କଟକ ଅଫିସ, ୭ା୭:ମଙ୍ଗଳବାର ସନ୍ଧ୍ୟାରେ ପ୍ରବଳ ବର୍ଷାଯୋଗୁ କଟକର ଅଧିକାଂଶ ଅଞ୍ଚଳ ଜଳମଗ୍ନ ହୋଇଛି। ବର୍ଷା ପୂର୍ବରୁ ସହରରେ ନାଳରୁ ପଙ୍କୋଦ୍ଧାର କାର୍ଯ୍ୟ ଶେଷ ହୋଇ ନ ଥିବାରୁ ଏଭଳି ଜଳବନ୍ଦୀ ସ୍ଥିତି ଉପୁଜିଥିଲା। ବିଶେଷକରି ସହରର ମୁଖ୍ୟ ରାସ୍ତାରେ ବର୍ଷାପାଣି ଲହଡି ଭାଙ୍ଗି ବନ୍ୟାର ଭ୍ରମ ସୃଷ୍ଟି କରିଥିବାବେଳେ ସହର ତଳି ଅଞ୍ଚଳର ଥିବା ଲୋକଙ୍କ ଘରେ ପାଣି ପଶିଥିଲା।
ମିଳିଥିବା ସୂଚନା ଅନୁଯାୟୀ, କଟକରେ ସନ୍ଧ୍ୟା ସମୟରେ ପ୍ରାୟ ଦେଢଘଣ୍ଟା ବର୍ଷା ହୋଇଥିଲା। ଏଥିଯୋଗୁ ବାଦାମବାଡି, ରାଣୀହାଟ, ମଙ୍ଗଳାବାଗ,କଲେଜଛକ, ଲିଙ୍କ୍ରୋଡ, ଖାନ୍ନଗର, ଦୋଳମୁଣ୍ଡାଇ ଅଞ୍ଚଳ ରାସ୍ତାରେ ଆଣ୍ଡୁଏ ଉଚ୍ଚର ପାଣି ଜମି ରହିଥିଲା। ସେହିପରି ସହର ତଳି ଅଞ୍ଚଳ ସୂତାହାଟ, ବକ୍ସିବଜାର ପେନ୍ସନ୍ ଲେନ୍, ପଟାପୋଲ, ଓଡିଆ ବଜାର, ଗଙ୍ଗାମନ୍ଦିର, କାଜିବଜାର, ମହିଦାସ ବଜାର, କାଠଗଡା ସାହି ରାସ୍ତା ବୁଡି ଯାଇଥିବାବେଳେ ଅନେକ ଲୋକଙ୍କ ଘରେ ପାଣିପଶି ଜିନିଷପତ୍ର ଭାସୁଥିବା ଦେଖିବାକୁ ମିଳିଥିଲା। କିଛି ଘଣ୍ଟା ପାଇଁ ଲୋକମାନେ ଘର ଭିତରେ ଜଳବନ୍ଦୀ ଅବସ୍ଥାରେ ରହିବାକୁ ବାଧ୍ୟ ହୋଇଥିଲେ। ବର୍ଷା ପୂର୍ବରୁ ଲୋକମାନେ ଯେଉଁଠାରେ ଗାଡ଼ି ରଖିଥିଲେ, ବର୍ଷା ଛାଡିବା ପରେ ତାହା ଅଧା ବୁଡି ଯାଇଥିଲା। ତେବେ ସହରରେ ଏଭଳି ପରିସ୍ଥିତି ପାଇଁ କଟକ ମହାନଗର ନିଗମ(ସିଏମ୍ସି) ସମ୍ପୂର୍ଣ୍ଣ ଭାବେ ଦାୟୀ ବୋଲି ସହରବାସୀ ଅଭିଯୋଗ କରିଛନ୍ତି। ଠିକ୍ ଭାବେ ସିଏମ୍ସି ପକ୍ଷରୁ ନାଳନର୍ଦ୍ଦମାରୁ ପଙ୍କ ଉଦ୍ଧାର କରାଯାଇ ନଥିବାରୁ ମଙ୍ଗଳବାର ଏଭଳି ପରିସ୍ଥିତି ସୃଷ୍ଟି ହୋଇଥିଲା। ଏ ସମ୍ପର୍କରେ ଜାଣିବା ପାଇଁ ସିଏମ୍ସିର ନିର୍ବାହୀଯନ୍ତ୍ରୀ-୨ ଦିବ୍ୟରଞ୍ଜନ ତ୍ରିପାଠୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳିପାରିନାହିଁ।
