ମୋରଡା,୪।୮(ସ୍ମାରକ ମାଜୀ): ବିଦ୍ୟାଳୟରେ ବିଭିନ୍ନ ଅନିୟମିତତା ତଥା ପୋକଯୁକ୍ତଖାଦ୍ୟ, ଛାତ୍ରୀଙ୍କୁ ଆଶାଳୀନ ବ୍ୟବହାର, ବିଦ୍ୟାଳୟରୁ ଜିନିଷ ନେଇ ନେବା ଆଦି ବିଭିନ୍ନ ଅଭିଯୋଗ ନେଇ ପ୍ରଧାନଶିକ୍ଷକଙ୍କ ବହିଷ୍କାର ଦାବି କରାଯାଇଛି। ଏନେଇ ୩୦ରୁ ଧଧିକ ଛାତ୍ରୀଛାତ୍ର ଚାଲି ଚାଲି ବିଡ଼ିଓଙ୍କୁ ସାକ୍ଷାତ କରିବାକୁ ଯିବା ଘଟଣା ମୟୂରଭଞ୍ଜ ଜିଲା ଶୁଳିଆପଦା ବ୍ଲକରେ ଚର୍ଚ୍ଚାର ବିଷୟ ପାଲଟିଛି। ସୂଚନା ଅନୁଯାୟୀ, ଉକ୍ତ ବ୍ଲକ ଅଧୀନ ପଥରନେସା ସରକାରୀ ଆଶ୍ରମ ବିଦ୍ୟାଳୟରେ ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଶିକ୍ଷା ଦାନ ହେଉଥିବା ବେଳେ ବାଳକ ଓ଼ ବାଳିକା ଆଶ୍ରମରେ ମୋଟ ୨୬୯ ଜଣ ଅନ୍ତେବାସୀ ଅଛନ୍ତି। ନୀଳମାଧବ ଦଳେଇ ଉକ୍ତ ବିଦ୍ୟାଳୟର ପ୍ରଧାନଶିକ୍ଷକ ସହ ସ଼େ ଆଶ୍ରମର ଦାୟିତ୍ୱରେ ଅଛନ୍ତି । ତେବେ ଦୀର୍ଘ ଦିନ ଧରି ଆଶ୍ରମରେ ଛାତ୍ରୀଛାତ୍ରଙ୍କୁ ପାଇଖାନା ଘର, କ୍ଲାସ ରୁମରୁ ଛାତରୁ ପାଣି ପଡୁଛି। ସେହିପରି ପିଲାଙ୍କୁ ଖାଇବାକୁ ଦିଆଯାଉଥିବା ବାଦାମ ଲଡୁରେ ପୋକ ବାହାରୁଛି। ଏନେଇ ପିଲାମାନେ ବାରମ୍ବାର ପ୍ରଧାନଶିକ୍ଷକଙ୍କୁ ଅଭିଯୋଗ କରିଥିଲେ ମଧ୍ୟ ସେ ପିଲାଙ୍କ କଥା ଶୁଣିବା ବଦଳରେ ସେମାନଙ୍କୁ ବିଦ୍ୟାଳୟରୁ ବାହାର କରିଦେବାର ଧମକ ଦେଉଛନ୍ତି। ସେହିପରି ବିଦ୍ୟାଳୟରେ କାର୍ଯ୍ୟରତ ସହକାରୀ ଶିକ୍ଷକ ଗିରିଶଚନ୍ଦ୍ର ନାଏକ ଛାତ୍ରୀଙ୍କୁ ଖରାପ ବ୍ୟବହାର କରୁଥିବାର ମଧ୍ୟ ଛାତ୍ରୀମାନେ ଅଭିଯୋଗ କରିଛନ୍ତି। ଆଜି ଜଣେ ସପ୍ତମ ଶ୍ରେଣୀ ଛାତ୍ରଙ୍କୁ ପେଟକୁ ମାରିଥିବାର ମଧ୍ୟ ଅଭିଯୋଗ ହୋଇଛି। ଦିନ ତମାମ ଉକ୍ତ ଛାତ୍ରଙ୍କ ପେଟ ଯନ୍ତ୍ରଣା ହେଉଥିଲେ ମଧ୍ୟ କେହି ତାଙ୍କୁ ଡାକ୍ତରଖାନାକୁ ନେଇ ନାହାନ୍ତି। ସେହିପରି କାର୍ଯ୍ୟରତ ସିସିଏ ଗୋବିନ୍ଦଚନ୍ଦ୍ର ମାର୍ଣ୍ଡି ବିଦ୍ୟାଳୟରୁ ଖଟ, ମିକ୍ସଚର ଆଦି ନେଉଥିବାର ମଧ୍ୟ ଅଭିଯୋଗ ହେଉଛି। ଏମିତି ଅଭିଯୋଗକୁ ନେଇ ଆଜି ଛାତ୍ରୀଛାତ୍ରମାନେ ଶୁଳିଆପଦାସ୍ଥିତ ବିଡ଼ିଓଙ୍କ କାର୍ଯ୍ୟାଳୟକୁ ଚାଲି ଚାଲି ଅଭିଯୋଗ କରିବାକୁ ଯାଇଥିଲେ। ଅଧାବାଟରେ ବିଡିଓ ଲକ୍ଷ୍ମୀସାଗର ମାଝୀ, ଶୁଳିଆପଦା ଥାନା ଅଧିକାରୀ ସତ୍ୟନାରାୟଣ ବଳ ପହଁଞ୍ଚି ଛାତ୍ରୀଛାତ୍ରଙ୍କୁ ବିଦ୍ୟାଳୟକୁ ଆଣିଥିଲେ। ବିଦ୍ୟାଳୟରେ ପହଞ୍ଚିବା ପରେ ମଧ୍ୟ ଶତାଧିକ ଛାତ୍ରୀଛାତ୍ର ପ୍ରଧାନଶିକ୍ଷକଙ୍କ ବହିଷ୍କାର ଦାବି କରି ପ୍ଲାକାର୍ଡ ଧରି ହୋହଲ୍ଲା କରିଥିଲେ। ବିଡ଼ିଓ ମାଝୀ, ଥାନା ଅଧିକାରୀ ବଳ,ବ୍ଲକ ସମ୍ପ୍ରସାରଣ ଅଧିକାରୀ ସୁମିତ ବିକ୍ରମ ନାଏକ, ବିଇଓ ରଶ୍ମିରଞ୍ଜନ ଗିରି, ଏବିଇଓ ଜଗନ୍ନାଥ ନାଏକ ବିଦ୍ୟାଳୟ ପରିସରରେ ଛାତ୍ରୀଛାତ୍ରଙ୍କ ଅଭିଯୋଗ ଶୁଣିବା ସହିତ ତଦନ୍ତ କରିଛନ୍ତି। ତଦନ୍ତ ରିପୋର୍ଟ ଜିଲାପାଳ ଓ଼ ଜିଲା ସମ୍ପ୍ରସାରଣ ଅଧିକାରୀଙ୍କୁ ପ୍ରଦାନ କରାଯିବ ଓ଼ ପରବର୍ତ୍ତୀ ସମୟରେ ପଦକ୍ଷେପ ନେବେ ବୋଲି କହିଛନ୍ତି ବିଡ଼ିଓ ମାଝୀ।
