ନୂଆଦିଲ୍ଲୀ,୬।୯: ଜଣାଶୁଣା ଶିଳ୍ପପତି ତଥା ଟାଟା ସନ୍ସର ପୂର୍ବତନ ଅଧ୍ୟକ୍ଷ ସାଇରସ ମିସ୍ତ୍ରୀଙ୍କ ସଡ଼କ ଦୁର୍ଘଟଣାରେ ମୃତ୍ୟୁ ପରେ ସଡକ ସୁରକ୍ଷା ବୈଶିଷ୍ଟ୍ୟକୁ ନେଇ ଅନେକ ପ୍ରଶ୍ନ ଉଙ୍କି ମାରୁଛି। ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ, ସେ ପଛ ସିଟରେ ବସିଥିଲେ ଏବଂ ସେ ସିଟ ବେଲ୍ଟ ପିନ୍ଧି ନ ଥିଲେ। ଏ ସମ୍ପର୍କରେ କେନ୍ଦ୍ର ପରିବହନ ମନ୍ତ୍ରୀ ନୀତିନ ଗଡକରୀ ନିଜ ପ୍ରତିକ୍ରିୟା ଦେଇଛନ୍ତି।
ଗଡକରୀ କହିଛନ୍ତି, ସଡ଼କ ସୁରକ୍ଷା ପ୍ରସଙ୍ଗରେ ଭାରତୀୟଙ୍କ ମଧ୍ୟରେ ମାନସିକତା ବଦଳିବା ଆବଶ୍ୟକ। ଆମେ ଭାବୁଛୁ ପଛ ସିଟରେ ସିଟ ବେଲ୍ଟ ଆବଶ୍ୟକ ନାହିଁ, କିନ୍ତୁ ଏହା ଭାବିବା ସମ୍ପୂର୍ଣ୍ଣ ଭୁଲ। ମୋର ଯୌବନରେ ମୁଁ ମଧ୍ୟ ଅନେକ ଟ୍ରାଫିକ ନିୟମ ଭାଙ୍ଗିଛି, କିନ୍ତୁ ସେତେବେଳେ ମୁଁ ଜାଣି ନ ଥିଲି ଯେ ଏହା କେତେ ବିପଜ୍ଜନକ ଅଟେ। କଲେଜ ନିର୍ବାଚନ ସମୟରେ ୪ ଜଣ ପିଲା ଗୋଟିଏ ସ୍କୁଟରରେ ବୁଲୁଥିଲୁ। ନମ୍ବର ପ୍ଲେଟକୁ ହାତରେ ଲୁଚାଇ ଦେଉଥିଲୁ। ଏବେ କିନ୍ତୁ ଆମର ମାନସିକତାକୁ ପରିବର୍ତ୍ତନ କରି ନିୟମ ମାନିବାକୁ ପଡ଼ିବ।
ନୀତିନ ଗଡକରୀ ଆହୁରି ମଧ୍ୟ କହିଛନ୍ତି, ମୁଁ କିଛି ଦିନ ପୂର୍ବରୁ ଚାରିଜଣ ମୁଖ୍ୟମନ୍ତ୍ରୀଙ୍କ କାରରେ ବସିଥିଲି। ସମସ୍ତଙ୍କ ଆଗ ସିଟରେ ସିଟ ବେଲ୍ଟରେ କ୍ଲିପ ରହିଥିଲା, ଯାହା ଦ୍ୱାରା ସତର୍କ ଆଲାରାମ୍ ବାଜିବ ନାହିଁ। ଏହା ଦେଖିବା ପରେ ମୁଁ ଡ୍ରାଇଭରକୁ ଗାଳି ଦେଇ କ୍ଲିପ କାଢିଲି। ଏହା ପରେ ମୁଁ ଏପରି କ୍ଲିପ ତିଆରି କରିବା ଉପରେ ରୋକ ଲଗାଇ ଦେଇଥିଲି। ସଡକ ସୁରକ୍ଷା ସମ୍ପର୍କରେ ସଚେତନତା ସୃଷ୍ଟି କରିବାକୁ କେନ୍ଦ୍ର ପରିବହନ ମନ୍ତ୍ରଣାଳୟ ବଲିଉଡ ତାରକା, କ୍ରିକେଟର ଏବଂ ଗଣମାଧ୍ୟମର ସହାୟତା ନେଉଛି ବୋଲି ମନ୍ତ୍ରୀ କହିଛନ୍ତି।
