ଥୁଆମୂଳ ରାମପୁର,୨୮।୬(ଦୁର୍ଗା କୀର୍ତ୍ତି): କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ଅଧୀନ ବିରିକୋଟ ଗ୍ରାମପଞ୍ଚାୟତର ଉପାନ୍ତ ତୁମୋନିଖୋଲ ଗ୍ରାମର ବିଭିନ୍ନ ମୌଳିକ ସମସ୍ୟାକୁ ନେଇ ‘ଧରିତ୍ରୀ’ ଖବରକାଗଜରେ ଲଗାତାର ଖବର ପ୍ରକାଶ ପାଇଥିଲା । ଏହାପରେ ବ୍ଲକ୍ ପ୍ରଶାସନର ତତ୍ପରତା ଦେଖାଯାଇଛି । ରାସ୍ତା, ପାନୀୟ ଜଳ, ବିଜୁଳି, ସ୍ବାସ୍ଥ୍ୟ, ଶିକ୍ଷା, ଆବାସ ଯୋଜନା, ବାର୍ଦ୍ଧକ୍ୟ ଭତ୍ତା ଏବଂ ବସୁଧା ଯୋଜନାରେ ଦୁର୍ନୀତି ଭଳି ସମସ୍ୟା ଉପରେ ପର୍ଦ୍ଦାଫାଶ ହେବାର ମାତ୍ର ୧୩ ଦିନ ମଧ୍ୟରେ ପ୍ରଶାସନିକ ଟିମ୍ ଗାଁରେ ପହଞ୍ଚିଛନ୍ତି। ବ୍ଲକ ଅଧ୍ୟକ୍ଷ ଦୟାନିଧି ମାଝୀଙ୍କ ନିର୍ଦ୍ଦେଶ କ୍ରମେ ବିଡିଓ ଧ୍ରୁବ ଚରଣ ମୁଦୁଲି ଓ ତାଙ୍କ ସହକର୍ମୀମାନେ ପ୍ରାୟ ୩ ରୁ ୪ କିଲୋମିଟର ପାହାଡ଼ିଆ ବିପଦସଙ୍କୁଳ ରାସ୍ତାରେ ଚାଲି ଚାଲି ଗ୍ରାମରେ ପହଞ୍ଚି ଗ୍ରାମବାସୀଙ୍କ ସହ ସମସ୍ୟାର ସମାଧାନ ବାବଦରେ ବିସ୍ତୃତ ଆଲୋଚନା କରିଛନ୍ତି।
ସ୍ୱାଧୀନତାର ଦୀର୍ଘ ବର୍ଷ ପରେ ବି ଏହି ଗ୍ରାମବାସୀମାନେ ଜଙ୍ଗଲରୁ କାଠ ସଂଗ୍ରହ କରି ଜୀବିକା ନିର୍ବାହ କରୁଥିବା ବେଳେ ଝରଣାର ଦୂଷିତ ଜଳ ଉପରେ ନିର୍ଭର କରୁଥିଲେ। ଗ୍ରାମର ବିଦ୍ୟାଳୟ ଟିଣ ଛପର ଉଡ଼ିଯାଇଥିବା ବେଳେ ଅଙ୍ଗନବାଡ଼ି କେନ୍ଦ୍ରକୁ କର୍ମୀ ଓ ସହାୟିକା ନିୟମିତ ଆସୁ ନଥିବା ଏବଂ ପିଲାଙ୍କୁ ପୁଷ୍ଟିକର ଖାଦ୍ୟ ମିଳୁ ନଥିବା ନେଇ ଗ୍ରାମବାସୀ ଅଭିଯୋଗ କରିଥିଲେ। ଧରିତ୍ରୀରେ ଏହି ଖବର ପ୍ରସାରଣ ପରେ ବିଡିଓଙ୍କ ନିର୍ଦ୍ଦେଶରେ ବିଦ୍ୟାଳୟ ମରାମତି କାମ ଆରମ୍ଭ ହୋଇଛି ଏବଂ ପ୍ରାଥମିକତା ଭିତ୍ତିରେ ଏକ ପାନୀୟ ଜଳ ଟ୍ୟାଙ୍କ ସ୍ଥାପନ କରାଯାଇ ଲୋକଙ୍କୁ ଜଳ ଯୋଗାଇ ଦିଆଯାଉଛି। ଗମନାଗମନ ସମସ୍ୟାର ସ୍ଥାୟୀ ସମାଧାନ ପାଇଁ ବିରିକୋଟ ଠାରୁ ତୁମୋନିଖୋଲ ପର୍ଯ୍ୟନ୍ତ ମୁଖ୍ୟମନ୍ତ୍ରୀ ସଡ଼କ ଯୋଜନା ଅଧୀନରେ ଆନୁମାନିକ ୫୦୪.୨୦ ରୁ ୮୨୮.୭୯ ବ୍ୟୟ ଅଟକଳରେ ଏକ ବିଜ୍ଞପ୍ତି ପ୍ରକାଶ ପାଇ ପ୍ରଥମ ଶ୍ରେଣୀ ଠିକାଦାରଙ୍କୁ ଦିଆଯାଇଛି।
ଏଥିସହିତ ଆଗାମୀ ଦଶହରା ସୁଦ୍ଧା ଗ୍ରାମକୁ ବିଜୁଳି ସଂଯୋଗ ମିଳିବ ବୋଲି ଆଶା କରାଯାଉଛି। ଏହି ଗସ୍ତ ସମୟରେ ଗୋଷ୍ଠୀ ଉନ୍ନୟନ ଅଧିକାରୀଙ୍କ ସହ ବ୍ଲକ ସାମାଜିକ ସୁରକ୍ଷା ଅଧିକାରୀ ସୁନାରାମ ସୋରେନ, ଗ୍ରାମପଞ୍ଚାୟତ ଉନ୍ନୟନ ଅଧିକାରୀ ବାଲେଶ୍ୱର ନାୟକ, ବ୍ଲକ ପ୍ରୋଗ୍ରାମ ସଂଯୋଜକ ରାଜେନ୍ଦ୍ର ନାରାୟଣ ଦେବ, ପଞ୍ଚାୟତ ନିର୍ବାହୀ ଅଧିକାରୀ ଶୁଭଙ୍କର ସବର ଏବଂ ଏଡିଇଓ ତୃପ୍ତି ରଞ୍ଜନ ଅଧିକାରୀ ପ୍ରମୁଖ ଉପସ୍ଥିତ ଥିଲେ। ଗ୍ରାମରେ ପ୍ରଧାନମନ୍ତ୍ରୀ ଆବାସ ଯୋଜନା ଅଧୀନରେ ସମସ୍ତ ପରିବାରର ଘର ସର୍ଭେ କରାଯିବା ସହ ରାଶନ ସେବାକୁ ବନ୍ଧକନା ଗ୍ରାମକୁ ସ୍ଥାନାନ୍ତର କରାଯିବ। ଏହା ସହିତ ତୁରନ୍ତ ଗୋଟିଏ କୂଅ ନିର୍ମାଣ ଏବଂ ସୁଭଦ୍ରା ଯୋଜନା, ରାଶନ କାର୍ଡ ଓ ଭତ୍ତାରୁ ବଞ୍ଚିତ ହିତାଧିକାରୀଙ୍କ କାଗଜପତ୍ର ପଞ୍ଚାୟତ ନିର୍ବାହୀ ଅଧିକାରୀ ଏବଂ ଗ୍ରାମ ରୋଜଗାର ସେବକ ତୁରନ୍ତ ପ୍ରସ୍ତୁତ କରିବେ ବୋଲି ପ୍ରଶାସନ ପକ୍ଷରୁ ସୂଚନା ଦିଆଯାଇଛି। ଧରିତ୍ରୀର ଏହି ନିର୍ଭୀକ ଉପସ୍ଥାପନା ଏବଂ ପ୍ରଶାସନର ତ୍ବରିତ ପଦକ୍ଷେପକୁ ସ୍ଥାନୀୟ ଅଞ୍ଚଳରେ ବେଶ୍ ପ୍ରଶଂସା କରାଯାଇଛି।
