ଢେଙ୍କାନାଳ ଅଫିସ, ୯।୧୦: ମଣ୍ଡପରେ ସରିଛି ସାଜସଜ୍ଜା। ଶେଷସ୍ପର୍ଶ ପରେ ଦାଉଦାଉ ହୋଇ ଝଟକୁଛନ୍ତି ମା’ ପଦ୍ମାଳୟାଙ୍କ ମୃଣ୍ମୟୀ ପ୍ରତିମା। ପାରମ୍ପରିକ ନୀତି ଅନୁଯାୟୀ ଜୀବନ୍ୟାସ ପରେ ଧରାବତରଣ କରିବେ ଧନଦାତ୍ରୀ। ଢେଙ୍କାନାଳର ଗଣପର୍ବ ଲକ୍ଷ୍ମୀପୂଜା କୁ ଆଉ ମାତ୍ର କେଇଘଣ୍ଟା ବାକିଥିବାବେଳେ ସେହି ମହାର୍ଘ୍ୟ ବେଳାକୁ ଉତ୍କଣ୍ଠାର ସହ ଅପେକ୍ଷା କରିଛନ୍ତି ଆବାଳ ବୃଦ୍ଧ ବନିତା। ମା’ଙ୍କ ଆବାହନ ପାଇଁ ୩୮ ମଣ୍ଡପରେ ପ୍ରସ୍ତୁତି ଶେଷ ହୋଇଥିବାବେଳେ ଉତ୍ସବମୁଖର ହୋଇଉଠିଛି ପରିବେଶ।
କୁମାର ପୂର୍ଣ୍ଣିମା ଅବସରରେ ରବିବାର ସନ୍ଧ୍ୟାରୁ ଆରମ୍ଭ ହେବ ୧୧ ଦିନାତ୍ମକ ପ୍ରସିଦ୍ଧ ଲକ୍ଷ୍ମୀପୂଜା। ୧୯ ତାରିଖରେ ସିନ୍ଧୁସୂତାଙ୍କୁ ମେଲାଣି ଦେବେ ସହରବାସୀ। ମା’ଙ୍କ ଏହି ପୂଜା ପାଇଁ ସହର ନବବଧୂ ଭଳି ସଜେଇ ହୋଇଛି। ଆଖି ଝଲସାଇ ଦେଉଥିବା ରଙ୍ଗିନ ଆଲୋକମାଳା, ସୁଉଚ୍ଚ ତୋରଣ, ଚିତ୍ତାକର୍ଷକ ସାଜସଜ୍ଜା ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି। ଚଳିତବର୍ଷ ମିନାବଜାର, ଜବାହରଚୌକ, ଲକ୍ଷ୍ମୀବଜାର, ଗଣେଶ ବଜାର, ମହାବୀର ବଜାର, କାଞ୍ଚନ ବଜାର, ଆନନ୍ଦ ବଜାର, କାରିଗର ସାହି, ବାଜିଚୌକ, ଗୋଲ୍ଡେନ୍ ଷ୍ଟ୍ରିଟ୍ ଗୁଡ଼ିଆନାଳୀ, ରାଧାକ୍ରିଷ୍ଣ ବଜାର, ପଦ୍ମ ବଜାର, ଜୁବିଲି ଟାଉନ-୧, କ୍ରିଷ୍ଣା ବଜାର, କୈବଲ୍ୟ ବଜାର, ଦେଉଳସାହି, ମା’ ଅନ୍ନପୂର୍ଣ୍ଣା ଆସ୍ଥାନ ସିମିଳିଆ, ଷ୍ଟେଶନ ବଜାର, କଲେଜ ବଜାର, ଗାନ୍ଧୀ ବଜାର, ଚନ୍ଦନ ବଜାର, ବସଷ୍ଟାଣ୍ଡ, ଦୁର୍ଗାବଜାର, କାଳିକାନଗର, ରାମେଶ୍ୱରପୁର, ନେହେରୁ ବଜାର, ଜୁବିଲି ଟାଉନ-୩, ସ୍ବପ୍ନେଶ୍ୱର ବଜାର କୋରିଅଁା, ଭଗବାନପୁର, ଗୋପବନ୍ଧୁ ବଜାର, ରତନ ବଜାର, ଖମାର ସାହି, ହାଟରୋଡ୍, ଅରବିନ୍ଦ ବଜାର, କଣ୍ଟାନାଳୀ ବାଇପାସ୍, ବନମାଳୀପ୍ରସାଦ, ଜେନାଦେଈ ବଜାର, ନିର୍ମାଲ୍ୟ ବଜାର ପ୍ରତିଷ୍ଠାନ ପକ୍ଷରୁ ଜାକଜମକରେ ପୂଜା ହେଉଛି। ମିନାବଜାର, କୈବଲ୍ୟ ବଜାର, ଗୁଡିଆନାଳୀ, ଗଣେଶ ବଜାର ଏବଂ ଲକ୍ଷ୍ମୀବଜାର ପକ୍ଷରୁ ଚାନ୍ଦିମେଢ଼ରେ ମା’ ଦର୍ଶନ ଦେବେ।
ଚଳିତବର୍ଷ ଲକ୍ଷ୍ମୀବଜାରର ପ୍ଲାଟିନମ୍ ଜୁବିଲି (୭୫ବର୍ଷ ପୂର୍ତ୍ତି) ଉପଲକ୍ଷେ ୧୦ ତାରିଖରୁ ୧୭ ତାରିଖ ପର୍ଯ୍ୟନ୍ତ ସ୍ବତନ୍ତ୍ର କାର୍ଯ୍ୟକ୍ରମ ଆୟୋଜନ କରାଯାଉଛି। ସୋମବାର ସନ୍ଧ୍ୟାରେ ରାଜ୍ୟପାଳ ପ୍ରଫେସର ଗଣେଶୀ ଲାଲ୍ ଏହାକୁ ଉଦ୍ଘାଟନ କରିବାର କାର୍ଯ୍ୟକ୍ରମ ରହିଛି। ସେହିପରି କାଳିକାନଗର ପୂଜା ପ୍ରତିଷ୍ଠାନ ୫୦ବର୍ଷ ପୂର୍ତ୍ତି ଉପଲକ୍ଷେ ୫ଦିନ ବ୍ୟାପୀ ସୁବର୍ଣ୍ଣ ଜୟନ୍ତୀ ଏବଂ ମହିଷାପାଟସ୍ଥିତ ଅରବିନ୍ଦବଜାର ପୂଜା ପ୍ରତିଷ୍ଠାନର ୨୫ବର୍ଷ ପୂରଣ ଅବସରରେ ରୌପ୍ୟ ଜୟନ୍ତୀ ପାଳନ କରୁଛି। ପରମ୍ପରା, ସାମାଜିକ ଓ ପୌରାଣିକ କଥାବସ୍ତୁକୁ ନେଇ ମଣ୍ଡପରେ ହୋଇଥିବା ସାଜସଜ୍ଜା ବେଶ୍ ଚିତ୍ତାକର୍ଷକ ହୋଇଛି।
