ନୂଆଦିଲ୍ଲୀ,୮ ।୧: ବ୍ରିଟେନରେ କରୋନା ଭାଇରସର ନୂଆ ଷ୍ଟ୍ରେନ୍ ଆସିବା ପରେ ଏହା ଏବେ ଅନ୍ୟ ଦେଶକୁ ବି ବ୍ୟାପି ସାରିଲାଣି । ଭାରତରେ ଏମିତି ନୂଆ ସଂକ୍ରମିତଙ୍କୁ ଚିହ୍ନଟ କରାଯିବା ପରେ ଏହା ଦେଶବାସୀଙ୍କ ଚିନ୍ତା ବଢାଇ ଦେଇଛି । ଏହାରି ଭିତରେ ବ୍ରିଟେନକୁ ବିମାନସେବା ବନ୍ଦ ଥିବା ବେଳେ ଜାନୁୟାରୀ ପ୍ରଥମ ସପ୍ତାହରେ ଏହା ପୁଣିଥରେ ଚଳାଚଳ କରିବାର ଯୋଜନା ରହିଛି । ହେଲେ ଏହି ଅବଧିକୁ ୩୧ ଜାନୁୟାରୀ ପର୍ଯ୍ୟନ୍ତ ବୃଦ୍ଧି କରିବାକୁ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଶୁକ୍ରବାର କେନ୍ଦ୍ର ସରକାରଙ୍କୁ ଅନୁରୋଧ କରିଛନ୍ତି । ଏହାଦ୍ୱାରା ସାଧାରଣ ଜନତାଙ୍କ ସ୍ୱାସ୍ଥ୍ୟ ଭଲ ରହିବ ବା କରୋନାର ନୂଆ ଷ୍ଟ୍ରେନଠାରୁ ଦେଶବାସୀ ଦୂରେଇ ରହିବେ ବୋଲି କେଜରିୱାଲ କହିଛନ୍ତି । କେଜରିୱାଲ ଟୁଇଟ୍ କରି ଲେଖିଛନ୍ତି, ବ୍ରିଟେନ ବିମାନ ସେବା ପୁଣିଥରେ ଆରମ୍ଭ କରାଯିବାକୁ ନିଷ୍ପତ୍ତି ନିଆଯାଇଛି । ହେଲେ ବର୍ତ୍ତମାନ ବ୍ରିଟେନରେ କରୋନାର ଯେଉଁ ସ୍ଥିତି ରହିଛି ତାହା ଅତ୍ୟନ୍ତ ଜଟିଳ । ଏପଟେ ଦେଶବାସୀ ବହୁ କଷ୍ଟରେ କରୋନା ମହାମାରୀଠାରୁ ସାମାନ୍ୟ ଆଶ୍ୱସ୍ତ ହୋଇଥିବା ବେଳେ ପୁଣିଥରେ ବ୍ରିଟେନ ବିମାନ ସେବା ଆରମ୍ଭ କଲେ ଏହା ବୃଦ୍ଧି ପାଇବ ବୋଲି ସେ ମତ ରଖିଛନ୍ତି । ତେଣୁ ଏହି ପ୍ରତିବନ୍ଧକକୁ ହଟାଇ ଦେଶବାସୀଙ୍କୁ ଆଉ ଅସୁବିଧାରେ ପକା ନ ଯାଉ ବୋଲି ସେ ଲେଖିଛନ୍ତି ।
