କଟକ ଅଫିସ, ୧।୭: ସୋସିଆଲ ମିଡିଆ ବ୍ୟବହାରକାରୀଙ୍କ ଉଦ୍ଦେଶ୍ୟରେ କ୍ରାଇମବ୍ରାଞ୍ଚ ପକ୍ଷରୁ ବୁଧବାର ଟୁଇଟର ମାଧ୍ୟମରେ ଆଡ୍ଭାଇଜରି ଜାରି କରାଯାଇଛି। ଏଥିରେ କୁହାଯାଇଛି, ସୋସିଆଲ ମିଡିଆରେ ଆକାଉଣ୍ଟ ଖୋଲିବା ସମୟରେ ସେହି ୱେବ୍ସାଇଟ୍ର ପ୍ରିଭେସି ପଲିସିକୁ ଭଲଭାବେ ପଢି ତୃତୀୟ ପକ୍ଷ ଆପ୍ଲିକେଶନ ବାବଦରେ ଧ୍ୟାନ ଦିଅନ୍ତୁ। ସୋସିଆଲ ମିଡିଆ ଆକାଉଣ୍ଟରେ ନିଜର ଅତ୍ୟନ୍ତ ଗୋପନୀୟ ତଥ୍ୟ ଦିଅନ୍ତୁ ନାହିଁ। ଏଥିରେ ଅଜଣା ମହିଳାପୁରୁଷଙ୍କୁ ବନ୍ଧୁଭାବେ ଗ୍ରହଣ କରନ୍ତୁ ନାହିଁ ଓ କୌଣସି ତଥ୍ୟ ପୋଷ୍ଟ କରିବା ପୂର୍ବରୁ ଭଲଭାବେ ପରଖନ୍ତୁ। ସାମାଜିକ ଗଣମାଧ୍ୟମରେ ଖରାପ ତଥ୍ୟ ପୋଷ୍ଟ କରନ୍ତୁ ନାହିଁ କିମ୍ବା ଆପଣ ପାଉଥିବା ମେସେଜକୁ ଅନ୍ଧଭଳି ଫରୱାର୍ଡ କରନ୍ତୁ ନାହିଁ। ଏହା ଆଇନତଃ ଅପରାଧ। ପ୍ରତିଥର ସୋସିଆଲ ମିଡିଆ ଖୋଲି ଦେଖିସାରିବା ପରେ ଆକାଉଣ୍ଟ ବନ୍ଦ କରନ୍ତୁ। ସେହିପରି ଅଜଣା ଲିଙ୍କ୍ ଉପରେ କ୍ଲିକ୍ କରନ୍ତୁ ନାହିଁ, ଅଜଣା ମେଲ୍ରୁ ଡାଉନ୍ଲୋଡ କରନ୍ତୁ ନାହିଁ। ଏଥିରେ ଭାଇରସ ଥାଇପାରେ ଓ ଆପଣଙ୍କ ତଥ୍ୟ ଚୋରି ହୋଇଯାଇପାରେ। ମାଗଣା ୱାଇଫାଇ ଜୋନ୍ରେ ନିଜର ସୋସିଆଲ ମିଡିଆ ଆକାଉଣ୍ଟ ଖୋଲିବା ସମୟରେ ସାବଧାନତା ଅବଲମ୍ବନ କରନ୍ତୁ। ହ୍ୟାକରମାନେ ଫ୍ରି ୱାଇଫାଇ ଜୋନ୍ରେ ଆପଣଙ୍କ ୟୁଜର ଆଇଡି ତଥା ପାସ୍ୱାର୍ଡ ଓ ବ୍ୟାଙ୍କ ସମ୍ବନ୍ଧୀୟ ତଥ୍ୟକୁ ହ୍ୟାକ୍ କରିବାର ବହୁ ସମ୍ଭାବନା ରହିଛି। ତେଣୁ ମାଗଣା ୱାଇଫାଇ ଜୋନ୍ରେ ନିଜର ବ୍ୟାଙ୍କ ସମ୍ବନ୍ଧୀୟ କାର୍ଯ୍ୟ କରନ୍ତୁ ନାହିଁ ବୋଲି ଉକ୍ତ ଆଡ୍ଭାଇଜରିରେ କୁହାଯାଇଛି।
