ନୂଆଦିଲ୍ଲୀ,୬।୯: ଦିଲ୍ଲୀ ପୋଲିସର ସ୍ପେଶାଲ ସେଲ୍ ଏକ ଅନ୍ତର୍ଜାତୀୟ ଡ୍ରଗ୍ସ ର଼୍ୟାକେଟର ପର୍ଦ୍ଦାଫାଶ କରିଛି। ଏହି ର଼୍ୟାକେଟରେ ପୋଲିସ ୨ଆଫଗାନିସ୍ତାନ ନାଗରିକଙ୍କୁ ଗିରଫ କରିବା ସହ ୧୨ଶହ କୋଟି ଟଙ୍କାର ଡ୍ରଗ୍ସ ଜବତ କରିଛି। ଏହା ସିଣ୍ଡିକେଟ ନାର୍କୋ ଆତଙ୍କବାଦ ସହିତ ଜଡିତ ରହିଛି। ଏହି ଡ୍ରଗ୍ସକୁ ବିକ୍ରି କରି ଏହାର ଟଙ୍କାକୁ ଭାରତ ବିରୋଧରେ ଆତଙ୍କବାଦୀ କାର୍ଯ୍ୟକଳାପରେ ବ୍ୟବହାର କରିବାକୁ ଯୋଜନା କରାଯାଇଥିଲା। ହେଲେ ଏହା ପୂର୍ବରୁ ଏସମସ୍ତ ଯୋଜନାକୁ ପଣ୍ଡ କରିଛି ଦିଲ୍ଲୀର ସ୍ପେଶାଲ ସେଲ୍। ପ୍ରଥମ ପର୍ଯ୍ୟାୟରେ ଏହି ଡ୍ରଗ୍ସ ଚେନ୍ନାଇରୁ ଲକ୍ଷ୍ନୌ ପରେ ଦିଲ୍ଲୀକୁ ଅଣାଯାଇଥିଲା। ଏହି ଡ୍ରଗ୍ସର ମୂଲ୍ୟ ଅନ୍ତର୍ଜାତୀୟ ବଜାରରେ ପ୍ରାୟ ୧୨୦୦ କୋଟି ଟଙ୍କା। ଜବତ ହୋଇଥିବା ଡ୍ରଗ୍ସରେ ୩୧୨.୫ କିଲୋଗ୍ରାମ ମେଥାମଫେଟାମାଇନ୍ ଓ ୧୦କିଲୋଗ୍ରାମ ହିରୋଇନ୍ ସାମିଲ ରହିଛି ବୋଲି ପୋଲିସର ସ୍ପେଶାଲ ସିପି ଏଚ୍ଜିଏସ୍ ଧଲିଓ୍ବାଲ ଏକ ଖବରଦାତା ସମ୍ମିଳନୀ କରି ସୂଚନା ଦେଇଛନ୍ତି। ଅନ୍ୟପଟେ ଗିରଫ ହୋଇଥିବା ୨ଆଫଗାନିସ୍ତାନ ନାଗରିକ ଭାରତରେ ଶରଣାର୍ଥୀ ଭାବେ ରହୁଥିଲେ। ଏଥିସହ ସେମାନେ ନିଜର ଭିସା ଅବଧିକୁ ମଧ୍ୟ ବୃଦ୍ଧି କରିଥିଲେ। ଦିଲ୍ଲୀ ପୋଲିସର ସ୍ପେଶାଲ ସେଲ୍ ଏମାନଙ୍କ ଉପରେ ନଜର ରଖିଥିଲା। ଇତିମଧ୍ୟରେ ପୋଲିସ ସୂଚନା ପାଇବା ମାତ୍ରେ କାଳିନ୍ଦି କ୍ରୁଜ୍ ନିକଟରୁ ଆଫଗାନିସ୍ତାନ ନାଗରିକ ମୁସ୍ତଫା ଓ ରହିମଙ୍କୁ ଗିରଫ କରିଥିଲା।
