ଭବାନୀପାଟଣା,୨୩।୯(ସ୍ବ.ପ୍ର): ଦୃଢ଼ ଇଚ୍ଛାଶକ୍ତି ଆଗରେ ହାର ମାନିଛି ଶାରୀରିକ ଅକ୍ଷମତା । ଦୁଇଟି ଯାକ ଗୋଡ଼ ପୋଲିଓରେ ଆକ୍ରାନ୍ତ ହୋଇ ଅଚଳ, ତଥାପି ଗୁରୁଣ୍ଡି ଗୁରୁଣ୍ଡି ହାତରେ ଫାଉଡା ଧରି ରାସ୍ତା ମରାମତି କରୁଛନ୍ତି ଦିବ୍ୟାଙ୍ଗ। ଯେଉଁଠି ସୁସ୍ଥ ସବଳ ଲୋକ ରାସ୍ତାର ଖାଲକୁ ଆଡ଼ ଆଖିରେ ଚାହୁଁ ନାହାନ୍ତି,ସେଠି ଗାଁର ସମସ୍ୟାକୁ ଅଣଦେଖା କରି ପାରିନାହାନ୍ତି ଦିବ୍ୟାଙ୍ଗ ଜଣକ। ନିଜ ଟ୍ରାଇ ସାଇକେଲକୁ ସାଇଡ କରି କେତେବେଳେ ଫାଉଡାରେ ମାଟି କାଢୁଛନ୍ତି ତ ଆଉ କେତେବେଳେ ହାତରେ ମାଟି ସାଉଁଟି ରାସ୍ତାର ଗାତ ପୋତୁଛନ୍ତି । ଏମିତି ଏକ ଭଡିଓ ଭାଇରାଲ ହେବା ପରେ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି। ଦିବ୍ୟାଙ୍ଗ ଯେତିକି ପ୍ରଶଂସା ସାଉଣ୍ଟୁଛନ୍ତି ତାହାଠୁ ଅଧିକା ପ୍ରଶାସନିକ ଅଧିକାରୀ ଓ ଜନପ୍ରତିନିଧିଙ୍କ ପାଇଁ ଭର୍ତ୍ସନା ଶୁଣିବାକୁ ମିଳିଛି। ଏପରି ଏକ ଦୃଶ୍ୟ ଦେଖିବାକୁ ମିଳିଛି କଳାହାଣ୍ଡି ଜିଲା ଧର୍ମଗଡ଼ ବ୍ଲକ ଡୁମେରଗୁଡ଼ା ପଞ୍ଚାୟତ ଜୋରପଡା ଗାଁରେ। ଗାଁର ଗଣେଶ ନାଏକ ଜନ୍ମରୁ ପୋଲିଓ ଆକ୍ରାନ୍ତ। ତାଙ୍କ ଦୁଇଟି ଗୋଡ଼ ଅଚଳ, ଠିଆ ହେବା ବି ତାଙ୍କ ପାଇଁ ସମ୍ଭବ ନୁହେଁ । କିନ୍ତୁ ସେ ଅନ୍ୟ ଉପରେ ନିର୍ଭର ନ କରି ସ୍ବାଭିମାନ ସହ ନିଜେ ପରିବା ବ୍ୟବସାୟ କରି ପରିବାର ଗୁଜୁରାଣ ମେଣ୍ଟାଉଛନ୍ତି । ଅନ୍ୟ ଠାରୁ ଅର୍ଡର ନେଇ ତାଙ୍କ ତିନିଚକିଆ ଟ୍ରାଇ ସାଇକେଲରେରେ ଘରକୁ ଘର ଯାଇ ପନିପରିବା ହୋମ୍ ଡେଲିଭରି କରୁଛନ୍ତି । ହେଲେ ଯାତାୟତ ବେଳେ ବିଭିନ୍ନ ସମୟରେ ତାଙ୍କ ପାଇଁ ବାଟ ହୁଡ଼ି ଥାଏ ଗାଁର ଶୋଚନୀୟ ରାସ୍ତା। ଖାଲ ଖମାରେ ଭରା ଜୋରପଡ଼ାଠାରୁ କେରମୁଣ୍ଡା ରାସ୍ତାରେ ଯିବା ଆସିବା ବେଳେ ଅନେକ ଥର ଟାଇସାଇକେଲରୁ ପଡ଼ି ଖଣ୍ଡିଆଖାବର ହୋଇଛନ୍ତି।
ଏହି ସମୟରେ ତାଙ୍କ ପନିପରିବା ବି ରାସ୍ତାରେ ପଡି ନଷ୍ଟ ହୋଇଥାଏ। ଏହି ସମସ୍ୟା ନେଇ ଅନେକ ଥର ପ୍ରଶାସନଠୁ ଆରମ୍ଭ କରି ସ୍ଥାନୀୟ ନେତାଙ୍କୁ ଗୁହାରି କରିଥିଲେ ମଧ୍ୟ କିଛି ସୁଫଳ ମିଳି ନାହିଁ । ଗୁରୁବାର ଉକ୍ତ ରାସ୍ତାରେ ସେ ଯାଉଥିବାବେଳେ ପୁଣି ଟ୍ରାଇସାଇକେଲରୁ ପଡି ଖଣ୍ଡିଆଖାବରା ହୋଇଥିଲେ। ପରେ ସେ କାହାକୁ ଅପେକ୍ଷା ନ କରି ନିଜ ଟ୍ରାଇସାଇକେଲକୁ ରାସ୍ତା କଡ଼ ର ରଖି ନିଜେ ରାସ୍ତା ମରାମତି କରୁଥିବା ଭଡିଓ ଭାଇରଲ ହୋଇଛି ।
