ପୋଷା ଜୀବଜନ୍ତୁ ରଖିବାକୁ ଅନେକେ ଭଲ ପାଆନ୍ତି। କିଏ କୁକୁର, ବିଲେଇ ତ କିଏ ଶୁଆ, ସାରୀ ପରି ଚଢେଇ ରଖନ୍ତି। ହେଲେ ନିକଟରେ ଏକ କୁନି ଝିଅ ନିଜ ପେଟ୍ର ଫଟୋ ସୋସିଆଲ ମିଡିଆରେ ପୋଷ୍ଟ କରିବା ପରେ ଚର୍ଚ୍ଚା ଜୋର୍ ଧରିଛି। କାରଣ କୁନି ଝିଅଟି ନିଜର ପୋଷା କୁମ୍ଭୀର ସହ ଫଟୋ ପୋଷ୍ଟ କରିଛି। ସେପୁଣି ଗୋଟେ କି ଦୁଇଟି ନୁହେଁ, ବରଂ ୬ଟି କୁମ୍ଭୀରକୁ ଏହି ଝିଅଟି ଘରେ ପୋଷିଛନ୍ତି। ଆଉ ଏହି କୁମ୍ଭୀରଗୁଡିକୁ ସେ କୁକୁର ପରି ବ୍ୟବହାର କରନ୍ତି। ଏହି ସାହସୀ ଝିଅଟିର ନାଁ ହେଉଛି ସାଶିମି। ତାଇଓ୍ବାନରେ ରହୁଥିବା ସାଶିମିଙ୍କ ଘରେ କୁମ୍ଭୀର ଗୁଡିକ ଖୋଲାରେ ବୁଲନ୍ତି। ପ୍ରଥମ କୁମ୍ଭୀରକୁ ସେ ତାଇଓ୍ବାନର ଏକ ବ୍ରିଡରଠାରୁ କିଣିଥିଲେ। ଏହାପରେ ତାଙ୍କର କୁମ୍ଭୀରଙ୍କ ପ୍ରତି ଭଲ ପାଇବା ବଢିଗଲା। ତେଣୁ ଆଉ ୫ଟି କୁମ୍ଭୀର ଆଣିଲେ। ଆଜି ପର୍ଯ୍ୟନ୍ତ କୌଣସି କୁମ୍ଭୀର ତାଙ୍କର କିଛି କ୍ଷତି କରି ନାହାନ୍ତି। ତାଙ୍କର ଫିଲ ନାମକ ଏକ କୁମ୍ଭୀର ତ ସାଶିମିଙ୍କର ଜିନିଷ ସବୁବେଳେ ଲୁଚାଇ ନେଇଯାଏ। ଆଉ ସେ ଧରାପଡିଗଲେ କୁକୁରଙ୍କ ଭଳି ଦୌଡି ଦୌଡି ପଳାଏ ଓ ଲୁଚିଯାଏ। ସାଶିମି କୁମ୍ଭୀରଙ୍କ ପାଇଁ ଏକ ବେଡରୁମ୍ କରି ଗଦି, ତକିଆ ରଖିଛନ୍ତି, ଯାହା ଉପରେ କୁମ୍ଭୀରମାନେ ଶୋଇଥାନ୍ତି। ସାଶିମି ଏଇ କୁମ୍ଭୀରଙ୍କ ସହ ଖେଳନ୍ତି ଓ ତାଙ୍କୁ ଗେଲ ବି କରନ୍ତି। ଯାହାକୁ ଦେଖି ସମସ୍ତେ ଆଶ୍ଚର୍ଯ୍ୟ ହେଉଛନ୍ତି।
