ପୁରୀ ଅଫିସ, ୭ା୧୦:ବର୍ତ୍ତମାନ ଶ୍ରୀମନ୍ଦିର ଖୋଲାଯିବା ପାଇଁ ଗୋଟିଏ ପଟେ ଦାବି ହେଉଥିବାବେଳେ ଅନ୍ୟ ପଟେ ଏହାକୁ ବିରୋଧ କରାଯାଉଛି। ଭକ୍ତଙ୍କ ଲାଗି ଶ୍ରୀମନ୍ଦିର ଖୋଲିବା ଦାବି ନେଇ ମଙ୍ଗଳବାର ପୂର୍ବାହ୍ନରେ ସୁଆର ମହାସୁଆର ନିଯୋଗ ପୂର୍ବତନ ସଭାପତି ଦାମୋଦର ମହାସୁଆରଙ୍କ ନେତୃତ୍ୱରେ କେତେଜଣ ସେବାୟତ ଅରୁଣସ୍ତମ୍ଭ ନିକଟରେ ଧାରଣା ଦେଇଥିଲେ। ଧାରଣାକାରୀମାନେ କହିଥିଲେ, କରୋନା ପାଇଁ ୬ମାସରୁ ଊର୍ଦ୍ଧ୍ୱ ହେବ ମନ୍ଦିରକୁ ଭକ୍ତଙ୍କ ପ୍ରବେଶ ବାରଣ କରାଯାଇଛି। ଫଳରେ ଏହାର ପ୍ରଭାବ ସମଗ୍ର ସେବାୟତ ସମାଜ ଉପରେ ପଡ଼ିଛି। ହଜାର ହଜାର ସେବାୟତ ପରିବାର ପ୍ରତିପୋଷଣ କରିବା ପାଇଁ ହନ୍ତସନ୍ତ ହେଉଛନ୍ତି। ଶ୍ରୀମନ୍ଦିର ପ୍ରଶାସନ ପକ୍ଷରୁ ଯେଉଁ ଆର୍ଥିକ ସହାୟତା ଦିଆଯାଉଛି ତାହା ପର୍ଯ୍ୟାପ୍ତ ନୁହେଁ। ତେଣୁ ଶ୍ରୀମନ୍ଦିର ଚାରିଦ୍ୱାରରେ ଡାକ୍ତରଙ୍କୁ ରଖି ପର୍ଯ୍ୟାୟକ୍ରମେ ୫୦ଜଣ ଲେଖାଏ ଭକ୍ତଙ୍କୁ ପ୍ରବେଶ ଅନୁମତି ଦିଆଯାଉ ବୋଲି ସେମାନେ ଦାବି କରିଥିଲେ। ଉପଜିଲାପାଳ ଭବତାରଣ ସାହୁ ଏବଂ ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ ପହଞ୍ଚତ୍ ବୁଝାଶୁଝା କରିବା ପରେ ସେମାନେ ଧାରଣାରୁ ଉଠିଥିଲେ।
ଅନ୍ୟପକ୍ଷରେ ବର୍ତ୍ତମାନ ପରିସ୍ଥିତିରେ ଶ୍ରୀମନ୍ଦିର ଖୋଲିବା ସମ୍ଭବ ନୁହେଁ ବୋଲି ପରିଚାଳନା କମିଟିରେ ଥିବା ସେବାୟତ ପ୍ରତିନିଧି କହିଛନ୍ତି। ଏ ନେଇ ଶ୍ରୀମନ୍ଦିର ପ୍ରଶାସନ କାର୍ଯ୍ୟାଳୟରେ ଖବରଦାତା ସମ୍ମିଳନୀ ଅନୁଷ୍ଠିତ ହୋଇଥିଲା। ପରିଚାଳନା କମିଟି ସଦସ୍ୟ ରାମଚନ୍ଦ୍ର ଦାସମହାପାତ୍ର କହିଥିଲେ, ପ୍ରାୟ ୫୦୦ ସେବାୟତ କରୋନା ଦ୍ୱାରା ସଂକ୍ରମିତ ହେଲେଣି। ଏହି ମହାମାରୀରେ ୧୫ରୁ ଅଧିକ ସେବାୟତଙ୍କ ଜୀବନ ଗଲାଣି। ତେଣୁ ଏବେ ବି ଅନେକ ସେବାୟତ ହୋମ୍ ଆଇସୋଲେଶନ ଏବଂ ହସ୍ପିଟାଲରେ ଅଛନ୍ତି। ତେଣୁ ଏଭଳି ସ୍ଥିତିରେ ମନ୍ଦିର ଖୋଲାଗଲେ ସଂକ୍ରମଣ ଆହୁରି ବଢିବ। କାହା କଥାରେ ମନ୍ଦିର ବନ୍ଦ ହୋଇନାହିିଁ କି କାହା କଥାରେ ମନ୍ଦିର ଖୋଲିବ ନାହିିଁ। କରୋନା ସଂକ୍ରମଣ କମିବା ପରେ ଯେବେ ପରିଚାଳନା କମିଟି ଏବଂ ଛତିଶା ନିଯୋଗ ଖୋଲିବା ଲାଗି ନିଷ୍ପତ୍ତି ନେବେ ସେବେ ଖୋଲିବ ବୋଲି ଦାସମହାପାତ୍ର କହିଛନ୍ତି। ଏହି ଅବସରରେ ପରିଚାଳନା କମିଟି ସଦସ୍ୟ ମାଧବ ଚନ୍ଦ୍ର ପୂଜାପଣ୍ଡା, ମାଧବ ମହାପାତ୍ର, ଅନନ୍ତ ତିଆଡ଼ିି ଉପସ୍ଥିତ ଥିଲେ।
