ଭୁବନେଶ୍ୱର,୨୫ା୨: କାନାରା ବ୍ୟାଙ୍କର ୨ ଦିନିଆ ମେଗା ରିଟେଲ ଲୋନ୍ ଏକ୍ସପୋ ଶୁକାବାରଠାରୁ ଆରମ୍ଭ ହୋଇଯାଇଛି। ଏହା ଜେନେରାଲ ମ୍ୟାନେଜର ବି.ଏଲ୍.ମୀନାଙ୍କ ନେତୃତ୍ୱରେ ବ୍ୟାଙ୍କର ସର୍କଲ ଅଫିସ୍ ପରିସରରେ ଆରମ୍ଭ ହୋଇଛି। ଏଥିରେ ରାଜ୍ୟର ପ୍ରତିଷ୍ଠିତ ବିଲ୍ଡର ଏବଂ ନାମୀଦାମୀ ଗାଡ଼ିର ଡିଲରମାନେ ମଧ୍ୟ ଯୋଗଦେଇଛନ୍ତି। ଉକ୍ତ ଏକ୍ସପୋରେ ବିଭିନ୍ନ କମ୍ପାନୀ ସେମାନଙ୍କର ନୂତନ ପ୍ରଡକ୍ଟ ପ୍ରଦର୍ଶନ କରୁଛନ୍ତି। ଉକ୍ତ କାର୍ଯ୍ୟକ୍ରମରେ କାନାରା ବ୍ୟାଙ୍କ ଦ୍ୱାରା ପ୍ରଦାନ କରାଯାଉଥିବା ଋଣଗୁଡ଼ିକୁ ଗ୍ରାହକମାନେ ସୁଲଭ ଓ ସୁବିଧାରେ ପାଇପାରିବେ। ବିଶେଷକରି ବ୍ୟାଙ୍କ ଆବାସ ଋଣ, ଗାଡ଼ି ଋଣ, ଶିକ୍ଷା ଋଣ ଏବଂ ବନ୍ଧକ ଋଣ ଉପରେ ସମସ୍ତ ଶୁଳ୍କ ଛାଡ଼ କରିଛନ୍ତି। କିନ୍ତୁ ଉକ୍ତ ଶୁଳ୍କ ଛାଡ଼ ନିଷ୍ପତ୍ତି ସୀମିତ ଅବଧି ପାଇଁ ଧାର୍ଯ୍ୟ ରହିଛି। ସେହିଭଳି ବ୍ୟାଙ୍କର ଗ୍ରାହକଙ୍କ ସ୍ବାର୍ଥ ଏବଂ ସୁବିଧାକୁ ନଜରରେ ରଖି ବ୍ୟାଙ୍କ ବିଭିନ୍ନ କାର୍ଯ୍ୟକ୍ରମ ଗ୍ରହଣ କରୁଛି। ଅପରପକ୍ଷରେ ଉକ୍ତ କାର୍ଯ୍ୟକ୍ରମରେ ଅଧିକରୁ ଅଧିକ ଗ୍ରାହକ ଯୋଗଦେଇ ବ୍ୟାଙ୍କ ଦ୍ୱାରା ପ୍ରଦାନ କରାଯାଉଥିବା ସୁବିଧାର ଲାଭ ଉଠାଇବେ ବୋଲି ବ୍ୟାଙ୍କ ପକ୍ଷରୁ ଆଶା କରାଯାଉଛି। ଏକ୍ସପୋର ଉଦ୍ଘାଟନୀ ଉତ୍ସବରେ ବ୍ୟାଙ୍କ ଦ୍ୱାରା ଆବାସ ଋଣ, ଗାଡ଼ି ଋଣ ଏବଂ ଶିକ୍ଷାଋଣ ଭଳି ସୁବିଧା ୧୫୦ ଜଣ ଲାଭାର୍ଥୀଙ୍କୁ ମଞ୍ଜୁରୀ ପତ୍ର ପ୍ରଦାନ କରାଯାଇଛି। ଶୁକ୍ରବାର ଏକ୍ସପୋର ୧ମ ଦିନ ହୋଇଥିବା ବେଳେ ୨ୟ ଦିନରେ ସବୁ ବର୍ଗର ଗ୍ରାହକ ଅଂଶ ଗ୍ରହଣ କରିବେ ବୋଲି ବ୍ୟାଙ୍କ ପକ୍ଷରୁ କୁହାଯାଇଛି।
