ଡାଇବେଟିସ ବା ମଧୁମେହକୁ ନୀରବ ଘାତକ ଭାବରେ ବିବେଚନା କରାଯାଏ। କାରଣ ଏହାଦ୍ୱାରା ଶରୀରର ଅଧିକାଂଶ ଅଙ୍ଗ ଆକ୍ରାନ୍ତ ହୋଇଥାଏ, ଯାହାଫଳରେ ପରବର୍ତ୍ତୀ ସମୟରେ ରୋଗୀ ବିଭିନ୍ନ ସ୍ବାସ୍ଥ୍ୟ ସମସ୍ୟାର ସମ୍ମୁଖୀନ ହୁଏ। ବିଶେଷଭାବରେ ଡାଇବେଟିସ୍ ଅସନ୍ତୁଳିତ ରହିଲେ ତାହାର ପ୍ରଭାବ ମୁଖ୍ୟତଃ ହୃତ୍ପିଣ୍ଡ (ହାର୍ଟ), କିଡ୍ନୀ ଏବଂ ଚକ୍ଷୁ ଉପରେ ପଡିଥାଏ। ଏହାଦ୍ୱାରା ଚକ୍ଷୁ ଆକ୍ରାନ୍ତ ହେଲେ ରେଟିନାରେ ଥିବା ଶିରା ପ୍ରଶିରା ପ୍ରଭାବିତ ହୁଏ। ଡାଇବେଟିସ ଅଧିକ ବଢ଼ିଗଲେ ଶିରା ଫାଟି ସେଥିରୁ ରକ୍ତ କ୍ଷରଣ ହୁଏ। ଫଳରେ ଏହାର ପ୍ରଭାବ ଦୃଷ୍ଟିଶକ୍ତି ଉପରେ ପଡିଥାଏ। ଡାଇବେଟିସ୍ ଦ୍ୱାରା ଆଖି ଆକ୍ରାନ୍ତ ହେଲେ ତାହା ହଠାତ୍ ଜଣାପଡି ନ ଥାଏ। ଦୃଷ୍ଟିଶକ୍ତି ଜନିତ ସମସ୍ୟା ଅଧିକ ବଢ଼ିଗଲେ ପରୀକ୍ଷା ସମୟରେ ଆଖି ଭିତରେ ସୃଷ୍ଟି ହୋଇଥିବା ଗୁରୁତର ସମସ୍ୟା ବିଷୟରେ ଡାକ୍ତର ଜାଣିପାରନ୍ତି। ସେହି ସମୟରେ ଚକ୍ଷୁ ସମସ୍ୟାର ଅବସ୍ଥାକୁ ଅନୁଧ୍ୟାନ କରି ଚକ୍ଷୁ ବିଶେଷଜ୍ଞ ସଂପୃକ୍ତ ବ୍ୟକ୍ତିଙ୍କର ଚିକିତ୍ସା କରିଥାଆନ୍ତି। ବେଳେବେଳେ ଅବହେଳା କାରଣରୁ ରୋଗୀକୁ ଦୃଷ୍ଟିଶକ୍ତି ହରାଇବା ପରି ସମସ୍ୟାର ସମ୍ମୁଖୀନ ହେବାକୁ ପଡିଥାଏ। ତେଣୁ ଯଦି ଆପଣ ଡାଇବେଟିସ୍ ଦ୍ୱାରା ଆକ୍ରାନ୍ତ, ତେବେ ନିୟମିତ ସମୟ ଅନ୍ତରାଳରେ ଚକ୍ଷୁ ସହ ସ୍ବାସ୍ଥ୍ୟ ପରୀକ୍ଷା କରାଇ ନେବାକୁ ଭୁଲନ୍ତୁ ନାହିଁ।
