ପାରାଦୀପ, ୨୫ା୨(ସ୍ବ.ପ୍ର.): ପାରାଦୀପର ସମୁଦ୍ର କୂଳରେ ଥିବା ଲାଇଟ୍ ହାଉସ ବା ବତିଘର ଏବେ ପ୍ରତୀକ (ଲ୍ୟାଣ୍ଡ ମାର୍କ) ଭାବେ ଜନମାନସରେ ରହିଛି। କିନ୍ତୁ ଯେଉଁ ଉଦ୍ଦେଶ୍ୟ ନେଇ ଏହା ଭାରତ ସରକାରଙ୍କ ପକ୍ଷରୁ କରାଯାଇଥିଲା ତାହା ପୂର୍ବଭଳି କାମରେ ଲାଗୁନାହିଁ। କାରଣ ଏବେ ପ୍ରତ୍ୟେକ ପଣ୍ୟବାହୀ ଜାହାଜରେ ଆଧୁନିକ ବୈଷୟିକ ଜ୍ଞାନକୌଶଳ ସରଞ୍ଜାମ ରହିଛି। ଜିପିଏସ୍ (ଗ୍ଲୋବାଲ ପୋଜିଶନିଂ ସିଷ୍ଟମ)ଠାରୁ ଆରମ୍ଭ କରି ବହୁ ନାଭିଗେଶନ ସିଗ୍ନାଲ ବ୍ୟବସ୍ଥା ଜାହାଜରେ ଉପଲବ୍ଧ ହେଲାଣି। କିନ୍ତୁ ଏହି ବତିଘର ଏବେ ସମୁଦ୍ରରେ ମାଛ ଧରିବାକୁ ଯାଉଥିବା ବୋଟ୍ କର୍ମଚାରୀଙ୍କ ପାଇଁ କାମରେ ଲାଗୁଛି ବୋଲି ବତିଘର ଷ୍ଟେଶନ ପକ୍ଷରୁ କୁହାଯାଇଛି।
ସୂଚନାଯୋଗ୍ୟ, ପାରାଦୀପର ବତିଘରକୁ ୧୯୮୨ରେ କେନ୍ଦ୍ର ବନ୍ଦର ନୌପରିବହନ ଏବଂ ଜଳମାର୍ଗ ମନ୍ତ୍ରଣାଳୟ ପକ୍ଷରୁ ଆରମ୍ଭ କରାଯାଇଥିଲା। ୧୯୮୮ ମାର୍ଚ୍ଚ ୨୫ରେ ଲୋକାର୍ପଣ ହୋଇଥିଲା। ୪୦ ମିଟର ଉଚ୍ଚତା ବିଶିଷ୍ଟ ଏହି ବତିଘର ବତିରେ ଏକ ପ୍ରକାର ସ୍ବତନ୍ତ୍ର ବ୍ୟବସ୍ଥା ରହିଛି। ଯଥା ଏହି ବତି ପ୍ରତି ୫ ସେକେଣ୍ଡରେ ଧପ୍ଧପ୍ ହୋଇଥାଏ। ଏହାକୁ ଦେଖିଲେ ଜାହାଜର କ୍ୟାପଟେନ କିମ୍ବା ନାବିକ ପାରାଦୀପ ବୋଲି ଜାଣିପାରନ୍ତି। ଉକ୍ତ ବତି ସିଗ୍ନାଲ ସମୁଦ୍ରରେ ୧୦ ନଟିକାଲ ମାଇଲ (୧୮ କିମି) ପର୍ଯ୍ୟନ୍ତ ଦୃଶ୍ୟମାନ ହେଉଛି ବୋଲି ବତିଘର ଇନ୍ଚାର୍ଜ ପ୍ରଦୀପ କୁମାର ଦତ୍ତା କୁହିଛନ୍ତି। ସମଗ୍ର ବିଶ୍ୱରେ ଥିବା ପ୍ରତ୍ୟେକ ଲାଇଟ୍ ହାଉସର ଏଭଳି ସିଗ୍ନାଲ ରହିଛି। କେତେ ସେକେଣ୍ଡରେ ଲାଇଟ୍ ଅଫ ହୁଏ ତା’ର ଏକ ଲିଖିତ ତାଲିକା ପ୍ରତ୍ୟେକ ଜାହାଜର କ୍ୟାପଟେନଙ୍କ ପାଖରେ ଥାଏ। ସେହି ଆଧାରରେ ସେମାନେ ସମୁଦ୍ରରେ ଥାଇ ଜାଗାର ନାମ ଜାଣୁଥିଲେ। ଝଡ଼ ବାତ୍ୟା ଯୋଗୁ ଯଦି ଜାହାଜର ସମସ୍ତ ସିଗ୍ନାଲ ଫେଲ ହୋଇଯାଏ ସେତେବେଳେ ଏହି ବତିଘର ବତି କାମରେ ଲାଗିଥାଏ। ଏବେ ପ୍ରାୟତଃ ଜାହାଜ ପାଇଁ କାମରେ ଲାଗୁନାହିଁ। କିନ୍ତୁ ବୋଟ୍ ଡ୍ରାଇଭରଙ୍କ ପାଇଁ ସିଗ୍ନାଲ କାମରେ ଲାଗୁଛି। ଓଡ଼ିଶାରେ ଏବେ ୬ଟି ସ୍ଥାନରେ ବତିଘର ରହିଛି। ସେଗୁଡିକ ହେଲା ଗଞ୍ଜାମ ଜିଲାର ଗୋପାଳପୁର ଓ ପ୍ରୟାଗି, ପୁରୀ ଜିଲାର ପୁରୀ ଓ ଚନ୍ଦ୍ରଭାଗା, ଜଗତ୍ସିଂହପୁର ଜଲାର ପାରାଦୀପ ଏବଂ କେନ୍ଦ୍ରାପଡ଼ା ଜିଲାର ହୁକିଟୋଲା। ଏସବୁ ମଧ୍ୟରେ ସବୁଠାରୁ ପୁରୁଣା ବତିଘର ହୁକିଟୋଲା। ୧୮୩୪ ମସିହାରେ ଇଂରେଜମାନେ କରିଥିଲେ।
ପାରାଦୀପ ବତିଘର ଏବେ ପ୍ରତୀକ ହେବାର କାରଣ ସମ୍ପର୍କରେ ଦତ୍ତା କୁହନ୍ତି, ପ୍ରତ୍ୟେକ ସରକାରୀ ବେସରକାରୀ ଲୋଗୋରେ ଏହାର ଛବି ରହିଛି। ପର୍ଯ୍ୟଟକଙ୍କ ପାଇଁ ଅନ୍ୟତମ ଆକର୍ଷଣ ସ୍ଥାନ। ପ୍ରତିଦିନ ଶତାଧିକ ପର୍ଯ୍ୟଟକ ଦେଖୁଛନ୍ତି। ବତିଘର ଉପରକୁ ଚଢିବା ପାଇଁ ୧୮୦ ପାହାଚ ରହିଛି। ଯିଏ ଉପରକୁ ଚଢି ଦେଖିବା ପାଇଁ ଚାହିଁବେ ସେମାନେ ଅପରାହ୍ନ ୪ଟାରୁ ୫ଟା ମଧ୍ୟରେ ଯାଇ ପାରିବେ। ସେଥିପାଇଁ ମାତ୍ର ୧୦ ଟଙ୍କା ଟିକେଟ କରିବାକୁ ଲାଗିବ। ଏହାର ତତ୍ତ୍ୱାବଧାନରେ ଏବେ ୬ ଜଣ କର୍ମଚାରୀ ଅଛନ୍ତି।
