ରାଉରକେଲା,୩୧ା୮(ବିପ୍ଳବ ରଞ୍ଜନ ଦାଶ)ଆର୍ଡିଏ ପକ୍ଷରୁ ଛେଣ୍ଡ୍ ଅଞ୍ଚଳସ୍ଥିତ ଆର୍ଡିଏ କଲୋନୀଠାରେ ୫ହଜାରରୁ ଊର୍ଦ୍ଧ୍ୱ ରହିବା ପାଇଁ ଗୃହ ଓ ବାଣିଜ୍ୟ ବ୍ୟବସାୟ ନିମେନ୍ତ ଦୋକାନ ଗୃହ ଆବଣ୍ଟିତ ହୋଇଛି। ଗୃହ ଓ ଦୋକାନ ପରିଚାଳନା ପାଇଁ ସ୍ବତନ୍ତ୍ର ନିୟମ ଉନ୍ନୟନ ବିଭାଗ ପକ୍ଷରୁ ପ୍ରଣୟନ ହୋଇଛି। ବାସଗୃହରେ କୌଣସି ବ୍ୟକ୍ତି ବ୍ୟବସାୟିକ ପ୍ରତିଷ୍ଠାନ ଖୋଲିପାରିବେ ନାହିଁ। ଏଥିରେ ବ୍ୟତିକ୍ରମ ହେଲେ ଗୃହଧାରୀଙ୍କ ବିରୋଧରେ ବିହିତ କାର୍ଯ୍ୟାନୁଷ୍ଠାନ ଧାର୍ଯ୍ୟ ହୋଇଛି। ସେହିଭଳି ଦୋକାନ ଗୃହକୁ ଅନ୍ୟ କୌଣସି କାମରେ ଉପଯୋଗ କରିପାରିବେ ନାହିଁ। ନଚେତ ଦଣ୍ଡିତ ହେବା ଦର୍ଶାଯାଇଛି। ହେଲେ ନିୟମର ଖୁଲମ୍ଖୁଲା ଉଲ୍ଲଂଘନ ହେଉଛି। ଅନ୍ୟପଟେ ବିଭାଗ ନିୟମ ଉଲ୍ଲଂଘନକାରୀଙ୍କ ବିରୋଧରେ କେବଳ ମାମଲା ପରେ ମାମଲା ଦାଏର କରିଚାଲିଛି। କିନ୍ତୁ କୌଣସି ସୁଫଳ ମିଳୁପାରୁନାହିଁ, ଯାହାର ଜ୍ୱଳନ୍ତ ଉଦାହରଣ ଆର୍ଡିଏ କଲୋନୀଠାରୁ ହନୁମାନ ମନ୍ଦିର ରାସ୍ତା ପାର୍ଶ୍ୱବର୍ତ୍ତୀ ଆବଣ୍ଟିତ ଗୃହରେ ଚାଲିଥିବା ଦୋକାନମାନ ଦେଖିଲେ ସ୍ପଷ୍ଟ ଜଣାପଡ଼ୁଛି। ଆବଣ୍ଟିତ କରାଯାଇଥିବା ଗୃହଗୁଡିକରେ ଅଧିକାଂଶ ଲୋକ ବେଧଡ଼କଭାବେ ଦୋକାନ ଖୋଲି ବ୍ୟବସାୟ କରୁଛନ୍ତି। ଫଳରେ ଏହି ରାସ୍ତାରେ ବିଭିନ୍ନ ସମୟରେ ଟ୍ରାଫିକ୍ ସମସ୍ୟା ସୃଷ୍ଟି ହେଉଛି। ଏଥିସହ ଟିକସ ପ୍ରଦାନକାରୀ ଦୋକାନୀଙ୍କ ବ୍ୟବସାୟରେ ମଧ୍ୟ ପ୍ରଭାବ ପକାଉଥିବା ଅଭିଯୋଗ ହେଉଛି । ଇତିମଧ୍ୟରେ ବିଭାଗ ପକ୍ଷରୁ ୨୫ଶହ ମାମଲା ରୁଜୁ ହୋଇଥିବା ବେଳେ ସମସ୍ତ ମାମଲା ସ୍ଥଗିତ ରହିଛି। ତୁରନ୍ତ ସମସ୍ୟାର ସମାଧାନ ପାଇଁ ବୁଦ୍ଧିଜୀବୀ ମହଲରେ ଦାବି ହେଉଛି। ଏନେଇ ଆର୍ଡିଏ କଲୋନୀ ବାସିନ୍ଦା ପଞ୍ଚାନନ ମହାପାତ୍ର କହିଛନ୍ତି, ଆର୍ଡିଏ କଲୋନୀଠାରେ ୫ହଜାରରୁ ଊର୍ଦ୍ଧ୍ୱ ଗୃହ ଆବଣ୍ଟିତ ହୋଇଛି। ଏଥିପାଇଁ ସ୍ବତନ୍ତ୍ର ନିୟମ ମଧ୍ୟ ବିଭାଗ ଜାରି କରିଛି। ମାତ୍ର ତାହା ପାଳନ ହେଉନାହିଁ। ମୁଖ୍ୟରାସ୍ତା ପାର୍ଶ୍ୱରେ ୨-୩ଟା ଲେଖାଏଁ ଦୋକାନ ଖୋଲି ନିଜେ ଉପର ମହଲାରେ ରହୁଛନ୍ତି। ଫଳରେ ଟ୍ରାଫିକ୍ ସମସ୍ୟା ସୃଷ୍ଟି ହେଉଛି ବୋଲି ସେ କହିଛନ୍ତି। ଏନେଇ ରାଉରକେଲା ଆର୍ଡିଏ ପ୍ଲାନିଂ ବିଭାଗୀୟ ଅଧିକାରୀ ସାବିତ୍ରୀ ମହାନ୍ତିଙ୍କୁ ପଚାରିବାରୁ, ଆର୍ଡିଏ ତରଫରୁ ଆବଣ୍ଟିତ ଗୃହ ଓ ଦୋକାନ ନିମନ୍ତେ ସ୍ବତନ୍ତ୍ର ନିୟମ ରହିଛି। ଗୃହରେ କୌଣସି ଦୋକାନ ଖୋଲାଯାଇ ପାରିବ ନାହିଁ। ମାତ୍ର ବାରମ୍ବାର ନିୟମ ଅମାନ୍ୟ ହେଉଛି। ବିଭାଗ ତରଫରୁ ଅମାନ୍ୟକାରୀଙ୍କ ବିରୋଧରେ ମାମଲା ମଧ୍ୟ ହେଉଛି। ହେଲେ ମାମଲାଗୁଡ଼ିକ ସ୍ଥଗିତ ରହିଯାଉଥିବା କାରଣରୁ କୌଣସି ପ୍ରକାର ବିହିତ ପଦକ୍ଷେପ ନିଆଯାଇପାରୁନାହିଁ ବୋଲି ସେ କହିଥିଲେ।
