କୋଲକାତା,୧୪।୬: ୧୫ ବର୍ଷ ଧରି ପଶ୍ଚିମବଙ୍ଗରେ ଶାସନ କରିଥିବା ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବେ ତାଙ୍କ ଦଳ ତୃଣମୂଳ କଂଗ୍ରେସକୁ ହରାଉଥିବା ଜଣାପଡ଼ିଛି। ୨୦ ରୁ ଅଧିକ ଟିଏମସି ଏମପି ଦଳ ଛାଡିବାକୁ ଯାଉଛନ୍ତି ଏବଂ ଭାରତୀୟ ଜନତା ପାର୍ଟି ନେତୃତ୍ୱାଧୀନ ଜାତୀୟ ଗଣତାନ୍ତ୍ରିକ ମେଣ୍ଟ (ଏନଡିଏ)ରେ ଯୋଗଦେବା ବିଷୟରେ ଆଲୋଚନା କରୁଛନ୍ତି। ବିଦ୍ରୋହୀ ଟିଏମସି ଏମପିମାନେ ରବିବାର (୧୪ ଜୁନ, ୨୦୨୬) କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବଙ୍କ ବାସଭବନରେ ଏକ ବୈଠକ କରିଥିଲେ। ଏହା ପରେ, ବିଦ୍ରୋହୀ ଟିଏମସି ଏମପିଙ୍କ ମଧ୍ୟରୁ ଜଣେ କାକୋଲି ଘୋଷ ଦସ୍ତିଦାର କହିଛନ୍ତି ଯେ ସେମାନେ ଆସନ୍ତାକାଲି (ସୋମବାର, ୧୫ ଜୁନ, ୨୦୨୬) ଲୋକ ସଭା ବାଚସ୍ପତି ଓମ ର୍ବିଲାଙ୍କୁ ଭେଟି ଏକ ପୃଥକ ଦଳ ଭାବରେ ମାନ୍ୟତା ଦାବି କରିବେ।
କେନ୍ଦ୍ର ମନ୍ତ୍ରୀ ଭୂପେନ୍ଦ୍ର ଯାଦବଙ୍କ ବାସଭବନରେ ଅନୁଷ୍ଠିତ ବୈଠକରେ ଚାରିରୁ ପନ୍ଦର ବିଦ୍ରୋହୀ ତୃଣମୂଳ କଂଗ୍ରେସ (ଟିଏମସି) ଏମପି ଉପସ୍ଥିତ ଥିବା ଜଣାପଡ଼ିଛି। ଏଥିରେ ଏମପି କାକୋଲି ଘୋଷ ଦସ୍ତିଦାର, ସାୟୋନି ଘୋଷ, ମାଲା ରାୟ, ଶତାବ୍ଦୀ ରାୟ, ଶର୍ମିଳା ସରକାର, ପ୍ରସୁନ ବାନାର୍ଜୀ, ସୁଦୀପ ବନ୍ଦୋପାଧ୍ୟାୟ, ଅରୂପ ଚକ୍ରବର୍ତ୍ତୀ, ପାର୍ଥ ଭୌମିକ, ଜଗଦୀଶ ବାସୁନିଆ ଏବଂ ଆହୁରି ଅନେକଙ୍କ ନାମ ଅନ୍ତର୍ଭୁକ୍ତ।
ଟିଏମସି ମୁଖ୍ୟ ମମତା ବାନାର୍ଜୀଙ୍କ ନିକଟତର ବୋଲି ବିବେଚନା କରାଯାଉଥିବା ଏମପି କାକୋଲି ଘୋଷ ଦସ୍ତିଦାର ଏବେ ବିଦ୍ରୋହୀ ଏମପିଙ୍କ ଗୋଷ୍ଠୀ ନେତା ହୋଇଛନ୍ତି। କେନ୍ଦ୍ରମନ୍ତ୍ରୀ ଭୂପେନ୍ଦ୍ର ଯାଦବଙ୍କ ସହ ସାକ୍ଷାତ ପରେ ସେ କହିଛନ୍ତି ଯେ ତାଙ୍କ ସହିତ ଏବେ ମୋଟ ୨୨ ଜଣ ଏମପି ଅଛନ୍ତି। ପୂର୍ବରୁ ସେ ୨୦ ଜଣ ଏମପିଙ୍କ ସମର୍ଥନ ଦାବି କରିଥିଲେ।
ତଥାପି, ସେ ଗୋଷ୍ଠୀରେ ଯୋଗ ଦେଇଥିବା ଦୁଇ ନୂତନ ଏମପିଙ୍କ ନାମ ପ୍ରକାଶ କରିନାହାଁନ୍ତି। ସେ କହିଛନ୍ତି ଯେ ସେମାନେ ଆନୁଷ୍ଠାନିକ ଭାବରେ ଯୋଗ ଦେବା ପରେ ହିଁ ସେମାନଙ୍କ ନାମ ସାର୍ବଜନୀନ କରାଯିବ।
