କୋରୁକୋଣ୍ଡା,୩ା୫(ଡି.ଏନ୍.ଏ.): ଜଣେ ନାବାଳିକାଙ୍କ ସନ୍ଦେହଜନକ ମୃତ୍ୟୁକୁ ନେଇ ୫ ଦିନ ପରେ ଦୁଇ ଗୋଷ୍ଠୀ ଥାନାର ଦ୍ୱାରସ୍ଥ ହୋଇଛନ୍ତି। ଏଭଳି ଘଟଣା ଦେଖିବାକୁ ମିଳିଛି ମାଲକାନଗିରି ଆଦର୍ଶ ଥାନା ପରିସରରେ।
ସୂଚନାନୁଯାୟୀ, କୋରୁକୋଣ୍ଡା ବ୍ଲକ ଅନ୍ତର୍ଗତ ଏମ୍ଭି-୪୯ ଗ୍ରାମର ହର କର୍ମକାରଙ୍କ ସାନ ଝିଅ ୫ ଦିନ ପୂର୍ବେ ଆମ୍ବଗଛରେ ଦଉଡ଼ି ଦେଇ ଆତ୍ମହତ୍ୟା କରିଥିଲେ। ଖବର ପାଇ ଏମ୍ଭି-୪୯ ଗ୍ରାମର ଗ୍ରାମବାସୀ ଝିଅର ମୃତଦେହକୁ ଘରକୁ ଆଣିବା ସହ ରାତାରାତି ଶେଷକୃତ୍ୟ ସମ୍ପନ୍ନ କରିଦେଇଥିଲେ। ଗ୍ରାମବାସୀ ଝିଅର ମୃତଦେହ ସତ୍କାର କରିଥିବା ବେଳେ ଝିଅଙ୍କ ବାପାକୁ ଏସମ୍ପର୍କରେ ଜଣାଇ ନ ଥିବା ବାପା ହର କରମାର ଥାନାରେ ଅଭିଯୋଗ କରିଛନ୍ତି। ତେବେ ଏହି ଘଟଣା ସମ୍ପର୍କରେ କୌଣସି ଏକ ସୂତ୍ରରୁ ଖବର ପାଇ ଜିଲାର ମାନବ ଅଧିକାର କର୍ମୀମାନେ ଏମ୍ଭି ୪୯ ଗ୍ରାମରେ ପହଞ୍ଚି ପରିବାରବର୍ଗଙ୍କ ସହ କଥା ହୋଇଥିଲେ। ଗ୍ରାମବାସୀ ମିଶି ଝିଅଟିକୁ ହତ୍ୟା କରିଥିବା ନେଇ ମାନବାଧିକାର କର୍ମୀଙ୍କ ପାଖରେ ମୃତ ସ୍ବପ୍ନାଙ୍କ ମା’ କହିଥିଲେ। ଏହାପରେ ମାନବ ଅଧିକାର କର୍ମୀମାନେ ପୋଲିସକୁ ନ ଜଣାଇ କାହିଁକି ମୃତ ଝିଅଟିର ମୃତଦେହକୁ ଅନ୍ତିମ ସଂସ୍କାର କଲ ବୋଲି ଗ୍ରାମବାସୀଙ୍କୁ ପ୍ରଶ୍ନ କରିବା ସହ ମାନବ ଅଧିକାରକର୍ମୀମାନଙ୍କ ସହାୟତାରେ ମୃତ ସ୍ବପ୍ନାଙ୍କ ପରିବାର ବୁଧବାର ଏମ୍ଭି ୪୯ ଗ୍ରାମର ଗ୍ରାମବାସୀଙ୍କ ନାମରେ ଥାନାରେ ଏତଲା ଦେଇଛନ୍ତି । ତେବେ ଗ୍ରାମବାସୀ ମୃତ ସ୍ବପ୍ନାଙ୍କ ପରିବାର ଗରିବ ହୋଇଥିବା ବେଳେ ଆମେ ସମସ୍ତ ଗ୍ରାମବାସୀ ମିଳିତ ଭାବେ ଝିଅଟି ଅନ୍ତିମ କ୍ରିୟା ସମ୍ପାଦନା କରିଥିଲୁ କିନ୍ତୁ ମାନବ ଅଧିକାର କର୍ମୀମାନେ ଆମକୁ ଭୟଭୀତ କରାଇବା ସହ ୨ ଲକ୍ଷ ଟଙ୍କା ଚାନ୍ଦା ନ ଦେଲେ ସମସ୍ତ ଗ୍ରାମବାସୀଙ୍କୁ ମିଛ କେସ୍ରେ ଫସାଇ ଦିଆଯିବ ବୋଲି ଧମକ ଦେଇଥିବାରୁ ଆମେ ସମସ୍ତ ଗ୍ରାମବାସୀ ଏକଜୁଟ ହୋଇ ସତ୍ୟ ସାମ୍ନାକୁ ଆସୁ ବୋଲି ଚିନ୍ତା କରିବା ସହ ମାନବଅଧିକାର କର୍ମୀଙ୍କ ନାମରେ ଅଭିଯୋଗ କରିଛୁ। ଅଙ୍ଗନଓ୍ବାଡି କର୍ମୀଙ୍କ ରିପୋର୍ଟରେ ଝିଅକୁ ସାପ କାମୁଡିଥିବା ବେଳେ ମୃତ ଝିଅର ବେକରେ ଦଉଡ଼ି ଚିହ୍ନ ଆସିଲା କେମିତି..? ଯାହା ଏବେ ସମ୍ପୂର୍ଣ୍ଣ ଘଟଣାକୁ ସନ୍ଦେହଘେରକୁ ଟାଣିନେଇଛି। ଏପଟେ ମାଲକାନଗିରି ଆଦର୍ଶ ଥାନାରେ ଉଭୟଙ୍କ ଅଭିଯୋଗକୁ ଗ୍ରହଣ କରାଯାଇ ଉଭୟଙ୍କ ନାମରେ କେସ୍ ରୁଜୁ କରାଯାଇଛି। ଏହା ସହ ଘଟଣାର ତଦନ୍ତ କରାଯାଉଛି। ପରେ ଉପଯୁକ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ମାଲକାନଗିରି ଆଦର୍ଶ ଥାନା ଅଧିକାରୀ ରିଗାନ କିଣ୍ଡୋ କହିଛନ୍ତି।
