ୟା ଦେଖାଦେଇ ନ ଥିବା ଡବ୍ଲ୍ୟୁଏଚ୍ଓ କହିଛି। ଅନ୍ୟପକ୍ଷରେ ୟୁରୋପିଆନ ୟୁନିୟନର ମେଡିସିନ୍ ଏଜେନ୍ସି ଏହା ଉପରେ ବିଶେଷଜ୍ଞଙ୍କ ସମୀକ୍ଷାକୁ ନେଇ ଗୁରୁବାର ଏକ ବୈଠକ ଡାକିବାକୁ ନିଷ୍ପତ୍ତି ନେଇଛି।
ଭାରି ପଡ଼ିବ ବ୍ରାଜିଲ
ଦ୍ରୁତ କରୋନା ସଂକ୍ରମଣ ଯୋଗୁ ସର୍ବାଧିକ ସଂକ୍ରମିତ ଦେଶ ମଧ୍ୟରେ ଭାରତକୁ ଅତିକ୍ରମ କରି ଦ୍ୱିତୀୟ ସ୍ଥାନରେ ରହିଛି ବ୍ରାଜିଲ। ଏଭଳି ଭୟଙ୍କର ସ୍ଥିତି ଦେଶର ସ୍ବାସ୍ଥ୍ୟ ଭିତ୍ତିଭୂମିକୁ ବ୍ୟାପକ ପ୍ରଭାବିତ କରିଛି। ବ୍ରାଜିଲରେ ମହମାରୀର ଏଭଳି ସ୍ଥିତି ଏବେ ସାରା ବିଶ୍ୱକୁ ଚିନ୍ତାରେ ପକାଇଛି। ଆବଶ୍ୟକ ପଦକ୍ଷେପ ନ ନିଆଗଲେ ବ୍ରାଜିଲ ପୃଥିବୀର ଅନ୍ୟ ଦେଶଗୁଡ଼ିକୁ ମଧ୍ୟ ବିପଦମୁହଁକୁ ଠେଲିଦେବ ବୋଲି ଆଶଙ୍କା ପ୍ରକାଶ ପାଇଛି। ତୁରନ୍ତ ବ୍ରାଜିଲ ସରକାର ସଂକ୍ରମଣ ରୋକିବାକୁ ଯୋଜନା କରିବାକୁ ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) କହିଛି।
ସଂକ୍ରମଣକୁ ରାଷ୍ଟ୍ରପତି ଜାଏର ବୋଲସନାରୋଙ୍କ ଅଣଦେଖା ଓ ଏହାକୁ ରୋକିବାକୁ ଜାତୀୟସ୍ତରରେ ଯୋଜନା ପ୍ରସ୍ତୁତ କରିବାରେ ତାଙ୍କ ବିଫଳତାକୁ ଦାୟୀ କରାଯାଉଛି। ଦେଶରେ ଲକ୍ଡାଉନ୍, କର୍ଫ୍ୟୁ କଟକଣା ଲାଗୁ ନ କରିବାକୁ ବୋଲସନାରୋ ଜିଦ୍ ଧରିଛନ୍ତି। ଲକ୍ଡାଉନ ହେଲେ ଏହା ଦେଶର ଅର୍ଥନୀତିକୁ ଦୁର୍ବଳ କରିଦେବା ସହ ଗରିବ ଲୋକେ ଅଧିକ ପ୍ରଭାବିତ ହେବେ ବୋଲି ବୋଲସନାରୋ କହିଛନ୍ତି। ସାରା ବିଶ୍ୱରେ ମଙ୍ଗଳବାର ସୁଦ୍ଧା ୧୨୦,୯୨୫,୩୫୭ ସଂକ୍ରମିତ ହୋଇଥିବାବେଳେ ୨,୬୭୫୦୦୯ ଜଣ ପ୍ରାଣ ହରାଇଛନ୍ତି। ଏମାନଙ୍କ ମଧ୍ୟରୁ ୧୧,୫୨୫,୪୭୭ ସଂକ୍ରମିତ ଏବଂ ୨୭୯,୬୦୨ ମୃତକ କେବଳ ବ୍ରାଜିଲର।
