ଖୋର୍ଦ୍ଧା ଅଫିସ,୧୨।୨: ଚଳିତ ବର୍ଷ ଖୋର୍ଦ୍ଧା ଜିଲାରେ ଖରିଫ ଧାନ କିଣାରେ ବ୍ୟାପକ ଦୁର୍ନୀତି ହେଉଥିବା ଅଭିଯୋଗ ଉଠିଛି। ଦୁର୍ନୀତି ପଛରେ ପ୍ରାଥମିକ ସେବା ସମବାୟ ସମିତି(ପ୍ୟାକ୍ସ) ସମ୍ପାଦକଙ୍କ ହାତ ରହିଛି। ସମିତି ସମ୍ପାଦକ ଏବଂ ମିଲର୍ସଙ୍କ ମଧୁଚନ୍ଦ୍ରିକାରେ ଧାନକିଣା ଚାଲିଛି। ଫଳରେ ଚାଷୀ ଧାନ ଧରି ମଣ୍ଡିରେ ପଡି ରହିଛନ୍ତି। ଅନ୍ୟପଟେ ଦଲାଲଙ୍କ ଜରିଆରେ ନକଲି ଚାଷୀଙ୍କ ଠାରୁ ଧାନକିଣା ଚାଲିଛି। ଚାଷ ଜମି ନ ଥିବା ଚାଷୀଙ୍କୁ ରେକର୍ଡରେ ଚାଷୀ ଦର୍ଶାଇ ସେମାନଙ୍କ ନାମରେ ଶତାଧିକ କୁଇଣ୍ଟାଲ ଧାନ କିଣା ଚାଲିଛି। ଜଟଣୀ ବ୍ଲକ ଅଙ୍ଗରାପଡା ସେବା ସମବାୟ ସମିତିରେ ଗୋଚର, ଅନାବାଦୀ ଜମିକୁ ଚାଷଜମି ଏବଂ କେନାଲ ନ ଥିବା ମୌଜାରେ କେନାଲ ଦର୍ଶାଇ ନକଲି ଚାଷୀଙ୍କଠାରୁ ଧାନକିଣା ଯାଇଥିବା ନେଇ ସ୍ଥାନୀୟ ଗ୍ରାମବାସୀ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିବା ବେଳେ, ଏବେ ବୋଲଗଡ଼ ବ୍ଲକ ଶ୍ରୀଚନ୍ଦନପୁର ପାଟଣା ସେବା ସମବାୟ ସମିିିତିରେ ଧାନକିଣାରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ଉଠିଛି।
ପ୍ରକାଶ ଯେ, ଏହି ମଣ୍ଡିରେ ଗତ ଡିସେମ୍ବରରେ ଧାନକିଣା ଆରମ୍ଭ ହୋଇଥିଲା। ମାର୍ଚ୍ଚ ୩୦ ସୁଦ୍ଧା ଧାନ ସଂଗ୍ରହ ଶେଷ ତାରିଖ ରହିଛି। ଏହି ସମିତି ଅଧୀନରେ ୨୪୬ଜଣ ଚାଷୀ ପଞ୍ଜୀକୃତ କରିଛନ୍ତି। ଚଳିତବର୍ଷ ସମିତିକୁ ୫୭୦୦କୁଇଣ୍ଟାଲ ଧାନ କିଣିବା ଲାଗି ଟାର୍ଗେଟ ରହିଛି। ତେବେ ମଙ୍ଗଳବାର ସୁଦ୍ଧା ୧୫୧ ଚାଷୀଙ୍କଠାରୁ ୫୦୯୪.୭୭ କୁଇଣ୍ଟାଲ ଧାନ କିଣା ସରିଥିବା ଯୋଗାଣ ବିଭାଗ ପକ୍ଷରୁ କୁହାଯାଇଛି। ଗତବର୍ଷ ଏହି ସମିତିକୁ ୭୪୦୦ ଟାର୍ଗେଟ ରହିଥିବା ବେଳେ ୨୩୬ ଚାଷୀ ନାମ ପଞ୍ଜୀକୃତ କରିଥିଲେ। ଏହି ସମୟରେ(ଫେବୃୟାରୀ ୯ସୁଦ୍ଧା) ମାତ୍ର ୩୮୦୦ କୁଇଣ୍ଟାଲ ଧାନ କିଣାଯାଇଥିଲା। ତେବେ ଧାର୍ଯ୍ୟ ସମୟ ପୂର୍ବରୁ ଏବଂ ଏକାଧିକ ଚାଷୀ ଧାନ ବିକି ନ ଥିବା ବେଳେ କିପରି ଟାର୍ଗେଟ ପାଖାପାଖି ଧାନକିଣା ସରିଲାଣି ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ବିଗତ ବର୍ଷ ଏହି ସମୟରେ ଟାର୍ଗେଟ ୫୦ପ୍ରତିଶତ ଧାନ କିଣାଯାଇଥିବା ବେଳେ ଚଳିତବର୍ଷ ଏହି ସମୟରେ କିପରି ୮୦ପ୍ରତିଶତ ଧାନ କିଣାଯାଇଛି, ତାହାକୁ ନେଇ ଚାଷୀ ଅଭିଯୋଗ ଉଠାଇଛନ୍ତି। ମଙ୍ଗଳବାର ଟୋକନ ପାଇଥିବା ଚାଷୀଙ୍କ ନିକଟରେ ବଳକା ରହିଥିବା ଧାନ କ୍ରୟ ଦାବିରେ ଶତାଧିକ ଚାଷୀ ସମିତିରେ ତାଲା ପକାଇ ଧାରଣାରେ ବସିଥିଲେ। ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ ହୋଇଥିଲା। ନକଲି ଚାଷୀଙ୍କ ନାମରେ କୁଇଣ୍ଟାଲ କୁଇଣ୍ଟାଲ ଧାନ କ୍ରୟ କରାଯାଇଥିବା ନେଇ ରେକର୍ଡରେ ଦର୍ଶାଯାଇଥିବା କେତେଜଣ ଚାଷୀ ଗଣମାଧ୍ୟମ ଆଗରେ କହିଛନ୍ତିି। ରେକର୍ଡ ଯାଞ୍ଚ କରାଗଲେ, କେତେଜଣ ଚାଷୀ ଧାନ ବିକିଛନ୍ତି, କାହା ଠାରୁ କେତେ ପରିମାଣର ଧାନ କିଣାଯାଇଛି, ତାହା ସ୍ପଷ୍ଟ ହେବ ବୋଲି କହିଛନ୍ତି। ଏହି ସମିତିରେ ଧାନକିଣାରେ ବ୍ୟାପକ ଦୁର୍ନୀତି ହୋଇଥିବା କେତେଜଣ ଚାଷୀ କହିଛନ୍ତି। ଏହାର ତଦନ୍ତ କରାଗଲେ, ପ୍ରକୃତ ସତ୍ୟ ପଦାକୁ ଆସିବ ବୋଲି ଦାବି କରିଛନ୍ତି। ଏନେଇ ସମିତି ସମ୍ପାଦକ ବାଙ୍କନିଧି ମହାରଣାଙ୍କ ପ୍ରତିକ୍ରିୟା ମିଳିପାରିନାହିଁ। ଅଭିଯୋଗ ଆସିଲେ ଘଟଣାର ତଦନ୍ତ କରାଯିବ
ବୋଲି ଜିଲା ପ୍ରଶାସନ ପକ୍ଷରୁ କୁହାଯାଇଛି।
