କୁନ୍ଦୁରା, ୧୮।୨(ଡି.ଏନ୍.ଏ.): କୋରାପୁଟ ଜିଲା କୁନ୍ଦୁରା ବ୍ଲକରେ ଦୀର୍ଘ ୧୦ ମାସ ପରେ ପଞ୍ଚୟାତ ସମିତି ବୈଠକ ବସିଛି। ଅଧ୍ୟକ୍ଷା ରାଜେଶ୍ୱରୀ ପରଜାଙ୍କ ଅଧ୍ୟକ୍ଷତାରେ ହୋଇଥିବା ବୈଠକରେ
ଏମପି ରମେଶ ଚନ୍ଦ୍ର ମାଝୀ,ବିଡିଓ ସନ୍ଧ୍ୟା ସମରଥ, କୋଟପାଡ଼ ବିଧୟିକା ପଦ୍ମିନୀ ଦିଆନ, ତହସିଲଦାର ଆୟୁବ ମଣ୍ଡଳ, ଜିପିଈଓ ସୁରେଶ ଚନ୍ଦ୍ର ହୋତା ପ୍ରମୁଖ ଉପସ୍ଥିତ ଥିଲେ। ପଞ୍ଚାୟତ ସମିତି ଅଧ୍ୟକ୍ଷା ଉପସ୍ଥିତ ବିଭାଗୀୟ ଅଧିକାରୀଙ୍କୁ ସେମାନଙ୍କ ବିଭାଗର କାର୍ଯ୍ୟ ସମ୍ପର୍କରେ ଆଲୋଚନା ପାଇଁ କହିଥିଲେ। ଏହି ସମୟରେ କୁନ୍ଦୁରା ବ୍ଳକ ଦିଗାପୁର୍ ପଞ୍ଚୟାତ ସଦର ମହକୁମାରେ ଥିବା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଡ଼ାକ୍ତର ରହୁ ନ ଥିବା ସରପଞ୍ଚ ଅଭିଯୋଗ କରିଥିଲେ। ତେବେ ସେଠାାରେ ନିଯୁକ୍ତ ଡାକ୍ତର ଶୁଭ ପ୍ରସାଦ ସାହୁ ଚୁକ୍ତିଭିତ୍ତିକ ହୋଇଥିବା ବେଳେ ସେଠାରେ ରହୁ ନ ଥିବା କହିଥିଲେ। ସେହିଭଳି କୁନ୍ଦୁରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଜଣେ ଭାରପ୍ରାପ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ରହିଥିବା ବେଳେ ଜଣେ ସ୍ଥାୟୀ ଡ଼ାକ୍ତରଙ୍କୁ ନିଯୁକ୍ତି କରିବାକୁ ଜିଲା ପରିଷଦ ସଭ୍ୟ କନକଲତା ପେଣ୍ଠିଆ ଦାବି କରିଥିଲେ। କୁନ୍ଦୁରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ କାର୍ଯ୍ୟରତ ଦୁଇ ଜଣ ଡ଼ାକ୍ତରଙ୍କୁ କୋରାପୁଟ ଏବଂ ଜୟପୁରଠାରେ ରଖାଯାଇଥିବା ବେଳେ କୁନ୍ଦୁରା ବ୍ଳକରେ ୧ ଲକ୍ଷ ଲୋକଙ୍କୁ ୬ ଜଣ ଡ଼ାକ୍ତର କାର୍ଯ୍ୟ କରୁଥିବା କହିଥିଲେ। ଗତ ୫ ମାସ ତଳେ ବ୍ଳକ ରେ ୬୪ ନଳକୂପ ଖନନ ହୋଇଥିବା ବେଳେ ସେଥିରୁ ୧୨ଟି ଅଚଳ ହୋଇ ପଡିଥିବା ଲୋକ ପ୍ରତିନିଧି ଅଭିଯୋଗ କରିଥିଲେ। ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନାରେ ଗୃହ ନିର୍ମାଣ ପାଇଁ ଘରବାରୀ ପଟ୍ଟା ଆବଶ୍ୟକ ପଡୁଥିବା ବେଳେ ଘରବାରି ଚିହ୍ନଟ ପାଇଁ ବାଣୁଆଗୁଡ଼ା ଏବଂ ମସିଗାଁ ରାଜସ୍ବ ନିରୀକ୍ଷକ ଜଣକ ପିଛା ୨୦ ହଜାର ଟଙ୍କା ଲାଞ୍ଚ ମାଗୁଥିବା ବାଣୁଆଗୁଡ଼ା ସରପଞ୍ଚ ଅଭିଯୋଗ କରିଥିଲେ। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତହସିଲଦାର ଆୟୁବ ମଣ୍ଡଳ କହିଥିଲେ। ସେହିଭଳି ୫-ଟି ନିର୍ମାଣାଧୀନ ବିଦ୍ୟାଳୟଗୁଡିକର ପଟ୍ଟା ନ ଥିବା ଗୋଷ୍ଠୀ ଶିକ୍ଷା ଅଧିକାରୀ ତିଳତ୍ତୋମା ଗରଡ଼ା କହିଥିଲେ। ବିଦ୍ୟାଳୟ ଜମି ପଟ୍ଟା ପ୍ରଦାନକୁ ନେଇ ୯୩ଟି ସ୍କୁଲର ୫୬ଟି ପଟ୍ଟା ପ୍ରଦାନ କରାଯାଇଛି। ବଳକା ପଟ୍ଟା ପ୍ରଦନ ନେଇ ପ୍ରକ୍ରିୟା ଚାଲୁ ରହିଛି। ୧୧ଟି ଜଙ୍ଗଲ ଜମିରେ ସମସ୍ୟା ଥିବାରୁ ଏହା ଅଟକିଥିବା ତହସିଲଦାର କହିଥିଲେ। ପରେ ମୂର୍ତ୍ତିକା ସଂରକ୍ଷଣ ବିଭାଗ, ଗ୍ରାମ୍ୟ ଉନ୍ନୟନ ବିଭାଗ, ଉଦ୍ୟାନ ବିଭାଗ, ମଙ୍ଗଳ ବିଭାଗ, ଓ ମିଶନ ଶକ୍ତି ବିଭାଗୀୟ ଅଧିକାରୀ ନିଜ ନିଜ ବିଭାଗର କାର୍ଯ୍ୟ ସମ୍ପର୍କରେ ସୂଚନା ଦେଇଥିଲେ l
