ଛତ୍ରପୁର,୩୦ା୭(ଦିଲ୍ଲୀପ ସାମଲ/ଦ୍ୱାରିକା ପଟ୍ଟନାୟକ): ଓଡ଼ିଶା କୃଷକ ସଭା ଗଞ୍ଜାମ ଜିଲା କମିଟି ପକ୍ଷରୁ ଚାଷୀଙ୍କ ହିତ ପାଇଁ ୮ ଦଫା ଦାବି ନେଇ ଗଞ୍ଜାମ ଜିଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ସଭାପତି ତଥା ରାଜ୍ୟ ଉପସଭାପତି ପି. ହରିକୃଷ୍ଣ ରେଡ୍ଡୀଙ୍କ ନେତୃତ୍ୱରେ ପ୍ରଦାନ କରାଯାଇଛି। ଗଞ୍ଜାମ ଜିଲାରେ ବର୍ଷାର ଅନିୟମିତତା ଯୋଗୁ ବର୍ତ୍ତମାନ ଧାନରୁଆ ଆରମ୍ଭ ହୋଇଛି। ଏହା ଏକ ମାସରେ ଶେଷ ହେବ। ପ୍ରଧାନମନ୍ତ୍ରୀ ଫସଲ ବୀମା ଯୋଜନା ଜୁଲାଇ ୩୧ ସୀମା ଧାର୍ଯ୍ୟ କରିଛନ୍ତି। ଏହା ଦ୍ବାରା ବହୁ ଚାଷୀ ଫସଲ ବୀମା କରିବାରେ ବଞ୍ଚିତ ହେବେ। ଏଣୁ ଫସଲ ବୀମା ଅବଧି ଅଗଷ୍ଟ ୩୧ତାରିଖ ପର୍ଯ୍ୟନ୍ତ ବୃଦ୍ଧି କରିବା ସହ ଜିଲାପାଳ, ବ୍ଲକ ଓ କୃଷି କାର୍ଯ୍ୟାଳୟରେ ଫସଲ ବୀମା ଦପ୍ତର ଖୋଲିବା, ଚାଷୀର ଧାନ ବିକ୍ରି ପାଇଁ ପଞ୍ଜିକରଣକୁ ସରଳ କରିବା, କଟକଣାରୁ ମୁକ୍ତ କରି ଏ ଫିଡେଫିଟ୍ ଦ୍ବାରା ଜମିର ପରିମାଣ ଓ ପଟ୍ଟା ପାଉତିକୁ ଗ୍ରହଣ, ସମବାୟ ସମିତଗୁଡ଼ିକୁ ପର୍ଯ୍ୟାପ୍ତ ପରିମାଣ ସାର ଯୋଗାଣ କରିବା ଓ ସାରର କଳା ବଜାର ବନ୍ଦ, ପ୍ରତ୍ୟେକ ଗାଁରେ ଅଚଳ ବା ଉଠା ଜଳସେଚନ ପଏଣ୍ଟଗୁଡ଼ିକୁ ସକ୍ଷମ, ହାଡ଼ିବନ୍ଧ ନିର୍ମାଣଓ ସବୁ ଅଞ୍ଚଳରେ ଜଳ ପ୍ରକଳ୍ପ କରି ଜଳସେଚନ ପାଇଁ ବ୍ୟବସ୍ଥା, ଚାଷୀମାନଙ୍କୁ ରିହାତି ଦରରେ ପମ୍ପ ସେଟ୍ ଓ ଔଷଧ ସିଞ୍ଚନ ଯନ୍ତ୍ର, ସୋଲାର ସିଷ୍ଟମରେ ପାଣି ମେଶିନ ଯୋଗାଣ, ଖରିଫ ଫସଲ ପାଇଁ ପ୍ରତ୍ୟେକ ଚାଷୀଙ୍କୁ ବିନା ସୁଧରେ ୧ ଲକ୍ଷ ଟଙ୍କା ପର୍ଯ୍ୟନ୍ତ ନୂତନ ଋଣ ପ୍ରଦାନ ଏବଂ ସମସ୍ତ ବ୍ଲକରେ ଶୀତଳଭଣ୍ଡାର ନିର୍ମାଣ ଆଦି ଦାବି ଉଲ୍ଲେଖ କରିଛନ୍ତି। ଏହି ଦାବିପତ୍ର ପ୍ରଦାନବେଳେ ଏସ୍. ରବୀନ୍ଦ୍ର ନାଥ ଆଚାରୀ ଓ ଦେବରାଜ ବେହେରାଙ୍କ ସମେତ ବହୁ ଚାଷୀ ଉପସ୍ଥିତ ଥିଲେ।
