ନୂଆଦିଲ୍ଲୀ, ୧୧।୫ : ଦିଲ୍ଲୀ ହାଇକୋର୍ଟଙ୍କ ପତ୍ନୀଙ୍କ ସହ ବଳାତ୍କାରର ଅପରାଧୀକରଣ ପାଇଁ ଆବେଦନ ଉପରେ ଦୁଇ ଜଣିଆ ଖଣ୍ଡପୀଠ ପୃଥକ ପୃଥକ ରାୟ ଦେଇଛନ୍ତି। ଭାରତୀୟ ବଳାତ୍କାର ଆଇନରେ ସ୍ବାମୀଙ୍କୁ ଦିଆଯାଇଥିବା ଛାଡକୁ ଅସାମ୍ବିଧାନିକ ବୋଲି ଜଷ୍ଟିସ ରାଜୀବ ଶକଧର କହିଛନ୍ତି। ଏହାକୁ ସମାପ୍ତ କରିବାର ଆବଶ୍ୟକତା ରହିଥିବା ସେ ମତପୋଷଣ କରିଛନ୍ତି। ଅପରପକ୍ଷରେ ଅନ୍ୟ ଜଣେ ବିଚାରପତି ଜଷ୍ଟିସ ସି ହରିଶଙ୍କର ଏହି ଛାଡକୁ ସାମ୍ବିଧାନିକ ବୋଲି କହିଛନ୍ତି।
ତେବେ ଏହି ମାମଲା ଗୁରୁତ୍ୱପୂର୍ଣ୍ଣ ଆଇନ ସହ ଜଡିତ ଥିବାରୁ ସୁପ୍ରିମକୋର୍ଟରେ ଏହାର ଆବେଦନ କରାଯିବା ଉଚିତ ବୋଲି ଉଭୟ ବିଚାରପତି ସହମତ ହୋଇଛନ୍ତି। ଭାରତରେ ବଳାତ୍କାର ଆଇନ ଅନୁଯାୟୀ ସ୍ବାମୀଙ୍କୁ ଦିଆଯାଇଥିବା ଛାଡକୁ ହଟାଇବାକୁ ଚାହୁଁଥିବା ଆବେଦନ ଉପରେ ବିସ୍ତୃତ ଶୁଣାଣି ପରେ ଫେବୃଆରୀ ୨୧ରେ କୋର୍ଟ ଏହାର ରାୟ ସଂରକ୍ଷିତ ରଖିଥିଲେ। ଦିଲ୍ଲୀ ହାଇକୋର୍ଟର ଦୁଇ ଜଣିଆ ଖଣ୍ଡପୀଠ ଏହି ପ୍ରସଙ୍ଗରେ ଭିନ୍ନ ଭିନ୍ନ ରାୟ ଦେଇଛନ୍ତି।
ବୈବାହିକ ଜୀବନରେ ବଳାତ୍କାରର ଅପରାଧୀକରଣ ପାଇଁ ଆବେଦନ ଉପରେ ଏହାର ଆଭିମୁଖ୍ୟ ସ୍ପଷ୍ଟ କରିବାକୁ କୋର୍ଟ ଫେବୃଆରୀ୧୭ରେ କେନ୍ଦ୍ରକୁ ଦୁଇ ସପ୍ତାହ ସମୟ ଦେଇଥିଲେ। ତେବେ କେନ୍ଦ୍ର ସରକାର ଅଧିକ ସମୟ ପାଇଁ କୋର୍ଟକୁ ଅନୁରୋଧ କରିଥିଲେ। ଏହା ବର୍ତ୍ତମାନର ମାମଲାକୁ ସ୍ଥଗିତ ରଖିବା ସମ୍ଭବ ନୁହେଁ ଆଧାରରେ ଖଣ୍ଡପୀଠ ପକ୍ଷରୁ ଏହାକୁ ପ୍ରତ୍ୟାଖ୍ୟାନ କରାଯାଇଥିଲା। ଏହି ପ୍ରସଙ୍ଗରେ ମତାମତ ପାଇଁ ସମସ୍ତ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳକୁ ଚିଠି ପଠାଯାଇଛି ବୋଲି କେନ୍ଦ୍ର ସରକାର କହିଥବଲେ। ମତାମତ ନ ପାଇବା ପର୍ଯ୍ୟନ୍ତ ପ୍ରକ୍ରିୟା ସ୍ଥଗିତ ରଖିବାକୁ କେନ୍ଦ୍ର କୋର୍ଟଙ୍କୁ ଅନୁରୋଧ କରିଥିଲେ।
ଅଲ ଇଣ୍ଡିଆ ଡେମୋକ୍ରାଟିକ ମହିଳା ଆସୋସିଏଶନ ଏନଜିଓ ଆରଆଇଟି ଫାଉଣ୍ଡେଶନର ଆବେଦନ ଉପରେ ଦିଲ୍ଲୀ ହାଇକୋର୍ଟରେ ଏହି ମାମଲାରେ ଶୁଣାଣି ଚାଲିଛି। ୨୦୧୭ରେ, କେନ୍ଦ୍ର ସରକାର ଏକ ସତ୍ୟପାଠ ଦାଖଲ କରି କହିଥିଲେ ଯେ ସ୍ତ୍ରୀଙ୍କୁ ବଳାତ୍କାର କରିବା ଅପରାଧ ହୋଇପାରିବ ନାହିଁ କାରଣ ଏହା ବିବାହ ପ୍ରତିଷ୍ଠାନ ଉପରେ ପ୍ରଭାବ ପକାଇବ। ଏହା ମଧ୍ୟ ସ୍ବାମୀଙ୍କୁ ହଇରାଣ କରିବ ବୋଲି କେନ୍ଦ୍ର ଯୁକ୍ତି ଦର୍ଶାଇଥିଲେ।
ସ୍ତ୍ରୀଙ୍କ ସହ ବଳାତ୍କାରକୁ ଅପରାଧ ବୋଲି ଘୋଷଣା କରିବା ପାଇଁ ଏନଜିଓ ପୁରୁଷ କଲ୍ୟାଣ ଟ୍ରଷ୍ଟ ପକ୍ଷରୁ ଏହି ଆବେଦନକୁ ବିରୋଧ କରାଯାଇଥିଲା।
ଘଟଣାକ୍ରମ
୧୮୬୦: ଆଇପିସି କାର୍ଯ୍ୟକାରୀ ହେବାବେଳେ ୧୦ ବର୍ଷରୁ ଊର୍ଦ୍ଧ୍ୱ ବୟସର ମହିଳାଙ୍କ କ୍ଷେତ୍ରରେ ବୈବାହିକ ବଳାତ୍କାର ବ୍ୟତିକ୍ରମ ଲାଗୁ ହେବ ବୋଲି ଉଲ୍ଲେଖ କରାଗଲା।
୧୯୪୦: ଆଇପିସିରେ ସଂଶୋଧନ ଆଣି ବୈବାହିକ ବଳାତ୍କାରରେ ଥିବା ବ୍ୟତିକ୍ରମ ପାଇଁ ବୟସକୁ ୧୫ ପର୍ଯ୍ୟନ୍ତ ବଢ଼ାଗଲା।
୨୦୧୬ ଜାନୁୟାରୀ ୧୧: ଆଇପିସିର ଏହି ବ୍ୟତିକ୍ରମକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଆବେଦନଗୁଡ଼ିକ ଉପରେ ଦିଲ୍ଲୀ ହାଇକୋର୍ଟ କେନ୍ଦ୍ର ସରକାରଙ୍କୁ ଆଭିମୁଖ୍ୟ ସ୍ପଷ୍ଟ କରିବାକୁ କହିଲେ।
୨୦୧୭ ଅଗଷ୍ଟ ୨୯: ବୈବାହିକ ବଳାତ୍କାରକୁ ଏକ ଅପରାଧ ଭାବେ ପରିଗଣିତ କରାଯାଇପାରିବ ନାହିଁ। କାରଣ ଏହା ବିବାହ ଅନୁଷ୍ଠାନକୁ ଅସ୍ଥିର କରିପାରେ ବୋଲି କେନ୍ଦ୍ର ସରକାର ହାଇକୋର୍ଟଙ୍କୁ ଅବଗତ କରାଇଲେ।
୨୦୨୨ ଜାନୁୟାରୀ ୭: ହାଇକୋର୍ଟ ଦୈନିକ ଶୁଣାଣି ଆରମ୍ଭ କଲେ।
୨୦୨୨ ଫେବୃୟାରୀ ୨୧: ହାଇକୋର୍ଟ ପିଟିଶନଗୁଡ଼ିକର ଶୁଣାଣି ଶେଷ କରି ରାୟ ସଂରକ୍ଷିତ ରଖିଲେ।
