ବାଲିଆ,୧୭।୭: ଲଘୁଚାପ ପ୍ରଭାବରେ କିଛିଦିନ ହେବ ଲଗାଣ ବର୍ଷା ଜାରି ରହିଛି। ଫଳରେ ବିରିଡି ବ୍ଲକ ଅନ୍ତର୍ଗତ ୨୨ ମୌଜା କାଉପଡାଠାରୁ ଅଲିପଡା ପର୍ଯ୍ୟନ୍ତ ଦେବୀ ନଦୀ ବନ୍ଧ ମରଣଯନ୍ତା ପାଲଟିଛି। ନଦୀ ବନ୍ଧ ରାସ୍ତାର ବିଭିନ୍ନ ସ୍ଥାନରେ ଗାତ ହୋଇଥିବାରୁ ସେଥିରେ ପାଣି ଜମି ଜନସାଧାରଣଙ୍କ ପାଇଁ ସମସ୍ୟା ସୃଷ୍ଟି ହୋଇଛି। ଜଗତ୍ସିଂହପୁର ଜଳ ସମ୍ପଦ ବିଭାଗର ବିଲୁଆଖାଇ ଉପଖଣ୍ଡ ଶଙ୍ଖାରିସାହି ସେକ୍ସନ୍ ଅଧୀନରେ ଥିବା ଏହି ନଦୀବନ୍ଧ ରାସ୍ତା ପ୍ରତିବର୍ଷ ମରାମତି ହେଉଛି। କେତେବେଳେ ପିଚୁତ କେତେବେଳେ ମୋରମ ପକାଯାଉଛି। ଏନେଇ ଲକ୍ଷାଧିକ ଟଙ୍କା ବ୍ୟୟ କରାଯାଇଛି। ଏହାସତ୍ତ୍ୱେ ରାସ୍ତା ସମସ୍ୟା ଦୂର ହେଉନାହିଁ। ବନ୍ଧ ମରାମତି ବେଳେ ଲାଭଖୋର ମନୋବୃତ୍ତି ଯୋଗୁ ନିମ୍ନମାନର କାର୍ଯ୍ୟ ହେଉଥିବା ନେଇ ସାଧାରଣରେ ଅଭିଯୋଗ ହୋଇଛି। ଏହି ରାସ୍ତାଟି ହାଜିପୁର ଶଙ୍ଖାରି ସାହି ବ୍ରିଜ ଦେଇ ଫୁଲନଖରା ଓ କାକଟପୁର ରାସ୍ତାକୁ ସଂଯୋଗ କରେ। ଉକ୍ତ ବାଟ ଦେଇ ଲୋକେ କମ୍ ସମୟ ମଧ୍ୟରେ ଭୁବନେଶ୍ୱରକୁ ଯାତାୟାତ କରିପାରନ୍ତି। ମାତ୍ର ଏବେ ରାସ୍ତାଟି ଖାଲ ଖମାରେ ପୂରିଯାଇଛି। ବର୍ଷାଦିନେ ଏହି ରାସ୍ତାରେ ଯାନବାହନ ଚଳାଚଳରେ ଅସୁବିଧା ହେଉଛି। ଦୀର୍ଘ ବର୍ଷ ହେବ ଏହି ସମସ୍ୟା ଲାଗି ରହିଥିଲେ ମଧ୍ୟ ଏପର୍ଯ୍ୟନ୍ତ ସ୍ଥାୟୀ ପ୍ରତିକାର ହୋଇପାରି ନାହିଁ। ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି। ଏ ସମ୍ପର୍କରେ ଜଳ ସମ୍ପଦ ବିଭାଗର ଶଙ୍ଖାରି ସାହି ସେକ୍ସନ୍ ଅଧିକାରୀ ସାଗରିକା ବେହେରାଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ ମୋବାଇଲ ଫୋନ ନ ଉଠାଇବାରୁ ପ୍ରତିକ୍ରିୟା ମିଳିପାରିନାହିଁ।
