ସୋରଡା,୩।୧(ଡି.ଏନ.ଏ.): ଜାତୀୟ ରାଜପଥ ୫୯ ସୋରଡା ସହର ମଧ୍ୟକୁ ସଂଯୋଗ କରୁଥିବା ଜରଉ ବ୍ରିଜ ପ୍ରାରମ୍ଭରେ ୭ ଫୁଟ ଲମ୍ବ ଓ ୨ ଫୁଟ ଓସାରରେ ସିମେଣ୍ଟ ବାହାରି ଗାତ ହୋଇଥିଲା। ଏହା ସହ ବାହାରକୁ ଲୁହା ରଡ ବାହାରି ପଡିଥିବା ବେଳେ ଗାଡି ଯାତାୟାତରେ ସମସ୍ୟା ସୃଷ୍ଟି ହେଉଥିଲା। ତେବେ ମଙ୍ଗଳବାର ଧରିତ୍ରୀରେ ଏହି ଖବର ପ୍ରକସ ପରେ ମଧ୍ୟାର୍ହ୍ନରେ ଉକ୍ତ ରାସ୍ତାର ଗର୍ତ୍ତ ପୋତାଯାଇ ନୂଆ ରାସ୍ତା ନିର୍ମାଣ କରାଯାଇଥିଲା । ରାସ୍ତାର ଉଭୟ ପାଶର୍ବକୁ ସମ୍ପୁର୍ଣ୍ଣ ସଫା ମଧ୍ୟ କରିଦିଆଯାଇଛି ।
ସୂଚନାଯୋଗ୍ୟ, ଏହି ରାସ୍ତାରେ ପ୍ରତିଦିନ ଦୁର୍ଘଟଣା ଘଟିବାରେ ଲାଗିଛି। ଉକ୍ତ ରାସ୍ତା ଦେଇ ପ୍ରତିଦିନ ହଜାର ହଜାର ଲୋକ ଯାତାୟାତ କରୁଛନ୍ତି। ଏଥିସହ ଶହଶହ ପର୍ଯ୍ୟଟକ ଗାଡି ମଧ୍ୟ ଯାତାୟାତ କରୁଛି। ତେବେ ଉକ୍ତ ବ୍ରିଜ୍ର ମରାମତି ନେଇ ଭୁବନେଶ୍ବର ସୁପରିଟେଣ୍ଡେଣ୍ଟ ଯନ୍ତ୍ରୀ ଏନ୍କେ ନାୟକଙ୍କୁ ଯୋଗଯୋଗ କରାଯାଇଥିବା ବେଳେ ବ୍ରହ୍ମପୁର ଏନଏଚ କାର୍ଯ୍ୟାଳୟକୁ ଜଣାଇବା ସହ ଲିଖିତ ଭାବେ ଅଭିଯୋଗ କରିବାକୁ ସେ କହିଥିଲେ। ଅନ୍ୟପଟେ, ଯଥାଶୀଘ୍ର ସମସ୍ୟା ସମାଧାନ କରାଯିବ ବୋଲି ବ୍ରହ୍ମପୁର କାର୍ଯ୍ୟର୍ନିବାହୀ ଯନ୍ତ୍ରୀ ସତ୍ୟବାନ ପଟେଲଙ୍କୁ ଯୋଗାଯୋଗ କରିବା ପରେ ସେ କହିଥିଲେ।
