ରାଉରକେଲା,୨୦।୮(ବିପ୍ଳବ ରଞ୍ଜନ ଦାଶ)ରାଉରକେଲାର ଶ୍ରଦ୍ଧା ଶିକ୍ଷାନୁଷ୍ଠାନର ଦିବ୍ୟାଙ୍ଗ ପିଲାଙ୍କ କଳାମତ୍କ ପ୍ରତିଭା ସହରସାରା ଚର୍ଚ୍ଚାର ବିଷୟ ହୋଇଛି। ସପ୍ତାହେ ନୁହେଁ ମାସେ ବ୍ୟାପି ଶିକ୍ଷାନୁଷ୍ଠାନର ଭିନ୍ନକ୍ଷମ ପିଲାମାନେ ନିଜ ପ୍ରତିଭା ବଳରେ ସୂତା, ମାଳି, ଷ୍ଟୋନ ଆଦି ବ୍ୟବହାର କରି ଆକର୍ଷଣୀୟ ରାଖୀ ତିଆରି କରିଛନ୍ତି। ଏହି ଶିକ୍ଷାନୁଷ୍ଠାନରେ ସମୁଦାୟ ୪୫ଜଣ ଦିବ୍ୟାଙ୍ଗ ପିଲା ଅଧ୍ୟୟନରତ। ଏହି ପିଲାମାନେ ଜନ୍ମରୁ ଶାରୀରିକ ଏବଂ ମାନସିକ ସ୍ତରରେ ଦୁର୍ବଳ। ତଥାପି ନିଜ ଅନ୍ତର୍ନିହିତ ପ୍ରତିଭା ବଳରେ ୨୦ରୁ ଊର୍ଦ୍ଧ୍ୱ ଦିବ୍ୟାଙ୍ଗ ସମସ୍ତଙ୍କ ନିକଟକୁ ପହଞ୍ଚତ୍ପାରିଛନ୍ତି। ସେମାନେ କେବଳ ରାଖୀ ତିଆରି କରନ୍ତି ନାହିଁ ବରଂ ସମସ୍ତଙ୍କ ହାତରେ ରାଖୀ ବାନ୍ଧି ଆମତ୍ୀୟତାର ବାର୍ତ୍ତା ଦେଇ ଆସୁଛନ୍ତି।
ଆସନ୍ତା ରାଖୀ ପୂର୍ଣ୍ଣିମାକୁ ଦୃଷ୍ଟିରେ ରଖି ଦିବ୍ୟାଙ୍ଗ ପିଲାମାନେ ସୁତା, ମାଳି, ଚୁମକୀ, ଅଠା ଓ ରଙ୍ଗବେରଙ୍ଗ କାଗଜ ଆଦି ସାମଗ୍ରୀ ଆଣି ରାଖୀ ତିଆରି କରୁଛନ୍ତି। ଏସବୁ ତିଆରି ପାଇଁ ସେମାନଙ୍କୁ ୫/୭ଦିନ ସମୟ ଲାଗୁଛି। ବର୍ତ୍ତମାନ ପିଲାଙ୍କ ହାତ ତିଆରି ରାଖୀ ସହରର ଦୋକାନ ବଜାରରେ ଉପଲବ୍ଧ। ପ୍ରତ୍ୟେକ ରାଖୀର ମୂଲ୍ୟ ୧୦ରୁ ୪୦ଟଙ୍କା ରହିଛି। ମାତ୍ର ଏହି ଦିବ୍ୟାଙ୍ଗ ଭିନ୍ନକ୍ଷମ ପିଲାମାନଙ୍କ ପ୍ରତିଭାକୁ ଦେଖି ଲୋକେ ଅଧିକ ଦରରେ ରାଖୀ କିଣିବାକୁ ମଧ୍ୟ ପଛାଉ ନାହାନ୍ତି। ସେହିପରି ରାଖୀ ତିଆରି କରି ଅନ୍ୟମାନଙ୍କ ହାତରେ ବାନ୍ଧି ସହରବାସୀଙ୍କୁ ଏକତା ସୂତ୍ରରେ ବାନ୍ଧି ରଖିବା ସେମାନଙ୍କ ମୂଳ ଉଦ୍ଦେଶ୍ୟ। ଏହି ପିଲାମାନେ ଗୀତ, ନୃତ୍ୟ, ଚିତ୍ରାଙ୍କନ ଓ ପାଠ୍ୟକ୍ରମରେ ମଧ୍ୟ କୃତିତ୍ୱ ଲାଭ କରିଛନ୍ତି। ଶିକ୍ଷାନୁଷ୍ଠାନର ଦିବ୍ୟାଙ୍ଗ ପିଲାମାନଙ୍କୁ ସବୁ କ୍ଷେତ୍ରରେ ନିପୁଣ କରିବା ସହ ରାଖୀ ପ୍ରସ୍ତୁତିରେ ମାର୍ଗଦର୍ଶନ ଦେଇଛନ୍ତି ଅନୁଷ୍ଠାନର ଶିକ୍ଷୟିତ୍ରୀ ଅଳୀ ମହାରଣା ଓ ସୁଜାତା ରାଉତ। ପ୍ରକାଶଥାଉକି ଶ୍ରଦ୍ଧା ଶିକ୍ଷାନୁଷ୍ଠାନର ସମସ୍ତ ଦିବ୍ୟାଙ୍ଗ ବିଦ୍ୟାର୍ଥୀ ସମସ୍ତ ପର୍ବ ପର୍ବାଣୀ ପାଳନ କରନ୍ତି ଏବଂ ପର୍ବପର୍ବାଣୀର ମୂଳ ଉଦ୍ଦେଶ୍ୟକୁ ନିଜ ପ୍ରତିଭା ମାଧ୍ୟମରେ ସର୍ବସମ୍ମୁଖରେ ଉଜାଗର କରନ୍ତି। ପିଲାମାନଙ୍କ ପ୍ରତିଭା ଏବଂ ଦକ୍ଷତା ନିଶ୍ଚିତ ଭାବେ ଅନ୍ୟମାନଙ୍କ ପାଇଁ ପ୍ରେରଣା ସାଜିବ ବୋଲି ଶିକ୍ଷାନୁଷ୍ଠାନର ପ୍ରୀତି ବାରିକ ଏବଂ ପ୍ରଭାତୀ ପ୍ରଧାନ କହିଛନ୍ତି।
