ଦାରିଙ୍ଗବାଡ଼ି,୧୫।୨(ଡି.ଏନ୍.ଏ.): ଓଡ଼ିଶା ପ୍ରଦେଶ କଂଗ୍ରେସ କମିଟି ପକ୍ଷରୁ ୬ ଘଣ୍ଟିଆ ବନ୍ଦ ପାଳନର ପ୍ରଭାବ ଦାରିଙ୍ଗବାଡ଼ି ବ୍ଲକରେ ଦେଖିବାକୁ ମିଳିଛି। ଦଳର ବ୍ଲକ ସଭାପତି ପ୍ରଦୀପ ନାୟକଙ୍କ ତତ୍ତ୍ବାବଧାନରେ ବ୍ଲକ ଅଧ୍ୟକ୍ଷା ରୁଦା ମଲ୍ଲିକଙ୍କ ସହଯୋଗରେ ଦଳୀୟ କର୍ମୀଙ୍କ ପକ୍ଷରୁ ଚାରିଛକ,ସିମନବାଡ଼ିର ଜାତୀୟ ରାଜପଥରେ ବଡ଼ବଡ଼ କାଠ ଗଣ୍ଡି, ପଥର ରଖି ରାଜପଥ ଅବରୋଧ କରାଯାଇଥିଲା। ସେହିପରି ବ୍ରାହ୍ମଣାଁ ଶିବମନ୍ଦିର ଛକରେ ମଧ୍ୟ ରାସ୍ତା ଅବରୋଧ କରି ପ୍ରତିବାଦ କରାଯାଇଛି। ଦାରିଙ୍ଗବାଡ଼ି ବ୍ଲକ ଅଞ୍ଚଳରୁ କୌଣସି ଗାଡ଼ି ଚଳାଚଳ କରୁ ନ ଥିବା ବେଳେ ଦୋକାନ ବଜାର, ସରକାରୀ,ବେସରକାରୀ ସଂସ୍ଥା ସବୁ ବନ୍ଦ ରହିଥିଲା। ତୈଳଦର ବୃଦ୍ଧି ସହ ରନ୍ଧନ ଗ୍ୟାସ ଆଦି ବୃଦ୍ଧି ଯୋଗୁ ଜନସାଧାରଣ ହଟହଟା ହେଉଛନ୍ତି। ଗରିବ ଏବଂ ମଧ୍ୟବିତ୍ତ ଲୋକ ଚଳିବା ମୁସ୍କିଲ ବୋଲି କଂଗ୍ରେସ ପକ୍ଷରୁ ଅଭିଯୋଗ କରାଯାଇଛି। ପେଟ୍ରୋଲ ଡିଜେଲ ଦର ନ କମିଲେ ଆଗକୁ ଆହୁରି ବଡ଼ ଧରଣର ଆନ୍ଦୋଳନ କରାଯିବ ବୋଲି ଦଳ ପକ୍ଷରୁ ଚେତାବନୀ ଦିଆଯାଇଛି। ଆନ୍ଦୋଳନରେ ଅନ୍ୟମାନଙ୍କ ମଧ୍ୟରେ ଦଳର ବ୍ଲକ ସମ୍ପାଦକ ଶରତ ଚନ୍ଦ୍ର ପ୍ରଧାନ, ରାଜ୍ୟ ସଙ୍ଗଠନର ଏକଜିକ୍ୟୁଟିଭ୍ ସଦସ୍ୟ ପ୍ରଭଞ୍ଜନ ନାୟକ, ଦାରିଙ୍ଗବାଡ଼ି ସରପଞ୍ଚ ରାଧାକାନ୍ତ ପ୍ରଧାନ,ବରୁଣ ନାୟକ,ଉତ୍ତମ ପ୍ରଧାନ, ସୁରେନ୍ଦ୍ର ସାହୁ, ବିଦ୍ୟାଧର ମଲ୍ଲିକ, ନାଗେଶ୍ବର ପ୍ରଧାନ,ରାମଦେଉ ପ୍ରଧାନ, ରଜନ ପ୍ରଧାନ, ମୋହନ ପ୍ରଧାନ ପ୍ରମୁଖ ବିକ୍ଷୋଭ କରିଥିଲେ।
