ଚେନ୍ନାଇ,୩୧।୮: ଆଇପିଏଲ୍ ଫ୍ରାଞ୍ଚାଇଜ୍ ଟିମ୍ ଚେନ୍ନାଇ ସୁପର୍ କିଙ୍ଗ୍ସ(ସିଏସ୍କେ) ଦଳର ଗୁରୁତ୍ୱପୂର୍ଣ୍ଣ ଖେଳାଳି ସୁରେଶ ରାଇନା ଆଇପିଏଲ୍ରୁ ଓହରି ଯାଇଛନ୍ତି। ଏନେଇ ଅସନ୍ତୋଷ ପ୍ରକାଶ କରିଛନ୍ତି ଚେନ୍ନାଇ ସୁପର କିଙ୍ଗ୍ସ ମାଲିକ ଏନ ଶ୍ରୀନିବାସନ। ସୁରେଶ ରାଇନାଙ୍କ ଆଇପିଏଲ ଛାଡିଥିବାରୁ ସେ ଅତ୍ୟନ୍ତ କ୍ରୋଧ ପ୍ରକାଶ କରିଛନ୍ତି। ରାଇନାଙ୍କ ଏଭଳି ନିଷ୍ପତ୍ତି ସମସ୍ତଙ୍କୁ ଆଶ୍ଚର୍ଯ୍ୟ କରିଛି କିନ୍ତୁ ଧୋନୀ ସବୁକିଛି ସମ୍ଭାଳି ନେଇଛନ୍ତି ବୋଲି ଶ୍ରୀନିବାସନ କହିଛନ୍ତି। ସେ ଆହୁରି ମଧ୍ୟ କହିଛନ୍ତି ମୁଁ ଭାବୁଛି ସୁରେଶ ରାଇନା ଫେରି ଆସିବାକୁ ଚାହଁିବେ। ସିଜିନ୍ ଏପର୍ଯ୍ୟନ୍ତ ଆରମ୍ଭ ହୋଇନାହିଁ ଏବଂ ସେ କ’ଣ ହରାଉଛନ୍ତି ତାହା ଅନୁଭବ କରିବେ। ତାଙ୍କୁ ୧୧ କୋଟି ଟଙ୍କା ଆଉ କେଉଁଠୁ ମିଳିବ ନାହିଁ ବୋଲି ସେ କହିଛନ୍ତି। ରାଇନା ଯେବେଠୁ ଦୁବାଇରୁ ଘରକୁ ଫେରିଛନ୍ତି, ସେବେଠୁ ନୂଆ ନୂଆ ଅଭିଯୋଗ ଆଣିଛନ୍ତି। ତାଙ୍କ ମୁଣ୍ଡ ଉପରେ ସଫଳତା ଚଢିଯାଇଛି। ଯଦି ଆପଣ ଖୁସି ନାହାନ୍ତି ତେବେ ଦଳ ସହ ରହିବା ଉଚିତ୍ ନୁହେଁ। ସିଏସ୍କେ ଏକ ପରିବାର ପରି ଏବଂ ସମସ୍ତ ବରିଷ୍ଠ କ୍ରିକେଟର ଏଠାରେ ରହିବା ଶିଖିଛନ୍ତି। ଯଦି ତୁମେ କୌଣସି ଜିନିଷ ଉପରେ ଜିଦ ଧରିଛ କିମ୍ବା କିଛି କଥାରେ ଅସନ୍ତୁଷ୍ଟ, ତେବେ ଫେରିଯାଅ। ମୁଁ କାହାକୁ ବାଧ୍ୟ ମଧ୍ୟ କରିପାରିବି ନାହିଁ ସେ କହିଛନ୍ତି। ଦୁବାଇ ଆସିବା ପରଠାରୁ ରାଇନା ହୋଟେଲ ରୁମରେ ଖୁସି ନ ଥିଲେ ଏବଂ ସେ କରୋନା ଯୋଗୁ ଡରିଯାଇଥିଲେ। ସେ ଧୋନୀଙ୍କ ପରି ଏକ କୋଠରୀ ଚାହୁଁଥିଲେ, କାରଣ ତାଙ୍କ କୋଠରୀର ବାଲକୋନି ଠିକ ନ ଥିଲା ବୋଲି ରାଇନା କହିଥିଲେ। ସୂଚନାଯୋଗ୍ୟ, ଆଇପିଏଲ୍ ଖେଲିବାକୁ ରାଇନା ୟୁଏଇ ଯାଇଥିଲେ। ହଠାତ୍ ତାଙ୍କ ସମ୍ପର୍କୀୟଙ୍କ ଘର ଉପରେ କେହି ଆକ୍ରମଣ କରିଥିଲେ। ଏଥିରେ ତାଙ୍କ ତାଙ୍କର ଜଣେ ସମ୍ପର୍କୀୟଙ୍କ ପରଲୋକ ଘଟିଥିଲା। ଏହା ଶୁଣି ରାଇନା ଆଇପିଏଲ୍ ଛାଡି ଭାରତ ଫେରିଆସିଥିଲେ।
