ଯାଜପୁର ରୋଡ,୧୯ା୮(ଡି.ଏନ.ଏ.): ଯାଜପୁର ଜିଲାର ଖାଲି ଗ୍ରାମାଞ୍ଚଳ ନୁହେଁ ସହରାଞ୍ଚଳରେ ବି ପାନୀୟ ଜଳ ସମସ୍ୟା ଲାଗି ରହିଛି। ବିଶେଷକରି କଳିଙ୍ଗନଗର ଶିଳ୍ପାଞ୍ଚଳର ମୁଖଶାଳା ଭାବେ ପରିଚିତ ବ୍ୟାସନଗର ସହରବାସୀଙ୍କୁ ନିୟମିତ ଭାବେ ଗୋଳିଆ ପାଣି ଯୋଗାଣ ହେଉଛି। ଜଳଯୋଗାଣ ଦାୟିତ୍ୱରେ ଥିବା ୱାଟକୋ (ୱାଟର କାର୍ପୋରେଶନ ଅଫ୍ ଓଡ଼ିଶା) କର୍ତ୍ତୃପକ୍ଷଙ୍କ ଏଭଳି କାର୍ଯ୍ୟ ଲୋକଙ୍କ ଜୀବନକୁ ବିପଦରେ ପକାଉଛି ବୋଲି ମତପ୍ରକାଶ ପାଇଛି। ଗରିବ ସାଧାରଣ ଲୋକ ସେହି ପାଣି ପିଇ ଝାଡାବାନ୍ତି ରୋଗରେ ଆକ୍ରାନ୍ତ ହୋଇ ମୃତ୍ୟୁମୁଖରେ ପଡିବା ଆଶଙ୍କା ସୃଷ୍ଟି କରିଛି। ଏନେଇ ଅଞ୍ଚଳବାସୀଙ୍କ ପକ୍ଷରୁ ଯେତେ ଅଭିଯୋଗ ହେଉଥିଲେ ହେଁ ୱାଟକୋ କର୍ତ୍ତୃପକ୍ଷଙ୍କ ମାନବିକତାରେ କୌଣସି ପରିବର୍ତ୍ତନ ହେଉନାହିଁ ବୋଲି ଅଭିଯୋଗ ହୋଇଛି।
ଅଗଷ୍ଟ ମାସର ଏଇ ୧୮ ଦିନ ମଧ୍ୟରେ ପ୍ରାୟ ୧୦ ଦିନ ଗୋଳିଆ ପାଣି ଯୋଗାଣ ହେଉଥିବା ସହରବାସୀ ପ୍ରକାଶ କରିଛନ୍ତି। ଗୁରୁବାର ସକାଳୁ ସହରର କୋପଣ୍ଡ, ମୁଣ୍ଡୋମାଳ ମହତାବନଗର ଆଦି ଅଞ୍ଚଳରେ ଧୂସର ରଙ୍ଗର ପାଣି ବାହାରୁଥିବା ଦେଖିବାକୁ ମିଳିଥିଲା। ଏ ସଂକ୍ରାନ୍ତରେ ୱାଟ୍କୋର ବ୍ୟାସନଗର କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବା ପରେ ଗତାନୁଗତିକ ଭାବେ ସମସ୍ୟାର ସମାଧାନ ହେବ ବୋଲି ତାଙ୍କ ମୁହଁରୁ ଶୁଣିବାକୁ ମିଳିଥିଲା। ଏପରିକି ହ୍ବାଟ୍ସଆପ ଯୋଗେ ୱାଟ୍କୋର ଜେନେରାଲ ମ୍ୟାନେଜର ଦେବବ୍ରତ ମହାନ୍ତିଙ୍କୁ କାଦୁଅ ମିଶା ପାଣିର ଫଟୋ ଚିତ୍ର ପଠାଇ ତୁରନ୍ତ ସ୍ଥାୟୀ ସମାଧାନ କରିବାକୁ ଅନୁରୋଧ କରାଯାଇଥିଲା। ନିମ୍ନମାନର ପାଇପ ଏବଂ ନିର୍ମାଣ ସାମଗ୍ରୀ ବ୍ୟବହାର କରି ୱାଟ୍କୋ କର୍ତ୍ତୃପକ୍ଷ ମରାମତି ଓ ରକ୍ଷଣାବେକ୍ଷଣ ନାମରେ ଆସୁଥିବା ଅନୁଦାନର ସିଂହଭାଗ ଅର୍ଥ ଆତ୍ମସାତ୍ କରୁଥିବାରୁ ଏଭଳି ପରିସ୍ଥିତି ସୃଷ୍ଟି ହେଉଛି ବୋଲି ସାଧାରଣରେ ଅଭିଯୋଗ ହେଉଛି। ବ୍ୟାସନଗର ପୌରାଞ୍ଚଳରେ ଅର୍ବାନ ଇନଫ୍ରାଷ୍ଟ୍ରକ୍ଚର ଡେଭଲପମେଣ୍ଟ ଫର ସ୍ମଲ ଆଣ୍ଡ ମିଡିୟମ ଟାଉନ (ୟୁଆଇଡିଏସଏମଟି) ଯୋଜନାରେ ୧୪.୫୧କୋଟି ଟଙ୍କା ବ୍ୟୟ ଅଟ୍ଟକଳରେ ଖରସ୍ରୋତା-ମୁଣ୍ଡମାଳା ଟ୍ରିଟମେଣ୍ଟ ପ୍ଲାଣ୍ଟ ହୋଇଛି। ଏହି ପ୍ଲାଣ୍ଟ ଜରିଆରେ ପୌାଞ୍ଚଳର ୨୬ଟି ଜଳଯୋଗାଣ ହେଉଥିବା ବିଭାଗ ପକ୍ଷରୁ ଦାବି କରାଯାଉଛି। ହେଲେ ବାସ୍ତବରେ କହ୍ନେଇପୁର, ଚାନ୍ଦମା, କାଚହୁଡିସାହି, ଡାହିସାହି, ରମ୍ପାସ, ସାତକାଣିଆଁ, ସୋବରା, ଡିଗିସାହି, ଧବଳଗିରି ଆଦି ୱାର୍ଡବାସୀ ଏହି ଯୋଜନାରୁ ଏବେ ବି ପାଣି ଅପେକ୍ଷାରେ ରହିଛନ୍ତି। ଅନ୍ୟପକ୍ଷେ ଜଳଯୋଗାଣ ହେଉଥିଲେ ହେଁ କାଦୁଅ ପାଣି ଯୋଗାଣ ସହରବାସୀଙ୍କ ଅତିଷ୍ଠ କରିଛି। ଏ ସଂକ୍ରାନ୍ତରେ ୱାଟ୍କୋର ବ୍ୟାସନଗର କନିଷ୍ଠ ଯନ୍ତ୍ରୀ ପୁହାଣ ବାବୁଙ୍କୁ ପଚାରିବାରୁ ସେ କହିଛନ୍ତି, କୋପଣ୍ଡ ଓ ଗୋଶାଳା ନିକଟରେ କୋଉଁଠି ତ୍ରୁଟି ରହିଛି। ଏହାର ସ୍ଥାୟୀ ସମାଧାନ କରିବାକୁ ପଦକ୍ଷେପ ନିଆଯାଇଛି।
