ଫୁଲବାଣୀ,୧୭ା୧୦(ରାକେଶ କୁମାର ରାଉତ): କିଛି ଦିନ ହେବ କନ୍ଧମାଳ ଜିଲା ଫିରିଙ୍ଗିଆ ବ୍ଲକର ୬ ଜଣ ସରପଞ୍ଚଙ୍କୁ ଫୋନରେ ହତ୍ୟା ଧମକ ଦିଆଯାଇଥିବା ଅଭିଯୋଗ ହୋଇଛି। ଲାଲ ବାହିନୀରୁ କହୁଛି କହି ବହୁ ପରିମାଣର ଅର୍ଥ ଦାବି କରାଯାଇଛି। ଏହା ନ ଦେଲେ ହତ୍ୟା କରାଯିବ ବୋଲି କୁହାଯାଉଛି। ୬ ଜଣ ସରପଞ୍ଚଙ୍କୁ ଅର୍ଥ ଦେବା ଲାଗି ଭିନ୍ନଭିନ୍ନ ଦିନ ସ୍ଥିର କରାଯାଇଥିବା ନେଇ ସରପଞ୍ଚମାନେ ଏତଲା ଦେଇଛନ୍ତି। ପୋଲିସ ଘଟଣାର ତଦନ୍ତ ଆରମ୍ଭ କରିଥିଲେ ସୁଦ୍ଧା ଏ ଯାଏ କୌଣସି ସିଦ୍ଧାନ୍ତରେ ପହଞ୍ଚି ପାରୁ ନାହିଁ ।
ପ୍ରକୃତରେ ମାଓମାଦୀ ନା ଆଉ କିଏ ଧମକ ଦେଉଛି ତାହାକୁ ନେଇ ମଧ୍ୟ ସନ୍ଦେହ ସୃଷ୍ଟି ହୋଇଛି ।
ଫିରିଙ୍ଗିଆ ବ୍ଲକରେ ମାଓବାଦୀଙ୍କ ଗତିବିଧି ରହିଛି । ୩/୪ ଦିନ ହେବ ୬ ଜଣ ସରପଞ୍ଚଙ୍କୁ ଗୋଟିଏ ନମ୍ବରରୁ ଫୋନ କରାଯାଇଛି । ବ୍ୟକ୍ତି ଜଣକ ପ୍ରଥମେ ଲାଲ ସାଲାମ କହି ଲକ୍ଷାଧିକ ଟଙ୍କା ମାଗୁଛନ୍ତି । ଆଗକୁ ଶହୀଦ ସପ୍ତାହ ଆସୁଥିବାରୁ ଟଙ୍କା ଖର୍ଚ୍ଚ କରାଯିବ । କିଛି ଦିନ ହେବ ମାଓବାଦୀ ସଂଗଠନକୁ କେନ୍ଦ୍ରୀୟ କମିଟିରୁ ଟଙ୍କା ଆସୁ ନଥିବାରୁ କୌଣସି କାର୍ଯ୍ୟକ୍ରମ ହୋଇପାରୁ ନାହିଁ ବୋଲି ସରପଞ୍ଚ ମାନଙ୍କୁ କୁହାଯାଇଛି । କେଉଁ ସରପଞ୍ଚ କେଉଁ ଦିନ ଟଙ୍କା ଦେବ ସେଥିନେଇ ସେମାନଙ୍କୁ ତାରିଖ କୁହାଯାଇଛି। ଟଙ୍କା ନ ଦେଲେ ସୁମେରବନ୍ଧ ପୂର୍ବତନ ସରପଞ୍ଚ ସୁବଳ ପ୍ରଧାନଙ୍କୁ ହତ୍ୟା କଲା ଭଳି ତୁମକୁ ହତ୍ୟା କାରାଯିବ ବୋଲି ଧମକ ଦିଆଯାଇଛି। ଏ ନେଇ ସଦର ଏସ୍ଡିପିଓ ସୁପ୍ରଶନ୍ନ ମଲ୍ଲିକଙ୍କୁ ପଚାରିବାରୁ ଫୋନ ନମ୍ବର କୁ ଯାଞ୍ଚ କରାଯାଉଛି । ଏଥିପାଇଁ ଏକ ଟିମ ଗଠନ କରାଯାଇଛି । ମାଓବାଦୀ ଅଞ୍ଚଳରେ କମ୍ବିଂ ଅପରେସନକୁ ଜୋରଦାର କରାଯାଇଛି ବୋଲି କହିଛନ୍ତି।
