ତାଳଚେର, ୨୬।୧୨(ନି.ପ୍ର.):ବରିଷ୍ଠ ଶ୍ରମିକ ନେତା, ଢେଙ୍କାନାଳ ଦତ୍ତାତ୍ରେୟ ସାଇ ଆଶ୍ରମର ପ୍ରତିଷ୍ଠାତା ତଥା ଅଧ୍ୟକ୍ଷ ଦ୍ୱାରିକା ମୋହନ ମିଶ୍ରଙ୍କ ରବିବାର ରାତି ୯ଟା ୪୫ଟାରେ ତାଳଚେର ରେମୁଅଁାସ୍ଥିତ ବାସଭବନରେ ପରଲୋକ ହୋଇଯାଇଛି। ତାଙ୍କୁ ୮୯ ବର୍ଷ ବୟସ ହୋଇଥିଲା। ସେ କିଛିଦିନ ହେଲା ଅସୁସ୍ଥ ଥିଲେ। ତାଙ୍କ ପରଲୋକରେ ରାଜ୍ୟର ଶ୍ରମିକ ସଙ୍ଗଠନ ମହଲରେ ଶୋକର ଛାୟା ଖେଳିଯାଇଛି।
ଛାତ୍ର ଜୀବନରୁ ଶ୍ରମିକ ଆନ୍ଦୋଳନ ସହିତ ଜଡ଼ିତ ଥିବା ଦ୍ୱାରିକା ମୋହନ ଦୀର୍ଘ ୪ ଦଶନ୍ଧିରୁ ଅଧିକ ସମୟ ଧରି କୋଇଲା, ଗମନାଗମନ, ଶକ୍ତି, ନିର୍ମାଣ, ସାର କାରଖାନାରେ କାର୍ଯ୍ୟରତ ଶ୍ରମିକଙ୍କୁ ସଙ୍ଗଠିତ କରିବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ସେ ବିଭିନ୍ନ ସମୟରେ ରାଜ୍ୟ ଶ୍ରମ ବୋର୍ଡ ପରାମର୍ଶଦାତା କମିଟି ସଦସ୍ୟ, ବିଦ୍ୟୁତ୍ ବୋର୍ଡ ପରାମର୍ଶଦାତା କମିଟି ସଭ୍ୟ ଭାବେ ମନୋନୀତ ହୋଇଥିବାବେଳେ ରାଜ୍ୟ ହସ୍ତତନ୍ତ ଉନ୍ନୟନ ସଂସ୍ଥା ଅଧ୍ୟକ୍ଷ, ଅନୁସୂଚିତ ଜାତି କଲ୍ୟାଣ କର୍ପୋରେଶନ ଅଧ୍ୟକ୍ଷ ଏବଂ ଓଡ଼ିଶା ଗୃହ ନିର୍ମାଣ ବୋର୍ଡ ଅଧ୍ୟକ୍ଷ ଦାୟିତ୍ୱ ତୁଲାଇଥିଲେ। ଏଥିସହିତ ସେ ପ୍ରଦେଶ କଂଗ୍ରେସ ଶ୍ରମ ସେଲ୍ ଆବାହକ, ପ୍ରଦେଶ କଂଗ୍ରେସ କମିଟି ବୁଦ୍ଧିଜୀବୀ ସେଲ୍ ଅଧ୍ୟକ୍ଷ ଭାବେ ମଧ୍ୟ ଦାୟିତ୍ୱ ନିର୍ବାହ କରିଥିଲେ। ଜଣେ ସାଇ ଅନୁଗାମୀ ଭାବେ ସେ ରାଜ୍ୟ ତଥା ରାଜ୍ୟ ବାହାରେ ବେଶ୍ ପରିଚିତ ଥିଲେ। ତାଙ୍କ ରଚିତ ‘ଶ୍ରୀ ଦତ୍ତସାଇ ମହିମା’, ‘ଶ୍ରଦ୍ଧାସବୁରି ଓ ସହନଶୀଳତା’ ପୁସ୍ତକ ଇଂଲିଶ ଭାଷାରେ ଅନୂଦିତ ହୋଇ ପାଠକୀୟ ଆଦୃତି ଲାଭ କରିଛି। ସେ ‘ଶ୍ରମିକ ଗୌରବ’, ‘ସାହିତ୍ୟ ଗୌରବ’, ‘ଉତ୍କଳ ବନ୍ଧୁ’, ‘ଉତ୍କଳ କେଶରୀ ସ୍ମାରକ’, ‘ପ୍ରତିଭା ପୂଜା’ ପୁରସ୍କାର ଭଳି ଅନେକ ସମ୍ମାନରେ ସମ୍ମାନିତ ହୋଇଛନ୍ତି।
ମୃତ୍ୟୁଶଯ୍ୟା ନିକଟରେ ବଡ଼ପୁଅ ଶାନ୍ତିବର୍ଦ୍ଧନ ମିଶ୍ର, ବଡ଼ବୋହୂ ଜାନକୀ ମିଶ୍ର, ସାନପୁଅ ଜୟବର୍ଦ୍ଧନ ମିଶ୍ର, ସାନବୋହୂ ମୋନାଲିସା ମିଶ୍ରଙ୍କ ସମେତ ଆତ୍ମୀୟସ୍ବଜନ ଉପସ୍ଥିତ ଥିଲେ। ବହୁ ମାନ୍ୟଗଣ୍ୟ ବ୍ୟକ୍ତି ଅନ୍ତିମ ଦର୍ଶନ କରିଥିଲେ। ସୂଚନାଯୋଗ୍ୟ, ତାଙ୍କ ସହଧର୍ମିଣୀ ଆଲ୍ଲାଦିନୀ ମିଶ୍ରଙ୍କର ୨୦୧୮ ଡିସେମ୍ବର ୨୪ରେ ପରଲୋକ ଘଟିଥିଲା।
