କେନ୍ଦୁଝର,୮ା୭(ନରେଶ ଚନ୍ଦ୍ର ପଟ୍ଟନାୟକ): ସଦର ବ୍ଲକ ରାଇସୁଆଁରୁ କେନ୍ଦୁଝର ସହରକୁ ଆସିବା ପାଇଁ ବାଲିଆଗୁଡ଼ା ନିକଟରେ ଏନ୍ଏଚ୍-୨୦ର ନିର୍ମାଣ ହୋଇଥିବା ସର୍ଭିସ ରୋଡ୍ ଜଳାର୍ଣ୍ଣବ ହୋଇଯାଇଛି। ବର୍ଷା ଜଳ ନିଷ୍କାସନ ହୋଇ ପାରୁ ନ ଥିବାରୁ ଏଭଳି ସମସ୍ୟା ସୃଷ୍ଟି ହେଉଥିବା ବେଳେ ଗାଡ଼ିରେ ଯାତାୟାତ ଅସୁରକ୍ଷିତ ହୋଇପଡ଼ିଛି। ଡ୍ରେନ୍ ନିର୍ମାଣ ହୋଇଥିଲେ ହେଁ ଜଳ ନିଷ୍କାସନ ହେଉନାହିଁ। ଡ୍ରେନର କଭର ସବୁ ନଷ୍ଟ ହୋଇଯାଇ ମେଲା ହୋଇ ରହିଛି। ଏଣୁ ବିଶେଷ କରି ଚାଲିଚାଲି ଯିବା ଆସିବା କରୁଥିବା ଲୋକେ ବହୁ ଅସୁବିଧା ଭୋଗୁଥିବା ବେଳେ ଦୁର୍ଘଟଣା ଆଶଙ୍କା ରହିଛି ବୋଲି ରାଇସୁଆଁ ନିବାସୀ ଜଲାଲୁଦ୍ଦିନ ଆକବର କହିଛନ୍ତ। ଏହା ଦ୍ୱାରା ରାଇସୁଆଁ ଲୋକଙ୍କୁ ବହୁ ବାଟ ବୁଲି କେନ୍ଦୁଝର ସହରକୁ ଯିବା ଆସିବା କରିବାକୁ ପଡୁଛି। ବିଶେଷକରି ବାଲିଆଗୁଡା, ଜନାର୍ଦ୍ଦନପୁର, ଧୃପଦା ଆଦି ଗ୍ରାମର ଲୋକମାନେ ଅସୁବିଧା ଭୋଗୁଛନ୍ତ। ଏନେଇ ଏନ୍ଏଚ୍ଏଆଇ ବିଭାଗ ଏବଂ ଜିଲା ପ୍ରଶାସନ ତୁରନ୍ତ ପ୍ରତିକାର ବ୍ୟବସ୍ଥା କରିବାକୁ ପୂର୍ଣ୍ଣଚନ୍ଦ୍ର ମହାନ୍ତ, ଅନିଲ ସୋନକାର, ଶତ୍ରୁଘ୍ନ ମହାରଣାଙ୍କ ସମେତ ସ୍ଥାନୀୟ ବାସିନ୍ଦା ଦାବି କରିଛନ୍ତି।
