ନୂଆଦିଲ୍ଲୀ,୧୦।୪: ଶନିବାର ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍)ର ଦ୍ୱିତୀୟ ମ୍ୟାଚ୍ ଖେଳାଯିବ। ମ୍ୟାଚ୍ରେ ଦିଲ୍ଲୀ କ୍ୟାପିଟାଲ୍ସ ଏବଂ ଚେନ୍ନାଇ ସୁପର କିଙ୍ଗ୍ସ ମୁହାଁମୁହିଁ ହେବେ। ସବୁଠାରୁ ଯୁବ ଅଧିନାୟକ ରିଷଭ ପନ୍ତଙ୍କ ସହ ସବୁଠାରୁ ବୟସ୍କ ଅଧିନାୟକ ମହେନ୍ଦ୍ର ସିଂହ ଧୋନୀଙ୍କ ମଧ୍ୟରେ ଏହି ମୁକାବିଲା ବେଶ ରୋମାଞ୍ଚକର ହେବ ବୋଲି ଆଶା କରାଯାଉଛି।
ୟୁଏଇରେ ଖେଳାଯାଇଥିବା ଗତ ଆଇପିଏଲ୍ ସିଜିନରେ ଉପବିଜେତା ହୋଇଥିଲା ଦିଲ୍ଲୀ କ୍ୟାପିଟାଲ୍ସ(ଡିସି)। ଚଳିତ ଥର ନିୟମିତ ଅଧିନାୟକ ଶ୍ରେୟାସ ଆୟାରଙ୍କ ଅନୁପସ୍ଥିତି ସତ୍ତ୍ୱେ ପନ୍ତଙ୍କ ନେତୃତ୍ୱରେ ଦଳ ଭଲ ଖେଳିପାରେ।
ନିକଟରେ ପନ୍ତ ସିଏସ୍କେ ବିପକ୍ଷ ମ୍ୟାଚ୍ରେ ଧୋନୀଙ୍କଠାରୁ ମିଳିଥିବା ସମସ୍ତ ଶିକ୍ଷାକୁ ବ୍ୟବହାର କରିବେ ବୋଲି କହିଥିଲେ। ଅଧିନାୟକ ଭାବେ ଧୋନୀଙ୍କ ବିପକ୍ଷରେ ପ୍ରଥମ ମ୍ୟାଚ୍ ଖେଳିବା ଭଲ ଅନୁଭବ ହେବ। କାରଣ ତାଙ୍କଠାରୁ ବହୁତ କିଛି ଶିଖିଛି। ନିଜ ଅନୁଭବ ସହ ଗୁରୁ ଭାବେ ତାଙ୍କଠାରୁ ମିଳିଥିବା ଶିକ୍ଷାକୁ ନେଇ ଖେଳିବୁ ବୋଲି ସେ କହିଥିଲେ।
ତେବେ ଏହି ମ୍ୟାଚ୍ରେ ଦିଲ୍ଲୀ ପକ୍ଷରୁ ପୃଥ୍ବୀ ଶ ଏବଂ ଶିଖର ଧଓ୍ବନ ଓପନିଂ କରିପାରନ୍ତି। ଏହାଛଡ଼ା ପନ୍ତ ନିଜେ ଭଲ ଫର୍ମରେ ଅଛନ୍ତି। ବୋଲିଂରେ ଈଶାନ୍ତ ଶର୍ମା, ଉମେଶ ଯାଦ, କ୍ରିସ ବୋକ୍ସ ଏବଂ ଏନ୍ରିଚ ନୋର୍କିୟା ପ୍ରମୁଖ ଖେଳାଳି ଅଛନ୍ତି। ଅପରପକ୍ଷେ ଚେନ୍ନାଇ ଟିମ୍ରେ ସୁରେଶ ରାଇନାଙ୍କ ପ୍ରତ୍ୟାବର୍ତ୍ତନ ହୋଇଛି। ଶୀର୍ଷକ୍ରମରେ ଋତୁରାଜ ଗାୟକଓ୍ବାଡ, ଫାଫ ଡୁ ପ୍ଲେସି ପ୍ରମୁଖ ଅଛନ୍ତି। ବୋଲିଂରେ ଶାର୍ଦ୍ଦୁଳ ଠାକୁର ପ୍ରଭାବିତ କରିପାରନ୍ତି।
