ଢେଙ୍କାନାଳ, ୨୩।୮(ରତନ ନାୟାର): ଢେଙ୍କାନାଳ ପୌରସଂସ୍ଥାରେ ଦୁର୍ନୀତି ଚେର ଗଭୀରକୁ ଲମ୍ବିଛି। ଯେତିକି ଖୋଳତାଡ଼ ହେଉଛି, ସେତେ ବଡ଼ ବଡ଼ ଆର୍ଥିକ ଅନିୟମିତତା ଧରାପଡୁଛି। ଷ୍ଟ୍ରିଟ୍ ଲାଇଟ୍ ଲଗାଇବା ଏବଂ ବିଭିନ୍ନ ପ୍ରକଳ୍ପରେ ଠିକାଦାରଙ୍କ ପକ୍ଷରୁ ଡିପୋଜିଟ୍ ହୋଇଥିବା ଆର୍ନେଷ୍ଟ ମନି ଡିପୋଜିଟ୍ (ଇଏମ୍ଡି) ବାବଦ ୮୦ ଲକ୍ଷ ଟଙ୍କା ହଡ଼ପ ଅଭିଯୋଗର ଭିଜିଲାନ୍ସ ତନାଘନା ଆରମ୍ଭ ହୋଇଥିବାବେଳେ ଏବେ ୧୦ଟି ମନି ରିସିପ୍ଟ ମିଳୁ ନ ଥିବା ଜଣାପଡ଼ିଛି। ଫଳରେ ସହରାଞ୍ଚଳର ହୋଲ୍ଡିଂ ଟାକ୍ସ, ମାହାସୁଲ ସମେତ ଅନ୍ୟାନ୍ୟ କର ବାବଦରେ ଆଦାୟ ହୋଇଥିବା ୫୦ ଲକ୍ଷରୁ ଊର୍ଦ୍ଧ୍ୱ ଟଙ୍କାର ହିସାବ ମିଳୁନାହିଁ। ଲୋକାଲ ଫଣ୍ଡ ଅଡିଟ୍ରୁ ଏଭଳି କେଳେଙ୍କାରୀ ଧରାପଡ଼ିଛି। ତେବେ ଏତେବଡ଼ ଦୁର୍ନୀତିରେ କେବଳ ଅଧସ୍ତନ କର୍ମଚାରୀ ନୁହନ୍ତି, ଅନେକ ବଡ଼ବଡ଼ିଆଙ୍କ ହାତ ରହିଥିବା ଆଶଙ୍କାକୁ ଏଡ଼ାଇ ଦିଆଯାଇପାରୁନାହିଁ।
ଢେଙ୍କାନାଳ ପୌରସଂସ୍ଥାରେ ୨୦୨୧-୨୨ ଆର୍ଥତ୍କ ବର୍ଷରେ ମଞ୍ଜୁର ହୋଇଥିବା ଅନୁଦାନ, ବିନିଯୋଗ, ପୌରସଂସ୍ଥାର ଆୟ ଏବଂ ବିଭିନ୍ନ ସାମଗ୍ରୀ କିଣାରେ ହୋଇଥିବା ଖର୍ଚ୍ଚ ସମ୍ପର୍କରେ ସବିଶେଷ ତଥ୍ୟ ଜାଣିବା ଲାଗି ଲୋକାଲ ଫଣ୍ଡ୍ ଅଡିଟ୍ ବିଭାଗ ପକ୍ଷରୁ ଅଡିଟ୍ କରାଯାଇଥିଲା। ୨୦୨୨ ଡିସେମ୍ବର ୧ରୁ ୨୦୨୩ ମାର୍ଚ୍ଚ ୨୫ ଯାଏ ଖୋଳତାଡ଼ କରାଯାଇଥିବାବେଳେ ଗତ ମେ’ ୧୨ରେ ରିପୋର୍ଟ ଦାଖଲ କରାଯାଇଥିଲା। ଷ୍ଟକ୍ ରେଜିଷ୍ଟର ଯାଞ୍ଚ କରିବା ବେଳେ ମନି ରିସିପ୍ଟ ବହି ଫେରସ୍ତ ହୋଇ ନ ଥିବା ଜଣାପଡ଼ିଥିଲା। କେବଳ ଏତିକି ନୁହେଁ, ରେଜିଷ୍ଟରରେ ଏ ସମ୍ପର୍କରେ କୌଣସି ତଥ୍ୟ ମଧ୍ୟ ଉଲ୍ଲେଖ କରାଯାଇ ନ ଥିଲା। ସିରିଏଲ ନଂ. ୧ରୁ ୧୦ ପର୍ଯ୍ୟନ୍ତ ଥିବା ମନି ରିସିପ୍ଟ ବାବଦ ବହି ୫୧୩, ୫୨୬, ୫୩୪, ୫୪୪, ୫୦୦, ୪୩୮, ୪୬୯, ୪୮୩, ୪୮୪, ୪୯୧ ସମ୍ପର୍କରେ କୌଣସି ସୂଚନା ମିଳି ନ ଥିଲା।
ଏଭଳି ମହାଦୁର୍ନୀତିରେ ଜଣେ ତଳିଆ କର୍ମଚାରୀଙ୍କ ସମ୍ପୃକ୍ତି ଚର୍ଚ୍ଚା ହେଉଥିବାବେଳେ ସେ ସ୍ବାସ୍ଥ୍ୟଗତ କାରଣ ଦର୍ଶାଇ ଛୁଟିରେ ଅଛନ୍ତି। ସେହିପରି ନିର୍ବାହୀ ଅଧିକାରୀ ମଧ୍ୟ ମଙ୍ଗଳବାରଠାରୁ ଛୁଟିରେ ଅଛନ୍ତି। ତେଣୁ ତାଙ୍କ ପ୍ରତିକ୍ରିୟା ମଧ୍ୟ ମିଳିପାରିନାହିଁ। ଫଳରେ ସମସ୍ତ ଘଟଣା ରହସ୍ୟାବୃତ୍ତ ହୋଇ ରହିଛି। କେବଳ ତଳିଆ କର୍ମଚାରୀ ନୁହନ୍ତି, ଏଥିରେ ଏକାଧିକ ପୂର୍ବତନ ଏବଂ ଏବେକାର କର୍ମଚାରୀ, ଅଧିକାରୀଙ୍କ ସମ୍ପୃକ୍ତି ରହିଥିବା ଆଲୋଚନା ହେଉଛି। ଭିଜିଲାନ୍ସ ପକ୍ଷରୁ ନିରପେକ୍ଷ ତଦନ୍ତ ହେଲେ ଆହୁରି ଅନେକ ଦୁର୍ନୀତି ପଦାକୁ ଆସିବ ବୋଲି ସାଧାରଣରେ ମତ ପ୍ରକାଶ ପାଇଛି।
ଏ ସଂକ୍ରାନ୍ତରେ ପୌରାଧ୍ୟକ୍ଷା ଜୟନ୍ତୀ ପାତ୍ର କୁହନ୍ତି, ଅଡିଟ୍ ରିପୋର୍ଟରୁ ମନି ରିସିପ୍ଟ ବହି ମିଳୁ ନ ଥିବା ଜଣାପଡ଼ିଥିଲା। ଏହାର ତଦନ୍ତ କରିବା ଲାଗି ଭିଜିଲାନ୍ସ ବିଭାଗକୁ ଲିଖିତ ଭାବେ ଜଣାଯାଇଛି। ୧୪ଟି ମନି ରିସିପ୍ଟ ବହି ହଜିଥିବା ଅନୁମାନ କରାଯାଉଛି। ଭିଜିଲାନ୍ସ ତଦନ୍ତ ହେଲେ ସମସ୍ତ ତଥ୍ୟ ପଦାକୁ ଆସିବ।
