ନୂଆଦିଲ୍ଲୀ, ୨୯ା୬ (ପି.ଟି.)-ଭାରତର ପୂର୍ବତନ ପେସ୍ ବୋଲର ଇର୍ଫାନ ପଠାନ ବିଶ୍ୱକପ୍ ବିଜୟୀ ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ଉପରେ ଏକ ନୂଆ କଥା କହିଛନ୍ତି। ସେ କହିଛନ୍ତି ୨୦୦୭ରେ ଧୋନୀ ଅଧିନାୟକ ଦାୟିତ୍ୱ ଗ୍ରହଣ କରିବା ପରେ ସେ ତାଙ୍କ ବୋଲରଙ୍କୁ ନିଜ ନିୟନ୍ତ୍ରଣରେ ରଖିଥିଲେ। କିନ୍ତୁ ପରେ ୨୦୧୩ ବେଳକୁ ସେମାନଙ୍କ ଉପରେ ଭରସା ରଖିବା ଆରମ୍ଭ କରିଥିଲେ। ୩୫ ବର୍ଷୀୟ ପଠାନ ଧୋନୀଙ୍କ ଅଧୀନରେ ୨୦୦୭ ବିଶ୍ୱକପ୍ ବିଜୟୀ ଏବଂ ୨୦୧୩ ଚାମ୍ପିୟନ୍ସ ଟ୍ରଫି ଜିତିଥିବା ଦଳର ଅନ୍ୟତମ ସଦସ୍ୟ ଥିଲେ। ଏହି ଦୁଇଟି ଟୁର୍ନାମେଣ୍ଟରେ ଟିମ୍ର ବୈଠକ ମାତ୍ର ୫ ମିନିଟ ସମୟରେ ସୀମିତ ରହିଥିଲା ବୋଲି ଚଳିତ ବର୍ଷ ଆରମ୍ଭରେ କ୍ରିକେଟର ସମସ୍ତ ଫର୍ମାଟରୁ ଅବସର ନେଇଥିବା ଏହି ବୋଲର ଏକ ସାକ୍ଷାତ୍କାରରେ ପ୍ରକାଶ କରିଛନ୍ତି। ଧୋନୀଙ୍କ ମଧ୍ୟରେ କ’ଣ ଏକ ପରିବର୍ତ୍ତନ ସେ ଦେଖିବାକୁ ପାଇଛନ୍ତି ବୋଲି ପଚରାଯିବାରେ ପଠାନ କହିଥିଲେ, ଯୁବ ମହେନ୍ଦ୍ର ସିଂ ଧୋନୀ ୨୦୦୭ରେ ଅଧିନାୟକ ଦାୟିତ୍ୱ ଗ୍ରହଣ କରିଥିଲେ। ସେତେବେଳେ ଉଇକେଟ-କିପିଂ ଏଣ୍ଡ୍ରୁ ଉତ୍ସାହ ଓ ଉଦ୍ଦୀପନାର ସହ ଦୌଡ଼ି ଆସି ବୋଲରମାନଙ୍କୁ ନିୟନ୍ତ୍ରଣ କରିବାକୁ ଚେଷ୍ଟା କରୁଥିଲେ। ମାତ୍ର ୨୦୧୩ ବେଳକୁ ସେ ବୋଲରମାନଙ୍କୁ ନିୟନ୍ତ୍ରଣ ନ କରି ସେମାନଙ୍କ ସାମର୍ଥ୍ୟ ଉପରେ ଭରସା ରଖିବା ଆରମ୍ଭ କରିଥିଲେ। ସେ ନିଜେ ମଧ୍ୟ ଧୀରସ୍ଥିର ଏବଂ ଶାନ୍ତ ସ୍ବଭାବର ହୋଇଯାଇଥିଲେ। ମ୍ୟାଚ ଜିତିବା ଲାଗି ଗୁରୁତ୍ୱପୂର୍ଣ୍ଣ ମୁହୂର୍ତ୍ତରେ ସେ ସ୍ପିନରମାନଙ୍କୁ ବୋଲିଂରେ ଲଗାଉଥିଲେ। ସୂଚନାଯୋଗ୍ୟ, ଗତବର୍ଷ ଅନ୍ତର୍ଜାତୀୟ ଦିନିକିଆ ବିଶ୍ୱକପ୍ ସେମିଫାଇନାଲରୁ ଭାରତର ବିଦାୟ ପରେ ଧୋନୀ କ୍ରିକେଟରୁ ଦୂରେଇ ରହିଛନ୍ତି। ତାଙ୍କୁ ବର୍ତ୍ତମାନ ୩୮ବର୍ଷ ବୟସ। ଆଇସିସିର ସମସ୍ତ ଟ୍ରଫି ଜିତିବାରେ ସେ ହେଉଛନ୍ତି ଏକ ମାତ୍ର ଅଧିନାୟକ।
