ପାରଳାଖେମୁଣ୍ଡି, ୧୭ା୪ (ଡି.ଏନ୍.ଏ): ଗଜପତି ଜିଲା ଗୋଷାଣି ବ୍ଲକ ଉପଲଡ଼ା ପଞ୍ଚାୟତ ଅନ୍ତର୍ଗତ ଶବର ନଗର ଗ୍ରାମକୁ ଆଜି ପର୍ଯ୍ୟନ୍ତ ରାସ୍ତାଘାଟ ନଥିବା ଦେଖିବାକୁ ମିଳିଛି। ୧୦ବର୍ଷରୁ ଊର୍ଦ୍ଧ୍ୱ ସମୟ ବିତିଯାଇଥିଲେ ସୁଦ୍ଧା ରାସ୍ତାଘାଟର ଚିହ୍ନବର୍ଣ୍ଣ ନାହିଁ । ଗ୍ରାମବାସୀ ଜମିହୁଡା କିମ୍ବା ଲଟାବୁଦା ପାଦଚଲା ରାସ୍ତା ଦେଇ ଗମନାଗମନ କରୁଛନ୍ତି। ପ୍ରାୟ ୧୫ ପରିବାରର ୫୦ରୁ ଊର୍ଦ୍ଧ୍ୱ ଲୋକ ବସବାସ କରୁଛନ୍ତି। ଗ୍ରାମଟି ଉପଲଡା-ଗୁରାଣ୍ଡି ମୁଖ୍ୟ ରାସ୍ତା ଠାରୁ ମାତ୍ର ୫୦୦ମିଟର ଦୂରତା ପଡୁଥିବା ବେଳେ କ୍ୱାରୀ ରାସ୍ତା ଠାରୁ ପ୍ରାୟ ୩୦୦ମିଟର ଦୂରତାରେ ଅବସ୍ଥିତ। ୩୦୦ମିଟର ରାସ୍ତା ଅବସ୍ଥା କହିଲେ ନସରେ। ଉକ୍ତ ଗ୍ରାମଟି ପାହାଡ଼ ପାଦଦେଶରେ ରହିଛି । ସମୟେ ସମୟେ ଜଙ୍ଗଲି ଜନ୍ତୁ ଗ୍ରାମକୁ ଆସିଯାଇଥାନ୍ତି। ବର୍ଷା ଦିନେ ପାହାଡିଆ ପାଣି ପ୍ରବେଶ କରି ଘରଦ୍ୱାର ନଷ୍ଟ କରିଦେଉଛି । ଗ୍ରାମରେ ମାତ୍ର ଗୋଟିଏ ପକ୍କା ଘର ରହିଛି। ଅନ୍ୟାନ୍ୟ ସବୁ ମାଟିଝାଟି ତଥା ଟିଣଚଦର ଆବୃତ ହୋଇରହିଛି । କେତେକ ଘରର କାନ୍ଥ ପଡିଯାଇ ଥିବାରୁ ଲୋକେ ଖୋଲାମେଲାରେ ବସବାସ କରୁଛନ୍ତି। ପଥରିଆ ରାସ୍ତା ଚଢି ଲୋକେ ଘରକୁ ଯାତାୟତ କରିଥାନ୍ତି। ସମସ୍ତଙ୍କ ପାଖରେ ଭୋଟର କାର୍ଡ ସହ ଆଧାର କାର୍ଡ ରହିଥିବା ବେଳେ ଏମାନଙ୍କୁ ଆଜିଯାଏଁ ରାସନ ସାମଗ୍ରୀ ମିଳୁନଥିବା ମଧ୍ୟ ପ୍ରକାଶ କରିଛନ୍ତି । ପ୍ରଶାସନ ପକ୍ଷରୁ ପାନୀୟ ଜଳ ପାଇଁ ଦୁଇଟି ନଳକୂପ ଏବଂ ଗୋଟିଏ କୂପର ବ୍ୟବସ୍ଥା ହୋଇଛି । ଏହା ସହ ବିଦ୍ୟୁତିକରଣ ବ୍ୟବସ୍ଥା ମଧ୍ୟ କରାଯାଇଛି। ନଳକୂପ ଗୁଡିକ ସଠିକ ଭାବେ କାମ କରୁ ନଥିବା ଏବଂ ଏଥିରୁ କଳଙ୍କିଯୁକ୍ତ ପାଣି ବାହାରୁ ଥିବା ବେଳେ ଗ୍ରୀଷ୍ମଦିନେ ପାଣି ଆସୁନଥିବା ଜଣାଇଛନ୍ତି । କୂଅଟି ମଧ୍ୟ ଶୁଖିଯାଉଛି । ଫଳରେ ଲୋକେ ପାଣି ପାଇଁ ଡହଳବିକଳ ହେଉଥିବା ଅଭିଯୋଗ କରିଛନ୍ତି। ଅପରପକ୍ଷରେ ଗ୍ରାମବାସୀ ମୂଲ ଲାଗି ପରିବାର ଚଳାଉଥିବା ବେଳେ ଏମାନଙ୍କ ଆର୍ଥିକ ମେରୁଦଣ୍ଡ ସ୍ବଚ୍ଛଳ ନୁହେଁ । ତେଣୁ ଗ୍ରାମ୍ୟରାସ୍ତା ନିର୍ମାଣ କରିବା ପାଇଁ ପ୍ରଶାସନକୁ ଗୁହାରି କରିଛନ୍ତି । ଏ ନେଇ ଗୋଷାଣି ବିଡିଓ ନୀଳମାଧବ ମାଝୀଙ୍କ ଦୃଷ୍ଟି ଆକର୍ଷଣ କରିବାରେ କହିଛନ୍ତି, ଶବର ନଗର ଗ୍ରାମକୁ ପରିଦର୍ଶନ କରି ରାସ୍ତାଘାଟ ସମସ୍ୟା ସହ ଅନ୍ୟାନ୍ୟ ସମସ୍ୟାର ସମାଧାନ ଅତି ଶୀଘ୍ର କରାଯିବ।
