ଝାରସୁଗୁଡା ଅଫିସ,୩।୩: ଝାରସୁଗୁଡ଼ାରୁ ବେଲପାହାଡକୁ ସଂଯୋଗ କରୁଥିବା ୪୯ନଂ ଜାତୀୟ ରାଜପଥର ଗାନ୍ଧୀଛକ ନୂଆଡିହି ନିକଟରେ ବେଆଇନ ଭାବେ ସ୍ଥାପିତ ହୋଇଥିବା ଟୋଲ ଗେଟ୍କୁ ସ୍ଥାନୀୟ ବାସିନ୍ଦା ପ୍ରଥମରୁ ବିରୋଧ କରିଆସୁଛନ୍ତି । ୨ବର୍ଷ ମଧ୍ୟରେ ଏହି ଟୋଲ ଗେଟ୍କୁ ଏଠାରୁ ଉଚ୍ଛେଦ କରାଯିବ ବୋଲି ଏନ୍ଏଚ୍ଏଆଇ ସ୍ଥାନୀୟ ଲୋକଙ୍କୁ ପ୍ରତିଶ୍ରୁତି ଦେଇଥିଲା। ଏନ୍ଏଚ୍ଏଆଇର ପ୍ରତିଶ୍ରୁତି ପାଣିର ଗାର ସଦୃଶ ହୋଇଛି। ଏହାର ପ୍ରତିବାଦରେ ବ୍ରଜରାଜନଗର ୟୁଥ୍ ତରଫରୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରାଯାଇ ଗୁରୁବାର ସକାଳ ୧୦ଟାରୁ ଅପରାହ୍ନ ୫ଟା ପର୍ଯ୍ୟନ୍ତ ଦିନିକିଆ ଗଣଧାରଣା ଦିଆଯାଇଛି। ଖବରପାଇ ତହସିଲଦାର କୁଳମଣୀ ରଣବିଡା, ଏସ୍ଡିପିଓ ଗୁପ୍ତେଶର ଭୋଇ, ଆଇଆଇସି ବୈକୁଣ୍ଠ ବିହାରୀ ସେଠ ଓ ଏନ୍ଏଚ୍ଏଆଇ ଅଧିକାରୀ ନିତିନ ଗୁପ୍ତା ପ୍ରମୁଖ ଅଧିକାରୀମାନେ ପହଁଞ୍ଚି ଆନ୍ଦୋଳନକାରୀଙ୍କ ସହ ଆଲୋଚନା କରି ପୁଣି ସମୟ ମାଗିଥିଲେ। ହେଲେ ଏହାକୁ ଆନ୍ଦୋଳନକାରୀମାନେ ସିଧାସଳଖ ପ୍ରତ୍ୟାଖ୍ୟାନ କରିଥିଲେ । ଏହି ଆନ୍ଦୋଳନ ଦିନିକିଆ ହୋଇଥିବାବଳେ ଆଗାମୀ ଦିନରେ ଏହାକୁ ବ୍ୟାପକ କରାଯିବ ବୋଲି ୟୁଥ ସଂଗଠନ ଚେତାବନୀ ଦେଇଛି। ଏହି ଦିନିକିଆ ଗଣଧାରଣାରେ ୟୁଥ ସଂଗଠନର କର୍ମକର୍ତ୍ତାମାନଙ୍କ ମଧ୍ୟରେ ରବି ସୋନୀ, ତପନ ସ୍ବାଇଁ, ଜିତେନ୍ଦ୍ର ପଟ୍ଟନାୟକ, ଜୀବନ ସାର୍ଥକ, ସୁବ୍ରତ ଦାଶ, ନବୀନ ସିଂହ, ରାଧେଶ୍ୟାମ ପ୍ରଧାନ, ବସନ୍ତ ରାଉତ ପ୍ରମୁଖ ଊପସ୍ଥିତ ରହିଛନ୍ତି ।
