କଟକ ଅଫିସ,୨୫।୮: କଟକ ସହରର ବ୍ୟବସାୟୀଙ୍କୁ ଏବେ ପୁଣି ଘାରିଛି ଦାଦାବଟି ଡର। ଗତ କିଛି ଦିନ ଭିତରେ ଦାଦାବଟି ଆଦାୟ ନେଇ ଅଭିଯୋଗର ତାଲିକା ବଢ଼ିବାରେ ଲାଗିଛି। ସୋମବାର ସମାନ ଅଭିଯୋଗରେ ବାଦାମବାଡ଼ି ଥାନା ପୋଲିସ ୩ ଜଣଙ୍କୁ ଗିରଫ କରିଛି। ପୁରୁଣା ଅଭିଯୋଗରେ ସମ୍ପୃକ୍ତ ଥିବା ଅଭିଯୁକ୍ତମାନେ ହିଁ ଏବେ ପୁଣି ଥରେ ସହରରେ ଦୌରାତ୍ମ୍ୟ ଆରମ୍ଭ କରିଛନ୍ତି।
ଘର ତିଆରି କଲେ ବଟି, ଦୋକାନ ଖୋଲିଲେ ବଟି। ବ୍ୟବସାୟିକ ପ୍ରତିଷ୍ଠାନ ହେଉ କି ବ୍ୟକ୍ତିଗତ କାର୍ଯ୍ୟ। ଯେକୌଣସି କାର୍ଯ୍ୟ ଆରମ୍ଭ କରିବା ପୂର୍ବରୁ ବଟି ଆଦାୟ କରିବାକୁ ପହଞ୍ଚତ୍ ଯାଉଛନ୍ତି ଅପରାଧୀ। ତାହାର ସଦ୍ୟତମ ଉଦାହରଣ ବାଦାମବାଡ଼ି ଥାନା ଅଞ୍ଚଳରେ ଦେଖିବାକୁ ମିଳିଛି। ମହମ୍ମଦ ଇମାମୁଲ କେଶରପୁର ଅଞ୍ଚଳରେ ଜାଗା କିଣି ଗୃହ ନିର୍ମାଣ ଆରମ୍ଭ କରିବା ପୂର୍ବରୁ ତାଙ୍କୁ ୩ଜଣ ଅଭିଯୁକ୍ତ ଦାଦାବଟି ମାଗିଥିଲେ। ଇମାମୁଲ ଏବେ ମହତାବ ରୋଡରେ ଘରଭଡ଼ା ନେଇ ରହୁଛନ୍ତି। କେଶରପୁରର ୱାସିମ ଖାନ (୨୨), ସେକ୍ ଜାବିଦ (୩୦), ମହମ୍ମଦ ସାହାଜାନ (୪୬) ତାଙ୍କୁ ୨ ଲକ୍ଷ ଟଙ୍କାର ଦାଦାବଟି ମାଗିଥିଲେ। ପ୍ରଥମେ ଇମାମୁଲ ୭୦ ହଜାର ଟଙ୍କା ଦେଇଥିଲେ। ଅବଶିଷ୍ଟ ଟଙ୍କା ଦେବାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା। ପରେ ଇମାମୁଲ ଟଙ୍କା ନ ଦେଇ ପାରି ଥାନାର ଦ୍ୱାରସ୍ଥ ହୋଇଥିଲେ। ପୋଲିସ ଘଟଣାର ତଦନ୍ତ ଆରମ୍ଭ କରି ୱାସିମ ଓ ଜାବିଦଙ୍କୁ ମହତାବ ରୋଡ଼ ଅଞ୍ଚଳରୁ ଉଠାଇ ଆଣି ପଚରାଉଚରା କରିଥିଲା। ପରେ ସାହାଜାନଙ୍କୁ କେଶରପୁରରୁ ଗିରଫ କରିଥିଲା ବୋଲି ବାଦାମବାଡ଼ି ଥାନାଧିକାରୀ ହିମାଂଶୁ ଭୂଷଣ ସ୍ବାଇଁ କହିଛନ୍ତି। ଏହି ଘଟଣାରେ ଦୁର୍ଦ୍ଦାନ୍ତ ଅପରାଧୀ ସକିଲ ଅହମ୍ମଦ ଓରଫ ମହମ୍ମଦ ସକିଲଙ୍କ ସମ୍ପୃକ୍ତି ଥିବା ପୋଲିସ କହିଛି। ସକିଲ ଏବେ କେନ୍ଦୁଝର ଜେଲରେ। କିଛି ଦିନ ତଳେ ପୋଲିସ କମିଶନରଙ୍କ ନିର୍ଦ୍ଦେଶରେ ସକିଲଙ୍କ ଉପରେ ଜାତୀୟ ନିରାପତ୍ତା ଆଇନ (ଏନ୍ଏସ୍ଏ) ଲଗାଯାଇଥିଲା। କିନ୍ତୁ ଜେଲ ଭିତରେ ରହି ଫୋନ ଯୋଗେ ସକିଲ ଦାଦାବଟି ମାଗିବା ଜାରି ରଖିଛନ୍ତି। ଗତ ୧୯ ତାରିଖରେ କ୍ୟାଣ୍ଟେନମେଣ୍ଟ ଥାନା ଦାଦାବଟି ଆଦାୟ ଅଭିଯୋଗରେ ୪ଜଣଙ୍କୁ ଗିରଫ କରିଥିଲା। ସୋମବାର ଘଟଣାରେ ଗିରଫ ଅଭିଯୁକ୍ତ ସେକ୍ ଜାବିଦ ହେଉଛନ୍ତି ସକିଲଙ୍କ ସାନଭାଇ। ଗିରଫ ୩ ଅଭିଯୁକ୍ତଙ୍କୁ କେସ୍ ନଂ-୧୪୩ ଏବଂ ଆଇପିସି ଧାରା ୩୮୫/୩୮୬/୩୮୭/୧୨୦(ବି), ଆର୍ମସ ଆକ୍ଟ ୨୫/୨୭ ଅନୁଯାୟୀ ଗିରଫ ପରେ କୋର୍ଟ ଚାଲାଣ କରାଯାଇଛି। ଅନ୍ୟପକ୍ଷରେ ଗତ ରବିବାର ମଧ୍ୟ ଚାଉଳିଆଗଞ୍ଜ ଥାନା ଦାଦାବଟି ଆଦାୟ ଅଭିଯୋଗରେ ଜଗତପୁରର କୁନା ଚନ୍ଦ୍ର ସ୍ବାଇଁଙ୍କୁ ଗିରଫ କରିଥିଲା। ତାଙ୍କ ନାମରେ ୧୩ଟି ମାମଲା ରହିଥିଲା।
