ଭୁବନେଶ୍ୱର,୧୭।୭(ସୂର୍ଯ୍ୟକାନ୍ତ ବେହେରା): ଟଙ୍କା ଦେଲେ ସୁନ୍ଦରୀ ଯୁବତୀ ଯୋଗାଇ ଦିଆଯିବ। ସହରରେ ସବୁଠି ସେଟିଂ। ହୋଟେଲରେ ରହିବା, ଖାଇବା ଫ୍ରି। ହୋମ୍ ଡେଲିଭରିର ବି ସୁବିଧା ରହିଛି ।
ପୋଲିସର ଭୟ ନାହିଁ କି ଡରିବାରେ କାରଣ ନାହିଁ। ଦେଶୀ, ବିଦେଶୀ ସବୁ କିଛି ମିଳିବ ହାତପାହାନ୍ତାରେ। ଏଭଳି ମିଛ ପ୍ରତିଶ୍ରୁତି ଦେଇ ଲୋକଙ୍କୁ ଭୁଆଁ ବୁଲାଉଛନ୍ତି ସାଇବର ଅପରାଧୀ। କେବଳ ମିଛ କହୁନାହାନ୍ତି, ଧମକ ଚମକ ଦେଇ ଟଙ୍କା ବି ଲୁଟୁଛନ୍ତି। ତା’ପରେ ଆରମ୍ଭ ହେଉଛି ମାନସିକ ନିର୍ଯାତନା। ଠକେଇର ଶିକାର ହୋଇଥିବା ବ୍ୟକ୍ତି ଲୋକଲଜ୍ଜା ଭୟରେ ନା ପୋଲିସ ଦ୍ୱାରସ୍ଥ ହେଉଛନ୍ତି ନା ସେମାନଙ୍କ କବଳରୁ ରକ୍ଷା ପାଉଛନ୍ତି। ଅନ୍ଲାଇନ୍ରେ ସର୍ଚ୍ଚ କଲେ ପୁଳା ପୁଳା କଲଗର୍ଲ ସାଇଟ୍ ଦେଖିବାକୁ ମିଳୁଛି। ୱେବ୍ସାଇଟରେ ଥିବା ନମ୍ବରରେ ଯୋଗାଯୋଗ କରିବା ମାତ୍ରେ ଆରମ୍ଭ ହୋଇଯାଉଛି ସେମାନଙ୍କ କାର୍ନାମା। ପ୍ରଥମେ ହ଼୍ବାଟ୍ସଆପରେ ମେସେଜ କରିବାକୁ କହୁଛନ୍ତି। ଏହାପରେ ୨ ହଜାରରୁ ୧୪ ହଜାର ପର୍ଯ୍ୟନ୍ତ ବିଭିନ୍ନ ଦରର ସୁନ୍ଦରୀ ଝିଅଙ୍କ ଫଟୋ ପଠାଇ ଦେଉଛନ୍ତି। ଝିଅ ବାଛିବା ପରେ ସେମାନେ ଦର ନିର୍ଦ୍ଧାରଣ କରିବା ସହ ଆଗୁଆ ୧୬ଶହ ରୁ ଶହ ଟଙ୍କା ପର୍ଯ୍ୟନ୍ତ ପଠାଇବାକୁ କହୁଛନ୍ତି। ପ୍ରଥମ କିସ୍ତି ଦେବା ପରେ ଝିଅ ହୋଟେଲରେ ପହଞ୍ଚତ୍ୟିବ କିମ୍ବା ଗ୍ରାହକଙ୍କ ଘରକୁ ଆସିବ ବୋଲି ମଧ୍ୟ ପ୍ରତିଶ୍ରୁତି ଦେଉଛନ୍ତି। ଟଙ୍କା କାରବାର ପାଇଁ ଫୋନ୍ ପେ ଓ ଗୁଗଲ ପେ’ର ସାହାରା ନେଉଛନ୍ତି। ହ୍ବାଟ୍ସଆପ କିମ୍ବା ଅନ୍ୟ ସୋସିଆଲ୍ ମିଡିଆରୁ ଗ୍ରାହକଙ୍କ ଫଟୋ ନେଇ ଏଡିଟ୍ କରିବା ସହ ବ୍ଲାକ୍ମେଲ କରି ଟଙ୍କା ଶୋଷି ନେଉଛନ୍ତି। ଏଭଳି ଠକେଇର ଶିକାର ହୋଇଥିବା ଜଣେ ଯୁବକ କହିଛନ୍ତି, ଅନ୍ଲାଇନରେ କଲଗାର୍ଲ ସହଜରେ ମିଳିଯାଉଥିବା ଜାଣିବା ପରେ ମୁଁ ସର୍ଚ୍ଚ କରି ଏକ ସଂସ୍ଥାର ଓ୍ବେବ୍ସାଇଟ୍ ପାଇବା ପରେ ୫ଶହ ଟଙ୍କା ଦେଇ ବୁକ୍ କରିଥିଲି। ମୋ ଭଡା ଘରକୁ ଝିଅକୁ ପଠାଇବେ ବୋଲି କୁହାଯାଇଥିଲା। ଟଙ୍କା ପେମେଣ୍ଟ କରିବାର କିଛି ସମୟ ମଧ୍ୟରେ ଜଣେ ଯୁବତୀ କଲ୍ କରି ମାଷ୍ଟରକ୍ୟାଣ୍ଟିନ ଛକରେ ଥିବା କହିବା ସହ ଆଉ ୧ହଜାର ଟଙ୍କା ଦେବାକୁ ଦାବି କରିଥିଲେ। ହେଲେ ଯୁବକ ଜଣକ ମନା କରିବାରୁ ସେ ଧମକ ଦେଇଥିଲେ। ଟଙ୍କା ଦେ ନ ହେଲେ ଫଟୋ ଭାଇରାଲ ସହ ଥାନାରେ ବଳାତ୍କାର କେସ୍ ଦେବାକୁ କହିଥିଲେ। ତେଣୁ ବାଧ୍ୟ ହୋଇ ଯୁବକ ଜଣକ ଆଉ କିଛି ଟଙ୍କା ତାଙ୍କ ଆକାଉଣ୍ଟକୁ ପଠାଇଥିଲେ। ଏଭଳି ବାରମ୍ବାର ଟଙ୍କା ମାଗିବାରୁ ଶେଷରେ ଯୁବକ ଜଣକ ସାଇବର ଥାନାରେ ଅଭିଯୋଗ କରିଥିଲେ।
ଏନେଇ ସାଇବର ଥାନାର ଅଧିକାରିଣୀ ରଶ୍ମିତା ଜେନା କହିଛନ୍ତି. ଏହା ବେଆଇନ କାର୍ଯ୍ୟକଳାପ। ଲୋକମାନେ ବୁଝିବା ଆଗରୁ ସାଇବର ଅପରାଧୀଙ୍କ ଜାଲରେ ପଡିଯାଉଛନ୍ତି। ତେଣୁ ଲୋକେ ସଚେତନ ହେଲେ ଏଭଳି ଠକେଇରୁ ବର୍ତ୍ତି ଯାଇପାରିବେ। ଠକାମିର ଶିକାର ହୋଇଥିଲେ ତୁରନ୍ତ ଥାନାରେ ଅଭିଯୋଗ କରନ୍ତୁ। ଏସ୍କର୍ଟ ନାଁରେ ୪ଟି ଅଭିଯୋଗ ହୋଇଥିବାବେଳେ ୬ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିବା ସେ କହିଛନ୍ତି।
