ନୀଳଗିରି, ୨୧।୫(ସ୍ବ.ପ୍ର.)
ବାଲେଶ୍ୱର ଜିଲା ନୀଳଗିରି ବ୍ଲକ ସୋନ ନଦୀପଠାରୁ ପ୍ରତ୍ୟେକ ଦିନ ଟ୍ରିପ୍ ଟ୍ରିପ୍ ବାଲି ଚାଲାଣ ହେଉଛି। ଏହାକୁ ରୋକିବା ପାଇଁ ପ୍ରଶାସନ କୌଣସି ଦୃଢ଼ କର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାରୁ ଲୁଟେରାମାନେ ଅବାଧରେ ବାଲି ଚାଲାଣ କରି ମାଲାମାଲ ହେଉଛନ୍ତି। ଏହାର ପ୍ରତିବାଦ କରି ଶୁକ୍ରବାର ପ୍ରକୃତି ସୁରକ୍ଷା ମଞ୍ଚ ନରସିଂହପୁର ପଞ୍ଚାୟତ ପକ୍ଷରୁ ବାଲି ମାଫିଆଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରି ନୀଳଗିରି ଉପଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଶାନ୍ତିପୂର୍ଣ୍ଣ ଭାବେ ଗଣବିକ୍ଷୋଭ କରାଯାଇଥିଲା। ସେମାନଙ୍କ ଦାବିକୁ ସମର୍ଥନ ଜଣାଇ ନୀଳଗିରି ବିଧାୟକ ଇଂ. ସୁକାନ୍ତ କୁମାର ନାୟକ ଉପସ୍ଥିତ ରହି ପ୍ରଶାସନର ଉଦାସୀନତା ସମ୍ପର୍କରେ ଉଦ୍ବେଗ ପ୍ରକାଶ କରିଥିଲେ। ନୀଳଗିରି ଉପଜିଲାପାଳ ଦୀପ୍ତି ରଞ୍ଜନ ସେଠୀ ପହଞ୍ଚି ଆଲୋଚନା କରିଥିଲେ। ପ୍ରକୃତି ସୁରକ୍ଷା ମଞ୍ଚ ପକ୍ଷରୁ ଏକ ଦାବିପତ୍ର ପ୍ରଦାନ ସହ ଆଗାମୀ ୭ଦିନ ଭିତରେ ଆସାମୀମାନଙ୍କୁ ଗିରଫ କରା ନ ଗଲେ ଆନ୍ଦୋଳନାତ୍ମକ ପନ୍ଥାକୁ ଜୋରଦାର କରାଯିବ ବୋଲି କହିଥିଲେ। ଉପଜିଲାପାଳ ସେଠୀ ଏହି ବିଷୟକୁ ଗୁରୁତ୍ୱ ଦେବା ଓ ଦୃଢ଼ କାର୍ଯ୍ୟାନୁଷ୍ଠାନର ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଏହି ଅବସରରେ ସେଠାରେ ଉପସ୍ଥିତ ପୂର୍ବତନ ବ୍ଲକ ଉପାଧ୍ୟକ୍ଷ ରମେଶ ମହାନ୍ତି, ପୂର୍ବତନ ନଗରପାଳ ରାଧାଗୋବିନ୍ଦ ଖଟୁଆ, ଗଙ୍ଗାଧର ମିଶ୍ର, ରାଜୀବ ଦାସବାବୁ, କୁଳମଣି ନାୟକ, ତାପସ ମହାନ୍ତି, ସମର ଶଙ୍କର କାନୁନଗୋ, ରାମକୃଷ୍ଣ ମହାପାତ୍ର, ଶୁଭାଶିଷ ଆଚାର୍ଯ୍ୟ, ବିଭିନ୍ନ ପଞ୍ଚାୟତର କିଛି ସରପଞ୍ଚ ଓ ସମିତିସଭ୍ୟ ପ୍ରମୁଖ ଯୋଗଦେଇଥିଲେ।
ସୂଚନା ଅନୁଯାୟୀ, ସୋନ ନଦୀପଠାରୁ ବିଭିନ୍ନ ସ୍ଥାନରେ ବାଲି ମାଫିଆ ମେଶିନ ଲଗାଇ ଶହ ଶହ ଟ୍ରିପ ବାଲି ବାହାରକୁ ଚାଲାଣ କରୁଛନ୍ତି। ବ୍ୟାପକ ବାଲି ଚୋରାଚାଲାଣ ଫଳରେ ନରସିଂହପୁର, କୁଲାପାଳ ଅଞ୍ଚଳରୁ ବାଲି ଚୋରାଚାଲାଣ ହେଉଥିବା ଯୋଗୁ ନଦୀତଟରେ ହୋଇଥିବା ପଥର ପ୍ୟାକିଂ ଭୁଶୁଡ଼ିବାର ଆଶଙ୍କା ଦେଖାଦେଇଛି। କାଠପାଳ ପୋଲ ତଳୁ ବାଲି ନେବା ଫଳରେ ପୋଲକୁ ବିପଦ ଦିନକୁ ଦିନ ବଢ଼ୁଛି। ପ୍ରଭାବିତ ଅଞ୍ଚଳର ଲୋକମାନେ ବାରମ୍ବାର ପ୍ରଶାସନ ଓ ପୋଲିସ ପ୍ରଶାସନ ନିକଟରେ ଅଭିଯୋଗ କରି ନୟାନ୍ତ ହୋଇପଡ଼ିଲେଣି। ଚୋରାବାଲି ଖନନକୁ ନେଇ ଅଭିଯୋଗକାରୀମାନେ ମଧ୍ୟ ବାଲିମାଫିଆଙ୍କ ଦ୍ୱାରା ମରଣାନ୍ତକ ଆକ୍ରମଣର ଶିକାର ହେଉଛନ୍ତି। ଏହାର ଏକ ଉଦାହରଣ ଗତ ମେ’ ୭ତାରିଖରେ ନରସିଂହପୁର ପଞ୍ଚାୟତ ଅଞ୍ଚଳରେ ଦେଖିବାକୁ ମିଳିଛି। ଏ ପର୍ଯ୍ୟନ୍ତ ସମ୍ପୃକ୍ତ ଆସାମୀମାନଙ୍କ ବିରୋଧରେ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ନାହଁି। ପୋଲିସ ଆସାମୀମାନଙ୍କୁ ଖୋଜୁଛି କହି ହାତ ବାନ୍ଧି ବସିଛି।
