ଦୁବାଇ,୧୦।୧୦: ଆଇପିଏଲ ୨୦୨୧ରେ ଦିଲ୍ଲୀ କ୍ୟାପିଟାଲ୍ସ (ଡିସି) ଏବଂ ଚେନ୍ନାଇ ସୁପର କିଙ୍ଗ୍ସ (ସିଏସକେ) ମଧ୍ୟରେ ପ୍ରଥମ ଯୋଗ୍ୟତା ପର୍ଯ୍ୟାୟ ମ୍ୟାଚ ଆଜି ଦୁବାଇ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯାଉଛି। ଏହି ମ୍ୟାଚରେ ପ୍ରଥମେ ଟସ୍ ଜିତି ଚେନ୍ନାଇ ବୋଲିଂ ନିଷ୍ପତ୍ତି ନେଇଛି।
ଚେନ୍ନାଇର ଅଭିଜ୍ଞତା ଏବଂ ଦିଲ୍ଲୀର ଯୁବକମାନଙ୍କ ମଧ୍ୟରେ କଡ଼ା ପ୍ରତିଯୋଗିତା ହେବ। ଏହି ମ୍ୟାଚ ଜିତୁଥିବା ଦଳ ସିଧାସଳଖ ଆଇପିଏଲର ଫାଇନାଲରେ ପହଞ୍ଚିବ। ଏହା ବ୍ୟତୀତ ଏହି ମ୍ୟାଚ ହାରିଥିବା ଦଳ ଫାଇନାଲରେ ପ୍ରବେଶ କରିବାର ଆଉ ଏକ ସୁଯୋଗ ପାଇବ। ସେହି ଦଳ ଏଲିମିନେଟର ମ୍ୟାଚର ବିଜେତା ଦଳ ସହିତ ପ୍ରତିଦ୍ୱନ୍ଦ୍ୱିତା କରିବ।
ଧୋନୀଙ୍କ ନେତୃତ୍ୱରେ ଚେନ୍ନାଇର ଦଳ ଗତ ସିଜିନର ଖରାପ ପ୍ରଦର୍ଶନକୁ ଭୁଲିଯିବା ପରେ ପୁଣି ଥରେ ପ୍ଲେ ଅଫରେ ପହଞ୍ଚିଛି। ଆଜିର ମ୍ୟାଚ ଯଦି ଚେନ୍ନାଇ ଜିତେ ତେବେ ରେକର୍ଡ ୯ମ ଥର ଫାଇନାଲରେ ପ୍ରବେଶ କରିବ। ଏଥି ସହିତ ଗତ ସିଜନରେ ପ୍ରଥମ ଥର ପାଇଁ ଆଇପିଏଲର ଫାଇନାଲରେ ଦିଲ୍ଲୀର ଦଳ ହାରି ଯାଇଥିଲା। ଏଭଳି ପରିସ୍ଥିତିରେ ଦଳ ପୁଣି ଫାଇନାଲରେ ପହଞ୍ଚିବାକୁ ଚେଷ୍ଟା କରିବ।
ଆଇପିଏଲରେ ଏପର୍ଯ୍ୟନ୍ତ ଦିଲ୍ଲୀ କ୍ୟାପିଟାଲ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମଧ୍ୟରେ ମୋଟ ୨୫ଟି ମ୍ୟାଚ ଖେଳାଯାଇଛି। ଏଥିମଧ୍ୟରେ ଚେନ୍ନାଇ ଦଳ ୧୫ଟି ମ୍ୟାଚ ଜିତିଥିବା ବେଳେ ଦିଲ୍ଲୀ ୧୦ଟି ମ୍ୟାଚ ଜିତିଛି। ଏହା ବ୍ୟତୀତ ୟୁଏଇରେ ଉଭୟ ଦଳ ଏଠାରେ ୪ ଥର ମୁହାଁମୁହିଁ ହୋଇଛନ୍ତି। ଏଥିରେ ଦିଲ୍ଲୀର ଦଳ ୩-୧ ବ୍ୟବଧାନରେ ଆଗରେ ରହିଛି। ଏହାପୂର୍ବରୁ ଦୁବାଇରେ ଦିଲ୍ଲୀ ଏବଂ ଚେନ୍ନାଇ ମଧ୍ୟରେ ଖେଳାଯାଇଥିବା ଉଭୟ ମ୍ୟାଚରେ ଦିଲ୍ଲୀ ଜିତିଥିଲା।
ଦିଲ୍ଲୀ କ୍ୟାପିଟାଲ୍ସ୍-
ଶିଖର ଧାୱନ, ପୃଥ୍ବୀ ଶ’, ଶ୍ରେୟସ ଆୟର୍, ରିଷଭ ପନ୍ତ (ଅଧିନାୟକ), ଶିମ୍ରନ ହେଟମିୟର, ଅକ୍ଷର ପଟେଲ, ଆର ଅଶ୍ୱିନ, କାଗିସୋ ରାବାଡା, ଟମ୍ କରନ୍, ଏନରିଚ୍ ନୋର୍ତେଜେ, ଆଭେଶ ଖାନ।
ଚେନ୍ନାଇ ସୁପର କିଙ୍ଗ୍ସ –
ଫାଫ ଡୁ ପ୍ଲେସିସ, ରୁତୁରାଜ ଗାଇକ୍ୱାଡ, ମୋଏନ ଅଲି, ରବିନ ଉଥାପ୍ପା, ଅମ୍ବାତି ରାୟୁଡୁ, ମହେନ୍ଦ୍ର ସିଂ ଧୋନୀ(ଅଧିନାୟକ), ରବିନ୍ଦ୍ର ଜାଡେଜା, ଡ୍ବେନ ବ୍ରାଭୋ, ଶାର୍ଦ୍ଦୁଲ ଠାକୁର, ଦୀପକ ଚହର, ଜୋଶ ହେଜେଲଉଡ।
